جيىندى كىرىسپە سوزبەن اشقان حاتشىلىق مەڭگەرۋشىسى نايل ساليموۆ قازاقستان حالقى اسسامبلەياسى ۇلتارالىق تاتۋلىق پەن تۇسىنىستىكتى ورناتۋدىڭ بىرەگەي ينستيتۋتى بولىپ تابىلاتىنىن, ونىڭ ماڭايىنا توپتاسىپ وتىرعان ەتنومادەني بىرلەستىكتەر مەن ۇيىمدار وزدەرىنە جۇكتەلگەن تۇراقتاندىرۋشى, توپتاستىرۋشى رولدەرىن ويداعىداي اتقارىپ كەلە جاتقانىن جەتكىزدى.
بۇگىندە مەملەكەتتىك مەكەمەلەر مەن كاسىپورىنداردا 13 قوعامدىق كەلىسىم كەڭەسى قۇرىلىپ, ادامداردى جۇمىسپەن قامتۋ, تۇرعىن ءۇي-كوممۋنالدىق, جول-كولىك, مەديتسينالىق قىزمەتتەرىن جاقسارتۋ, تاعى باسقا الەۋمەتتىك ماسەلەلەردى شەشۋگە بەلسەندىلىكپەن ارالاسىپ ءجۇر. ودان ءارى ول ءوز سوزىندە «قازاقستان حالقى اسسامبلەياسى تۋرالى» زاڭنىڭ جاڭا رەداكتسياسىنا توقتالىپ, وندا اسسامبلەيا كەڭەسى مۇشەلەرى مەن «قوعامدىق كەلىسىم» كوممۋنالدىق مەملەكەتتىك كاسىپورنىنا قاتىستى ماسەلەلەر ناقتى كورىنىس تاپقانىن اتاپ ءوتتى.
ىسكەر ايەلدەر قاۋىمداستىعىنىڭ ءتورايىمى باقىتجان ساميەۆا جاڭا زاڭ جوباسىندا بارلىق ەتنوستاردىڭ مۇددەلەرىن ءبىر ارناعا توعىستىراتىن اسسامبلەيانىڭ قۇقىقتارى مەن مىندەتتەرىنە قاتىستى ەنگىزىلگەن تولىقتىرۋلاردى قولدايتىنىن, مۇنىڭ ءبارى ەلدىڭ تاعدىرى ءۇشىن جاۋاپكەرشىلىككە نەگىزدەلگەنىن العا تارتىپ, قوعامدىق باقىلاۋ پارمەندىگىن ارتتىرۋدىڭ, وعان جەكەلەگەن ادامداردى, ۇكىمەتتىك ەمەس ۇيىمداردى جۇمىلدىرۋدىڭ ماڭىزدىلىعىنا توقتالدى.
قارجىلاندىرۋعا, وقۋشىلاردى تاماقتاندىرۋعا بايلانىستى ماسەلە قارالعاننان كەيىن قالالىق ءبىلىم ءبولىمى ءوز جۇمىسىن شيراتىپ, كەمشىلىكتەردەن قورىتىندى شىعارعان. دەمەك, وسىنداي ءادىس-تاسىلدەردى جۇيەلى قولدانۋ ارقىلى تۇيتكىلدى پروبلەمالاردى بىرلەسىپ شەشۋ اسسامبلەيانىڭ دا, قوعامدىق كەلىسىم كەڭەستەرىنىڭ دە بەدەلىن ارتتىرادى.
«قىزىلجار سۋ» كاسىپورنى جانىندا جۇمىس ىستەيتىن قوعامدىق كەلىسىم كەڭەسىنىڭ مۇشەسى باۋىرجان ءتاجين ءوز ءىس-تاجىريبەلەرىمەن ءبولىستى. ۇجىمدا جۇمىستىڭ تابىستى, ناتيجەلى بولۋى ەڭ الدىمەن ونداعى ەڭبەك احۋالىنا, الەۋمەتتىك جاعدايعا تىكەلەي بايلانىستى. وسى ورايدا باستامالار مەن جوبالار قولعا الىنىپ, جۇمىسشى-قىزمەتكەرلەر تاراپىنان قولداۋ تاپقان. ىسكەر ديالوگ, اشىق قارىم-قاتىناس, تۇيتكىلدى ماسەلەلەردى بىرلەسىپ شەشۋ عانا العا ىلگەرىلەۋدى, ءوزارا ۇيلەسىمدىلىكتى قامتاماسىز ەتەدى.
وبلىستىق اسسامبلەيا جانىنداعى قوعامدىق كەلىسىم كەڭەسىنىڭ توراعاسى راشيد ناديروۆ ءوز سوزىنە جاس بۋىندى جاقسى داستۇرلەر مەن ومىرشەڭ قۇندىلىقتار رۋحىندا تاربيەلەۋ ماسەلەسىن ارقاۋ ەتتى. ەڭبەك ارداگەرى رايسا پوليششۋك زاڭ جوباسىنا ەنگىزىلگەن وزگەرىستەر مەن تولىقتىرۋلار كوپشىلىك كوڭىلىنەن شىققانىن جەتكىزدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
