«بالەت. بەكزادا ونەر بەسىگى» دەرەكتى ءفيلمى استانا قالاسىندا 2016 جىلى ەلباسىنىڭ قولداۋىمەن اشىلعان قازاق ۇلتتىق حورەوگرافيا اكادەمياسىنىڭ تىنىس-تىرشىلىگىن سۋرەتتەيدى.
«Qazaqstan» تەلەارناسىنىڭ ديرەكتورى اسقار ءاشىموۆتىڭ ايتۋىنشا, ۇلتتىق ارنا دەرەكتى فيلمدەردىڭ تۇسىرىلىمىنە, ونىڭ ىشىندە دەرەكتى جۋرناليستيكاعا دا ەرەكشە ءمان بەرەدى.
«بيىل بىرنەشە دەرەكتى فيلم تۇسىردىك. ەلىمىزدىڭ تاريحي تۇلعالارى جايلى تۇسىرىلگەن « ۇلى دالا ۇلاعاتى», قازاقستاننىڭ تابيعي ەسكەرتكىشتەرىمەن تانىستىراتىن «كيەلى قازاقستان» جانە تاعى دا بىرنەشە دەرەكتى فيلم جارىق كوردى. بۇگىن سىزدەرگە ۇسىنىپ وتىرعان «بالەت. بەكزادا ونەر بەسىگى» ەلباسىمىزدىڭ يدەياسىمەن جۇزەگە اسقان مادەني نىساندار تۋرالى دەرەكتى فيلمدەر توپتاماسىنىڭ العاشقى تۋىندىسى. وسىنداي بىرەگەي تۋىندىلار جاساۋدى ءارى قاراي جالعاستىرامىز. ماسەلەن, كەلەسى فيلمدەردە نازارباەۆ ۋنيۆەرسيتەت, نازارباەۆ زياتكەرلىك مەكتەپتەرى, «استانا» پرەزيدەنتتىك كاسىبي سپورت كەشەنى سياقتى ت.ب. نىسانداردى نەگىزگە الاتىن بولامىز», دەدى ول.
دەرەكتى ءفيلمنىڭ ءتۇسىرىلىم جۇمىستارى حورەوگرافيا اكادەمياسىندا, تاراز قالاسىنداعى كاميلا ورمانوۆانىڭ شاڭىراعىندا جانە كىشكەنتاي ءاليدىڭ تۋىپ-وسكەن جەرى شىعىس قازاقستان وبلىسىنىڭ گلۋبوكوە اۋىلىندا وتكەن.
جوبانىڭ اۆتورى جانە پروديۋسەرى دينارا ءساتجاننىڭ ايتۋىنشا, ءفيلمنىڭ باستى يدەياسى بالەت ءارتىسى ماماندىعىنىڭ قىر-سىرىن كورسەتۋمەن قاتار, بالالاردىڭ كۇندەلىكتى تۇرمىس-تىرشىلىگىن, سونداي-اق بۇل ماماندىقتىڭ ۇلكەن ەڭبەكقورلىقتى تالاپ ەتەتىنىن جەتكىزۋ بولىپ تابىلادى.
«جالپى ايتقاندا, حورەوگرافيا اكادەمياسىندا تاربيەلەنىپ جۇرگەن كىشكەنتاي كەيىپكەرلەردىڭ كوزىمەن شىنايى جاعدايدى كورسەتكىمىز كەلەدى. ەڭ باستىسى قازاقستاننىڭ تۇكپىر-تۇكپىرىندە تۇراتىن كەز كەلگەن تالانتتى بالا الەۋمەتتىك جاعدايىنا قاراماستان وسى وقۋ ورنىنا ەش كەدەرگىسىز تۇسە الاتىنىن كورسەتۋگە ۇمتىلدىق. دەرەكتى فيلم 21-23 قاراشا ارالىعىندا «Kinopark» كينوتەاترلار جەلىسىنە قاراستى استانا, الماتى, شىمكەنت جانە اقتوبە قالالارىنداعى كينوزالداردا كورسەتىلەتىن بولادى. بارلىق كەلۋشىلەرگە كىرۋ تەگىن. جانە «Qazaqstan» ۇلتتىق تەلەارناسىنان 2 جەلتوقسان كۇنى بەرىلەدى. ودان بولەك, ءبىز بۇل جوبانى باسقا تىلدەرگە دە اۋدارىپ, حالىقارالىق دەرەكتى فيلمدەردىڭ فەستيۆالىنە قاتىستىرعىمىز كەلەدى», دەدى د.ءساتجان.
راۋان قايدار,
«ەگەمەن قازاقستان»
