كەشتى جازۋشى-دراماتۋرگ راقىمجان وتارباەۆ العى سوزبەن اشىپ, نۇرلان وتەپ ۇلىنىڭ ەلىمىزدىڭ تاۋەلسىزدىگىنە, ساياسي-ەكونوميكالىق دامۋىنا قوسقان ۇلەسىن, مۇناي ونەركاسىبىنىڭ وركەندەۋىنە سىڭىرگەن ەڭبەگى تۋرالى ايتىپ ءوتتى. اسىرەسە ونىڭ ادامي قىرلارىن سيپاتتاپ, ەلدىك ماسەلەلەردى شەشۋدەگى تاباندىلىعىن, ۇتىمدى پىكىرلەرىن, ىسكەرلىگىن باسا ايتتى. ول سونداي-اق قازاقستاننىڭ رەسەيدەگى ەلشىسى ي.تاسماعامبەتوۆتىڭ وسى شاراعا ارنايى جولداعان ىزگى تىلەك-سالەمىن كوپشىلىككە وقىپ بەردى. وندا نۇرلان بالعىمباەۆتاي اسىل ۇلدارىن ۇلىقتاعان ەلدىڭ بۇل ارداقتى ءىسى بىرلىك پەن تىرلىكتى, ەرگە دەگەن قۇرمەتتى بىلدىرەتىنى ايتىلسا, پارلامەنت سەناتىنىڭ توراعاسى ق.توقاەۆ ءوز جەدەلحاتىندا «نۇرلان وتەپ ۇلىنداي قارىمدى قايراتكەردىڭ ەلىنە سىڭىرگەن ەڭبەگى ۇشان-تەڭىز, ول – تاۋەلسىزدىگىمىزدى باياندى ەتۋگە بارىن سالعان, ەلىمىزدىڭ مۇناي سالاسىنىڭ جەدەل جەتىلىپ دامۋىنا ولشەۋسىز ۇلەس قوسقان ناعىز ازامات», دەپ ايرىقشا اتاپ كورسەتىلگەن.
قوناقتارعا قوش كەلدىڭىز ايتقان اتىراۋ وبلىسى اكىمىنىڭ ءبىرىنشى ورىنباسارى س.لۇقپانوۆ ءوڭىر باسشىسىنىڭ سالەمىن جەتكىزىپ, اتىراۋ ايماعى ءۇشىن نۇرلان بالعىمباەۆ مۇنايشىلار اۋلەتىنىڭ بەلدى وكىلى, مايتالمان مۇنايشى, مەملەكەت قايراتكەرى, اسىل ازامات بولىپ قالا بەرەتىندىگىن اتادى. ارىپتەستەرى ۇ.قارابالين مەن ن.شمانوۆ نۇرلان وتەپ ۇلىنىڭ قايراتكەر رەتىندەگى سان قىرىن اشىپ, ماسكەۋدە, شەتەلدەردە العان تاجىريبەسىن ەل مۇناي ونەركاسىبىنىڭ دامۋىنا شەبەر جۇمساعاندىعىن اتاپ ايتتى. ۇزاقباي قارابالين: «نۇرلان بىزگە ءارى باسشى, ءارى اعا, ءارى ارىپتەس رەتىندە ىستىق. ول ۇنەمى تەك جۇمىس بابىندا عانا ەمەس, سالاماتتى ءومىر سالتىن ۇستانۋ, قوعامدىق ماسەلەلەر بويىنشا دا اقىل-كەڭەسىن ايتىپ جۇرەتىن», دەپ ەسكە الدى. ونىڭ جارقىن ىستەرىن بۇگىنگى ءىزباسارلارى ابىرويمەن جالعاستىرىپ كەلە جاتقانىن ايتىپ, «قازمۇنايگاز» ۇك» اق باسقارما توراعاسى س.مىڭباەۆتىڭ جولداما-حاتىن وقىدى. وندا: «قازاق مۇنايىنىڭ باستاۋىندا بالعىمباەۆتار اۋلەتى اتالادى. سونىڭ ىشىندە نۇرلان وتەپ ۇلى سالانىڭ تاۋەلسىزدىك جىلدارىندا وڭ جولعا قويىلۋىنا, قارىشتاپ دامۋىنا ەرەكشە ەڭبەك سىڭىرگەنىن بىلەمىز. ونىڭ جارقىن ءجۇزى ءبارىمىزدىڭ جادىمىزدا ساقتالادى» دەگەن جولدار بار.
سونىمەن قاتار نۇرلان وتەپ ۇلىمەن قويان-قولتىق ارالاسا قىزمەت ەتكەن بەلگىلى مۇنايشىلار مەڭدەش ساليحوۆ, عالياۋسات كەشۋباەۆ قايراتكەر ازاماتتىڭ قازاقستان مۇناي-گاز ونەركاسىبى ءمينيسترى, قازاقستاننىڭ پرەمەر-ءمينيسترى بولىپ تۇرعان كەزىندەگى ىسكەرلىك قابىلەتتەرىن, ەل ىرىسىنىڭ دالاعا شاشىلماۋىنا جانى كۇيىپ ەڭبەك ەتكەنىن ۇلكەن ىنتامەن جەتكىزىپ, ونىڭ قاشاندا تۇتاس مەملەكەتكە ءتيىمدى ۇتىمدى پىكىرلەر ايتىپ, سونى بۇلجىتپاي ورىنداي بىلگەنىن باسا اتاپ ءوتتى. «نۇرلان وتەپ ۇلىنىڭ ەسىمى اتالعان جەردە ءبىز مۇناي كاسىپشىلىگىن قوسا ايتامىز. ويتكەنى سالانىڭ جاڭاشا دامۋى, ينۆەستورلارمەن تىعىز بايلانىس, ءونىمدى ءتيىمدى ءوندىرۋ – ونىڭ جانىن سالىپ كىرىسكەن ىستەرى. قازىرگى مۇناي سالاسىنىڭ دامۋى ءوز كاسىبىنىڭ مايتالمانى ن.بالعىمباەۆ سالعان ىزبەن كەلە جاتىر. وسى شارانى ۇيىمداستىرۋدا دا مۇنايشىلار زور ۇلەس قوستى. سونىڭ ىشىندە ءبىزدىڭ ۇسىنىسىمىزدى قولداعان «قازمۇنايگاز» بارلاۋ ءوندىرۋ» اق باس ديرەكتورى قۇرمانعازى ەسقازيەۆكە العىسىمىزدى بىلدىرەمىز», دەدى ول.
ناعيما اپا دا شارانى ۇيىمداستىرۋشىلارعا راحمەتىن ايتىپ, مۇنايشىلارعا, بارشا قاتىسۋشىلارعا العىسىن ءبىلدىردى. شارا سوڭىندا ر.وتارباەۆتىڭ حالىقارالىق «بايتەرەك» قورىنىڭ توراعاسى ن.بالعىمباەۆ باس كەيىپكەرلەردىڭ ءبىرى بولىپ تابىلاتىن «باس» پەساسىنان ءۇزىندى قويىلدى. سونان كەيىن اقىن, جۋرناليست ب.جەتەكبايدىڭ رەداكتسيالاۋىمەن شىققان «نۇرلان بالعىمباەۆ» اتتى كىتاپتىڭ تۇساۋكەسەرى ءوتتى. كىتاپ ءۇش بولىمنەن تۇرادى. وندا ءومىرى, قىزمەت جولدارى, دوس-جارانداردىڭ ەستەلىكتەرى قامتىلعان. كەش سوڭىندا نۇرلان بالعىمباەۆتىڭ ءومىرى مەن قىزمەت جولدارىنان دەرەكتى فيلم كورسەتىلدى.
قوسۇيىم مۇقاشەۆ
اتىراۋ
