ايماق باسشىسىنىڭ ايتۋىنشا, وبلىس ونەركاسىبىندەگى ءوسىم 4,1 پايىزدى قۇراعان.
«بۇل رەتتە ماڭىزدى ءرول اتقارعان بىردەن-ءبىر جايت وبلىستاعى كاسىپورىنداردا تەحنولوگيالىق جاڭعىرتۋ جۇمىستارىن جۇرگىزۋ بولدى. تەك ءىرى كومپانيالاردىڭ وزدەرى عانا تەحنولوگيالارى مەن جابدىقتارىن جاڭارتۋعا شامامەن 140 ملرد تەڭگە بولگەن. سونىڭ ناتيجەسىندە بارلىق جۇيە قۇرۋشى كاسىپورىندار ءوندىرىس كولەمىن ۇلعايتا الدى. اتاپ ايتساق, جىل سوڭىنا دەيىن «ارسەلورميتتال تەمىرتاۋ» اق 4,2 ملن توننا بولات, «قازاقمىس كورپوراتسياسى» جشس 320 مىڭ توننا مىس, «شۇباركول كومىر» اق 11 ملن توننا كومىر وندىرەدى دەپ جوسپارلانىپ وتىر», دەدى ەرلان قوشانوۆ.
سونىمەن قاتار ول «بيزنەستىڭ جول كارتاسى-2020» باعدارلاماسى بويىنشا 183 جوباعا قولداۋ كورسەتىلگەنىن جانە وسى سەكىلدى مەملەكەتتىك قولداۋدىڭ ارقاسىندا 24 ملرد تەڭگە كولەمىندە جەكە ينۆەستيتسيالار جۇمىلدىرىلىپ, 800 جاڭا جۇمىس ورىندارىن قۇرۋ مۇمكىندىگى تۋعانىن تىلگە تيەك ەتتى.
«وبلىستىڭ اۋىل شارۋاشىلىعى سالاسىندا دا جەتىستىكتەر از ەمەس. وبلىس تولىعىمەن ءوزىن نەگىزگى ازىق-ت ۇلىك تۇرلەرىمەن قامتاماسىز ەتىپ وتىر. جانە دە استانا قالاسىنا جىل باسىنان بەرى 16 مىڭ توننا اۋىلشارۋاشىلىق ونىمدەرىن جىبەرىپ, شەتەلگە شىعارىپ, ءوندىرىس كولەمىن 24 پايىزعا ۇلعايتقان», دەدى ول.
وبلىستا سمارت-مەديتسينا بەلسەندى تۇردە ەنگىزىلۋدە. ول ءۇشىن ايماقتىڭ بارلىق اۋرۋحانالارى مەن ەمحانالارى بىرەگەي اقپاراتتىق جەلى قۇرعان. ەرلان قوشانوۆ ەمحانالارعا كەلۋشىلەردىڭ ۇشتەن ءبىر بولىگى دارىگەرگە قارالۋعا جازىلۋ ءۇشىن اقپاراتتىق قىزمەت ءتۇرىن پايدالاناتىنىن اتاپ ايتتى. سونداي-اق ءبىلىم بەرۋ سالاسىندا دا بىرقاتار جۇمىستار اتقارىلىپ, جاڭا مەكتەپتەردىڭ قۇرىلىسى ءجۇرىپ جاتقانىن جەتكىزدى.
ءوڭىر باسشىسىنىڭ سوزىنشە حالىقارالىق ەكسپو-2017 كورمەسىنە قاراعاندى وبلىسىنان 3 مىڭنان اسا ادام كەلىپ قاتىسقان. سونىمەن بىرگە وندىرىستەرىن جەتىلدىرۋ ءۇشىن وبلىستىڭ كاسىپورىندارى حالىقارالىق كورمەدە ۇسىنىلعان جاڭا زەرتتەمەلەردىڭ اراسىنان 31 جوبانى ىرىكتەپ, ولاردى ءارى قاراي جۇزەگە اسىرۋ امالدارىن قاراستىرۋدا. كورمەدە قاراعاندىلىق عالىمدار ۇسىنعان جوبالاردىڭ ىشىنەن ۇشەۋى قولدانىسقا ەنگىزىلگەن. ولار – بيوزگاز قۇرىلعىسى, شاعىن گەس جانە گيدروديناميكالىق جىلىتقىشتار. تاعى 4 جوبا تەستىلەۋ جانە جۇزەگە اسىرىلۋ كەزەڭىندە.
«قازىرگى تاڭدا وزەكتى دە ترەندتى باعىت – جاڭعىرمالى ەنەرگيا كوزدەرىنە قاتىستى دا قاراعاندى ءوڭىرى العا جىلجىپ كەلەدى. وبلىستا جالپى قۋاتتىلىعى 261 مۆت قۇرايتىن 6 جاڭا جاسىل ەنەرگەتيكا نىساندارىنىڭ قۇرىلىسى جوسپارلانعان. ول – 3 كۇن ەلەكتر ستانسالارى, 2 جەل پاركى جانە 1 بيوگاز قۇرىلعىسى», دەدى اكىم.
وبلىس باسشىسى «تۋعان جەر» باعدارلاماسى شەڭبەرىندە ايماقتا جالپى سوماسى 13 ملرد تەڭگەنى قۇرايتىن 400 جوبا جۇزەگە اسىرىلىپ جاتقانىن, ونىڭ ىشىندە 5 ملرد تەڭگە دەمەۋشىلەردىڭ بولگەن قاراجاتى ەكەنىن العا تارتتى.
«رۋحاني جاڭعىرۋدىڭ» جارقىن مىسالى رەتىندە ۇلىتاۋداعى تۋريستىك ينفراقۇرىلىمنىڭ دامۋىن كەلتىرۋگە بولادى. كيەلى مەكەندە قوناق-ورتالىعى مەن ەتنواۋىلدىڭ قۇرىلىسى جوسپارلانىپ وتىر. ال كەلەسى جىلى ۇلىتاۋدا ەتنوفەستيۆال وتەدى, سونداي-اق الەمنىڭ ءتۇرلى ەلدەرىنەن جينالاتىن ارحەولوگتار, گەولوگتار جانە تاريحشىلاردىڭ قاتىسۋىمەن حالىقارالىق سيمپوزيۋم ۇيىمداستىرىلادى دەگەن جوسپار بار», دەدى ەرلان قوشانوۆ.
راۋان قايدار,
«ەگەمەن قازاقستان»
