ەلىمىزدە «WorldSkills International» قوزعالىسى فورماتىندا العاش رەت ۇيىمداستىرىلعان «مەنى شىڭداعان سەرپىن – 2017» ءبىرىنشى رەسپۋبليكالىق كاسىبي شەبەرلىك بايقاۋىنىڭ اشىلۋ سالتاناتىندا سويلەگەن سوزىندە وبلىس اكىمىنىڭ ءبىرىنشى ورىنباسارى ايداربەك ساپاروۆ ءتورت جىل بۇرىن ەلباسى باستاماسىمەن قولعا الىنعان باعدارلاما جۇمىسشى كاسىبىنىڭ بەدەلىن كوتەرۋ, وسى سالاداعى سۇرانىستى رەتتەۋ, جاستاردى ەڭبەك كۇشى جەتىسپەيتىن ايماقتارعا ورنالاستىرۋ, تۇراقتاندىرۋ ماقساتىن كوزدەيتىنىن جەتكىزدى. بيىل پەتروپاۆل تەمىر جول كولىگى كوللەدجىن 45, اقجار اۋدانىنداعى اۋىل شارۋاشىلىق كوللەدجىن 22 تۇلەك اياقتاپ, «تەمىر جولدىڭ جىلجىمالى قۇرامىن پايدالانۋ, جوندەۋ جانە تەحنيكالىق قىزمەت كورسەتۋ», «ەسەپتەۋىش تەحنيكا جانە باعدارلامالىق قامتاماسىز ەتۋ» ماماندىقتارىن الىپ شىقتى.
ولاردىڭ 52-ءى جۇمىسقا ورنالاسىپ, 11-ءى ءبىلىم الۋدى ءارى قاراي جالعاستىرعان. «حالىقارالىق باعدارلامالار ورتالىعى» اق ۆيتسە-پرەزيدەنتى تالعات اسقاروۆتىڭ ايتۋىنشا, جوبا شەڭبەرىندە 15 مىڭ ستۋدەنت 26 جوو مەن 37 كوللەدجدە ءبىلىم الۋدا. حالىقارالىق كاسىپتىك دايارلاۋ جانە بىلىكتىلىك ستاندارتتارىن مەڭگەرۋ قازاقستاندىق جاستار الدىنا باستى مىندەت رەتىندە قويىلىپ وتىر. «تسيفرلى قازاقستان», ء«ۇش تىلدە ءبىلىم بەرۋ» سياقتى جوبالار بارشا قازاقستاندىقتاردى ءححى عاسىردىڭ تالاپتارىنا دايارلاۋدىڭ قامى.
بايقاۋعا 9 وبلىستان 80 تۇلەك قاتىسىپ, «اسپاپتى قايتا جاساۋ», «راديوتەحنيكا, ەلەكترونيكا جانە تەلەكوممۋنيكاتسيا», «اسپازدىق ءىس», «كىرپىش قالاۋ», «اقپاراتتىق جۇيەلەر», «اۆتومەحانيك», «ۆەتەرينار-تەحنيك» سەكىلدى ون ماماندىق بويىنشا بىلىكتىلىگى مەن ءبىلىمىن ورتاعا سالدى. ەكى كۇنگە سوزىلعان باسەكە پوگودين اتىنداعى ورىس دراما تەاترىندا قورىتىندىلانىپ, جەڭىمپازدار مەن جۇلدەگەرلەردى وبلىس اكىمىنىڭ ورىنباسارى ماديار قوجاحمەت ماراپاتتادى. جالپىكوماندالىق ەسەپتە سولتۇستىك قازاقستان وبلىسى ءبىرىنشى ورىندى يەلەندى.
«اقپاراتتىق جۇيەلەر» اتالىمىندا وزىپ شىققان سولتۇستىك قازاقستان كاسىپتىك-پەداگوگيكالىق كوللەدجدىڭ ستۋدەنتى سايدا بەكبۋديمەن سويلەسكەنىمىزدە, وڭتۇستىك قازاقستان وبلىسىنان كەلگەن قارشاداي قىز ءۇش جىلدىڭ ىشىندە كوپتەگەن دوستار تاپقانىن, ابدەن باۋىر باسىپ قالعانىن, ەڭبەك جولىن ماعجان ەلىندە جالعاستىرۋىنا قىتىمىر اۋا رايى ەش بوگەسىن بولمايتىنىن ايتتى. راسىندا دا, باعدارلاماعا قاتىسۋ ماسەلەنىڭ ءبىر جاعى عانا. ديپلومدى جاستاردى تۇراقتاندىرۋ جايى قالاي دەگەنگە كەلسەك, كولەڭكەلى تۇستار از ەمەس.
ەڭ وكىنىشتىسى, ۇكىمەت تاراپىنان جەڭىلدىكتى جاعدايلار جاسالعانىنا قاراماستان وقۋ بىتىرۋشىلەردىڭ كەرى ورالىپ جاتاتىنى. ماسەلەن اقجار اۋدانىنا قاراستى لەنينگراد اۋىل شارۋاشىلىق كوللەدجىن تامامداعان 22 تۇلەكتىڭ ءبارى دە قالۋدى قاجەت دەپ تاپپاعان. سەرپىندىكتەردىڭ العاشقى لەگى م.قوزىباەۆ اتىنداعى سقمۋ-دى كەلەسى جىلى اياقتايدى. ازىرگە قانشاسى بولاشاق تاعدىرىن تەرىسكەيمەن بايلانىستىراتىنى بەلگىسىز.
«رۋحاني جاڭعىرۋ» ماقالاسىندا تۋعان جەرگە دەگەن سۇيىسپەنشىلىك قازاقستانعا دەگەن پاتريوتتىق سەزىممەن تىعىز بايلانىستىعى, اجىراعىسىز ۇعىم ەكەنى تەكتەن تەك قوزعالعان جوق. بابالارىمىز عاسىرلار بويى كىندىك قانى تامعان جەرىن عانا ەمەس, ۇلان-عايىر اۋماقتى قورعاپ كەلگەن. ولاي بولسا تۋعان جەرگە دەگەن پەرزەنتتىك پارىز, ازاماتتىق ۇستانىم ءبىر عانا وڭىرمەن شەكتەلمەيتىنى انىق. تۇتاس حالىقتى شىن مانىندەگى ۇلت ەتەتىن مادەني-گەنەتيكالىق كودىنىڭ نەگىزى وسىنداي ويلارعا جەتەلەيدى. جاسىراتىنى جوق, ەلىمىزدىڭ ەڭ قيىرىندا ورنالاسقان وبلىستا كوپتەگەن ەلدى مەكەندەر, اسىرەسە شەكارالىق بەلدەۋلەر ەڭبەك كۇشىنە مۇقتاج.
ەكولوگيالىق جاعىنان تازا, جەرى قۇنارلى بولا تۇرا! كۇنگەيدە, كەرىسىنشە, جەر دە, جۇمىس تا تاپشى. وسى ءبىر تەڭگەرىمسىزدىكتى شەشۋ ءۇشىن ۇكىمەتتىڭ ارنايى قاۋلىسىمەن «وڭتۇستىكتەن – سولتۇستىككە!» جوباسى قولعا الىنىپ, كوشىپ كەلۋشىلەرگە جان-جاقتى الەۋمەتتىك كومەكتەر جاسالۋدا. بۇل جاقتا قوسالقى شارۋاشىلىقپەن اينالىسۋعا دا مۇمكىندىكتەر مول. وسىنداي ارتىقشىلىقتاردى سەرپىندىكتەر پايدالانىپ جاتسا, تەك «بارەكەلدى» دەيمىز.
جەرگىلىكتى كاسىپورىندار مەن ۇيىمدار دا ءوندىرىس ورىندارىندا تاجىريبەدەن وتەتىن بولاشاق تۇلەكتەرمەن ەڭبەك كەلىسىمشارتىن جاساۋعا ق ۇلىقسىز. جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى ماماندارى سولتۇستىك وڭىرلەردە ءبىلىم الۋعا ىنتالى جاستاردى ىشكى ميگراتسيانى رەتتەيتىن ەرىكتى كوشىرۋ باعدارلاماسىنا قاتىسۋشىلار ساناتىنا ەنگىزۋ جايى ءتيىستى ۆەدومستۆولار قاراۋىنا ۇسىنىلعانىن ايتادى. ماسەلە وڭتايلى شەشىلسە, سەرپىندىكتەرگە تۇرعىن ۇيمەن قامتاماسىز ەتۋ, جۇمىسقا ورنالاستىرۋ, باسقا دا الەۋمەتتىك قولداۋ مۇمكىندىكتەرىنە كەپىلدىك بەرىلەر ەدى.
ديپلومدى تۇلەكتەردى وقۋ بىتىرگەن وڭىرلەردە كەمى بەس جىلعا دەيىن ەڭبەك ەتۋگە مىندەتتەۋ سەكىلدى ۇسىنىستاردى دا ەسكەرگەن ءجون سەكىلدى. سوندا شاكىرتاقىعا, جول شىعىنىنا, قىسقى كيىمگە, تاماق پەن جاتاقحاناعا جۇمسالاتىن شىعىندار وتەلىپ, ەڭ باستىسى, ءبىلىمى مەن بىلىگى ۇشتاسقان جۇمىسشى ماماندىعىنا دەگەن سۇرانىستىڭ, ەڭبەك كۇشىنە دەگەن زارۋلىكتىڭ تالاپقا ساي شەشىلەرى ءسوزسىز.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
سۋرەتتى تۇسىرگەن
تالعات تانىباەۆ
