ء«بىر شاڭىراق استىندا ءوسىپ-ءونىپ, بىلدەي شەنگە بىردەي قول جەتكىزگەن اعايىندى قىزدار شىڭعىس حان جۇرتىنىڭ تاريحىندا بۇرىن-سوڭدى بولماعان» دەپ جازىپ جاتىر موڭعوليالىق اقپارات قۇرالدارى.
پولكوۆنيكتەردىڭ اكەسى قاۋسىلعازى مۇساباي ۇلى پەداگوگيكا عىلىمدارىنىڭ دوكتورى, عالىم ادام. جازعان ەڭبەكتەرى ءدال قازىر قۇرلىق اسىپ, سوناۋ امەريكا مەكتەپتەرىندە وقىتىلىپ ءجۇر. اناسىنىڭ ەسىمى – قايىرنيسا جالەلقىزى. وتباسىندا – ءتورت ۇل, ەكى قىز.
ءۇيدىڭ ۇلكەنى – انارگۇل قاۋسىلعازىقىزى 70-جىلداردىڭ سوڭىندا پەتەربورداعى س.م. كيروۆ اتىنداعى اسكەري-مەديتسينا اكادەمياسىن بىتىرگەن ەكەن. ماماندىعى اسكەري دارىگەر. ۇزاق جىل اسكەري مەديتسينا سالاسىندا قىزمەت اتقارىپ, 1987 جىلى ءوزى وقىعان اكادەميادا كانديداتتىق ديسسەرتاتسياسىن قورعاپ, سوڭىنان ۇلان-باتىرداعى قورعانىس ۋنيۆەرسيتەتىندە مەديتسينا عىلىمدارىنىڭ دوكتورى عىلىمي اتاعىن الىپتى. سونىمەن قاتار وتكەن جىلى انارگۇلگە «ەڭبەك سىڭىرگەن دارىگەر» اتاعى دا بەرىلگەن ەكەن.
ال ەكىنشى پولكوۆنيك انارگۇلدىڭ تۋعان ءسىڭىلىسى جەڭىسگۇل ۇلان-باتىردا كەڭەس وداعى وفيتسەرلەرىنىڭ بالالارى وقيتىن №8 ورىس ورتا مەكتەبىن بىتىرگەن. جيىرما جاسىندا موڭعوليا ىشكى ىستەر مينيسترلىگىنىڭ قاتارداعى بولىمىنە حاتشىلىق قىزمەتكە ىلىككەن قىز ءۇش جىل ىشىندە وفيتسەرلىك قۇرامعا ءوتىپ, «حاتشىلىقتان باستاپ پولكوۆنيككە جەتكەن» اڭىز ادام رەتىندە تاريحتا اتى قالدى.
جەڭىسگۇل 1998 جىلى رەسەي فەدەراتسياسىنىڭ بايىرعى وقۋ ورىندارىنىڭ ءبىرى – رەسەي ىشكى ىستەر مينيسترلىگىنە قاراستى پەتەربور ۋنيۆەرسيتەتىندە دوكتورلىق ديسسەرتاتسيا قورعاپتى. ج.قاۋسىلعازىقىزى ءوزى قىزمەت ەتكەن سالانىڭ جەدەل تەرگەۋ-تەكسەرۋ ءىسى بويىنشا ۇزاق جىل ابىرويلى ەڭبەك ەتىپ, سوڭعى جىلدارى قازاقتار كوپ قونىستانعان باي-ولكە ايماقتىق ىشكى ىستەر باسقارماسىن باسقاردى. قازىر زەينەت دەمالىسىندا.
بەكەن قايرات ۇلى,
«ەگەمەن قازاقستان»
