ايتالىق, پريشاحتينسكىدەگى بۇلدىرشىندەرگە ارنالعان 360 ورىندىق «ودارەشكا» بالاباقشاسى ەلباسى كۇنىنە وراي ۇيىمداستىرىلعان ەرەكشە سىيلىقتاردىڭ ءبىرى بولدى. مەملەكەت-جەكەمەنشىك ارىپتەستىك اياسىندا اشىلعان مەكتەپكە دەيىنگى مەكەمە پريشاحتينسكىدەگى 23 شاعىن اۋداندا ورنالاسقان. بالاباقشا قۇرىلتايشىسى گۇلنار سمايلوۆانىڭ تاجىريبەسىندەگى بۇل ءتورتىنشى بالاباقشا. قاراعاندىلىق كاسىپكەرلەرگە مەملەكەت-جەكەمەنشىك ارىپتەستىك زور مۇمكىندىكتەر ۇسىنعانى راس. 2015 جىلى 1000 ورىنعا ارنالعان ءتورت جەكەمەنشىك بالاباقشا اشسىلسا, 2016 جىلى كاسىپكەرلەر وسىنداي 10 باقشا اشقان. ال بيىلعى جىلى سولاردىڭ قاتارى 19-عا ارتقان.
«ودارەشكا» بالاباقشاسىنىڭ عيماراتى كۇردەلى جوندەۋدەن ءوتىپ, زاماناۋي جابدىقتالىپ, قازىرگى كۇنى ءتىپتى, 400-گە تارتا بالاعا ەسىگىن اشقان. بارلىق جاعداي جاسالعان عيماراتتىڭ سىرتى دا, ءىشى دە كوز تارتارلىق. ونىڭ ۇستىنە, قالانىڭ وڭتۇستىك-شىعىس بولىگىندەگى «اقەركە», «ارماشكا» جانە مايقۇدىقتاعى «اقجارقىن» بالاباقشالارى دا گۇلنار سمايلوۆانىڭ ەڭبەگى. كاسىپكەر دامىتۋ-تاربيە پروتسەسىن جۇرگىزىپ قانا قويماي, بالاباقشالاردا تۇزدى شاحتالار, روبوتوتەحنيكا كابينەتتەرى, شىعارماشىلىق شەبەرحانالار ۇيىمداستىرىپ, بالالارمەن لوگوپەد جانە پسيحولوگ ماماندارىنىڭ دا جۇمىسىن جان-جاقتى قاراستىرعان.
قۇرىلتايشىنىڭ ايتۋىنشا, 1975 جىلدارى «ۋلىبكا» دەپ اتالعان بالاباقشانىڭ قۇرىلىسى سالىنعانىنا قىرىق جىلدان استام ۋاقىت وتكەن. كەيىننەن توقسانىنشى جىلداردىڭ قيىندىعى كەزىندە بالاباقشا جابىلىپ, «سولنىشكو» بالاباقشاسىنا قوسىلعان. اتا-انالاردىڭ تولەيتىن اقشاسىنىڭ جوقتىعىنان, تاماقتاندىرۋ جايى دا ءماز بولماۋى سەبەپتى بىرىنەن كەيىن ءبىرى جابىلعان مەكتەپكە دەيىنگى مەكەمەلەردىڭ عيماراتتارى بوس قالدى. سودان بەرى, جيىرما جىلدان استام قولدان-قولعا وتكەن عيمارات بۇل كۇنى بۇلدىرشىندەرگە ەسىگىن قايتا اشتى.
اتالمىش نىساننىڭ اشىلۋ سالتاناتىنا ءوڭىر باسشىسى ەرلان قوشانوۆ قاتىستى.
– مەرەكە قارساڭىندا پريشاحتينسك تۇرعىندارى ءۇشىن بۇل جاقسى سىي. بۇگىن شىنىمەن دە قۋانىشتى كۇن. ءبىرىنشى كەزەكتە بۇلدىرشىندەردىڭ اتا-انالارىن وسىنداي تاماشا بالاباقشانىڭ اشىلۋىمەن قۇتتىقتاعىم كەلەدى. وسى جەردە ەلىمىزدىڭ بولاشاعى ءوسىپ-جەتىلەدى. بالالارىڭىزدىڭ بولاشاعى زور بولسىن. ال, ءبىز – ەلباسىنىڭ تاپسىرماسىن وسىنداي جوعارى دەڭگەيدە ورىنداۋعا تىرىسامىز, – دەدى اكىم.
بيىل, جالپى پريشاحتينسكىدە بارلىعى ءۇش بالاباقشا اشىلعان. ەگەر جىل باسىندا كەزەكتەگى بالالار سانى 1000-عا تارتا بوسا, مەملەكەت-جەكەشەلىك ارىپتەستىك اياسىندا كەزەكتەگى بالالار سانى 400-گە ازايعان.
ميراس اسان,
«ەگەمەن قازاقستان»
قاراعاندى وبلىسى
