دارىندارىمىزدىڭ مۇنداي اۋقىمى ۇلكەن مۋزىكالىق وقيعاعا ورتاقتاسۋى ەلىمىزدىڭ ەۋروپالىق حابار تاراتۋ وداعىنا (European Broadcasting Union, EBU) قوسىلۋ جوسپارىن جاقىنداتا تۇسپەك.
«حالىقتىڭ ىشىنەن الەمدى مويىنداتۋعا لايىقتى تالانتتار تابىلا بەرمەك. مۇنى قازاقستان ءارتۇرلى حالىقارالىق دەڭگەيدەگى سايىستار كەزىندە بىرنەشە رەت دالەلدەپ ۇلگەردى, دەيدى «31 ارنانىڭ» باس ديرەكتورى باعدات قوجاحمەتوۆ. – بۇلدىرشىندەرىمىزدىڭ «بالالار ەۋروۆيدەنيەسى» بايقاۋىندا ونەر كورسەتۋى – ۇزاق مەرزىمدىك ىنتىماقتاستىققا الىپ بارار العاشقى قادامنىڭ ءبىرى».
سونىمەن «ەۋروۆيدەنيەدە» ونەر كورسەتەتىن جاس تالانتتىڭ ءبىرى مۇحاممەد-ءالي جۇگىنىسوۆ 14 جاسقا ەندى تولعانىنا قاراماستان, حالىقارالىق سايىستاردىڭ لاۋرەاتى اتانعان. گرەكيادا وتكەن حالىقارالىق «Paradise Holiday» فەستيۆالىنىڭ گران-پري جۇلدەگەرى. 11جاسىندا حالىقارالىق «دەتسكايا نوۆايا ۆولنا-2014» بايقاۋىندا 3-ورىن يەلەنگەن, ال 2016 جىلى ماسكەۋدە وتكەن يگور كرۋتويدىڭ «بيتۆا تالانتوۆ» بايقاۋىنىڭ باس جۇلدەسىن جەڭىپ العان.
«دەتسكايا نوۆايا ۆولنا-2015» بايقاۋىندا «گاۋھار قول» سىيلىعىن يەلەنگەن دانەليا تولەشوۆا دا ودان قالىسپايتىنىن جۋىردا عانا جازدىق. دانەليا – «گولوس. ءدىتي» مۋزىكالىق بايقاۋىندا ەرەكشە كوزگە تۇسكەن ءانشىنىڭ ءبىرى. تولەشوۆا دەمي لوۆاتونىڭ Stone Cold انىمەن ساناۋلى سەكۋندتاردا قازىلاردى وزىنە قاراتقانى بەلگىلى. Youtube-تەگى بۇل بەينەجازبا ميلليوننان استام كورسەتىلىم جينادى.
ساحناعا ءۇش جاسىنان باستاپ شىققان الۋا سەرىكحانوۆا دا تالاي رەسپۋبليكالىق بايقاۋدىڭ جۇلدەگەرى. بيىل كوكتەمدە بەلارۋس ەلىندە وتكەن «زولوتىە كليۋچي» بايقاۋىندا ءبىرىنشى ورىن الدى.
ال ماريا زاتۆارنيتسكايا مەن مەرحات جىلقىباەۆ ءاليا نازارباەۆا ۇيىمداستىرعان «بالا داۋىسى» ءبىرىنشى ۇلتتىق بالالار ءان بايقاۋىنىڭ جارتىلاي فينالىنا دەيىن جەتكەنىن بىلەمىز. 12 جاستاعى ماشا زاتۆارنيتسكايا دارىندى بالالارعا ارنالعان مۋزىكالىق مەكتەپ-ينتەرناتتا ۆوكال جانە فورتەپيانودان ءدارىس الادى. 13 جاستاعى مەرحات جىلقىباەۆ دومبىرانىڭ قۇلاعىندا وينايدى جانە مەكتەپتىڭ كوڭىلدى تاپقىشتار كلۋبىنىڭ مۇشەسى.
ايناش ەسالي,
«ەگەمەن قازاقستان»
الماتى
