سەسسيا بارىسىندا الماتى اكىمى ونوماستيكالىق كوميسسياعا قايتالاناتىن 112 كوشەنىڭ اتاۋلارىن وزگەرتۋ تۋرالى زيالى قاۋىم وكىلدەرىنەن, ۇەۇ-دان, قالا تۇرعىندارى مەن اسىرەسە جاستاردان مەگاپوليستىڭ باستى كوشەلەرىنىڭ ءبىرى فۋرمانوۆ كوشەسىنە ەلباسى ەسىمىن بەرۋ جونىندە كوپتەگەن ۇسىنىستار تۇسكەنىن اتاپ ءوتتى.
ء«بىز بيىل استانانىڭ 20 جىلدىعىن مەرەكەلەيمىز. ەگەر ەسكە الاتىن بولساق, تاريحتىڭ ءوزى استانانى كوشىرۋ تۋرالى ەلباسى شەشىمىنىڭ بارىنشا كورەگەندى ءارى دۇرىس ەكەنىن دالەلدەدى. سونىڭ ارقاسىندا ەۋرازيا ورتالىعىندا جاڭا زاماناۋي قالا پايدا بولدى ءارى ەلىمىزدىڭ ىسكەرلىك ورتالىعى رەتىندە الماتى جاڭا سەرپىنمەن دامي باستادى. تاريحي ماڭىزى زور شەشىم مەن پرەزيدەنتتىڭ ەكونوميكالىق رەفورمالارى ءوزارا ۇشتاسىپ, جەكە باستامالاردى ىنتالاندىردى, كاسىپكەرلىك رۋحتى دامىتتى. بۇگىنگى كۇنى الماتى – وڭىرلىك تارتىلىس كۇشى, ورتالىق ازيانىڭ ءىرى مەگاپوليسى», دەدى باۋىرجان بايبەك.
قالا اكىمى مەملەكەت باسشىسى الماتى قالاسىندا كونستيتۋتسيا, ۇلتتىق ۆاليۋتا, قارۋلى كۇشتەر جاساعىن قۇرۋ, مەملەكەتتىك رامىزدەردى بەكىتۋ, سەمەي پوليگونىن جابۋ سياقتى تالاي تاريحي شەشىمدەردى قابىلداعانىن ەسكە الىپ, بۇل ۇسىنىستىڭ جايدان-جاي جاسالماعانىن ايتتى.
«ەلباسى ابىرويىنىڭ ارقاسىندا قازاقستان حالىقارالىق داعدارىستاردى شەشۋدە باستى ءرول اتقاراتىن ەلگە, سەنىمدى سەرىكتەسكە اينالدى. ول كىسى الەمدىك دارەجەدە يادرولىق قارۋدان باس تارتۋعا ۇسىنىس جاساعان, الەمدى يادرولىق قارۋدان ارىلتۋعا ۇلەس قوسقان بىردەن-ءبىر تۇلعا. مەن ارىپتەستەرىمنىڭ پىكىرىنە قوسىلامىن. بۇگىنگى فۋرمانوۆ كوشەسىنىڭ اتاۋىن بەرۋ تۋرالى شەشىم دەر كەزىندە ءارى دۇرىس قابىلدانعان شەشىم», دەدى اكىم.
ەلباسى اتىنا الماتىداعى ۇلكەن داڭعىلدىڭ بەرىلگەنى تۋرالى شەشىمدى قوعام قايراتكەرلەرى مەن زيالى قاۋىم وكىلدەرى جاپپاي قولداپ وتىر. قوعام قايراتكەرى مىرزاتاي جولداسبەكوۆ بۇل حاباردى ەستىگەندە قاتتى قۋانعانىن ايتىپ, ءوز ويىمەن ءبولىستى.
«كەشەگى كەڭەس زامانىندا قازاق تاريحىنا, قازاق حالقىنا, قازاقستانعا ەشقانداي قاتىسى جوق ادامداردىڭ اتى قالاعا دا, دالاعا دا, كوشەلەر مەن مەكەمەلەرگە دە بەرىلدى. ءبىز كەشە تاريحىمىز, ار-وجدانىمىز تاپتالعان ەلمىز. قازاق حاندارى, بيلەرى كەلەكە, مازاققا اينالعان زاماندى دا باسىمىزدان كەشتىك. نۇرسۇلتان نازارباەۆ بابالار اماناتىن ورىنداعان, ارمانىن جۇزەگە اسىرعان ۇلكەن قايراتكەر. ول قيراندىدان مەملەكەت ورناتتى. ونى الەمگە تانىتتى, مويىنداتتى. نازارباەۆ باسقارىپ وتىرعان قازاقستانداي تاۋەلسىز مەملەكەت ۇلى دالانىڭ توسىندە بولعان ەمەس. الماتى مادەني, ەكونوميكالىق ورتالىققا اينالدى. ال استانا قازاقستاندى ورگە سۇيرەدى. وسىنداي تاريحي شەشىمدى ەرلىكپەن قابىلداعان دا ەلباسى بولاتىن. نۇرسۇلتان نازارباەۆ ماقتاۋعا دا, ماقتانۋعا دا تاتيتىن ۇلى تۇلعا. سوندىقتان الماتىنىڭ ۇلكەن ءبىر كۇرە تامىرى سياقتى داڭعىلى نۇرسۇلتان نازارباەۆتىڭ اتىمەن اتالعانىنا شىن جۇرەكتەن قۋانىشتىمىن», دەيدى م.جولداسبەكوۆ.
مەملەكەت باسشىسىنىڭ ەسىمى ەلدىڭ مادەني استاناسىنا اينالعان الماتىداعى كوشەگە بەرىلگەنىن حالىق ءارتىسى بيبىگۇل تولەگەنوۆا دا قۋانا قۇپتاپ وتىر. ءانشىنىڭ ايتۋىنشا, ەلباسىنا ءوزى تۇلەپ ۇشقان الماتىدان كوشە اتىنىڭ بەرىلۋىنىڭ ماڭىزى زور. «ەلباسىنىڭ باسقا ەڭبەكتەرىن بىلاي قويعاندا, مادەنيەتىمىزدىڭ بۇگىنگىدەي دەڭگەيدە دامۋىنا قوسقان ۇلەسى ەرەكشە. سوندىقتان مادەنيەتتىڭ استاناسى, ەجەلگى قالا الماتىداعى كوشەگە ەلباسى ەسىمىنىڭ بەرىلۋى وتە قۇپتارلىق شەشىم», دەدى ب.تولەگەنوۆا.
ەسكە سالار بولساق, وسىدان 10 جىل بۇرىن قازاقستان پرەزيدەنتى ن.ءا.نازارباەۆتىڭ ەسىمى يوردانيانىڭ اممان قالاسىنداعى جانە چەشەن رەسپۋبليكاسىنىڭ گروزنىي قالاسىنداعى كوشەلەردىڭ بىرىنە بەرىلگەن بولاتىن. بۇلاردان وزگە, قازاقستاننىڭ تۇڭعىش پرەزيدەنتىنىڭ ەسىمىمەن تۇركيانىڭ بىرنەشە قالالارىنىڭ كوشەلەرى اتالادى, تاتارستان استاناسى قازاننىڭ ماگيسترالدى كوشەسىنە ەلباسى ەسىمى بەرىلگەن.
مايگۇل سۇلتان,
«ەگەمەن قازاقستان»
