قمگ ءبو HR-قىزمەتى, ياعني شارانىڭ ۇيىمداستىرۋشىلارى كومپانيانىڭ 13 جىلدىق تاريحى بارىسىندا جيىلعان كوپشىلىككە ايتار تالاي جايتتىڭ بار ەكەنىن ەسكەرسە كەرەك. دامۋدىڭ ءاربىر ساتىسى قىزمەتكەرلەردى قالاي باسقارۋ كەرەك دەيتىن ماسەلەمەن تىكەلەي بايلانىستى ەكەنى دە راس. كومپانيانىڭ كوپتەگەن ادامدارى وسى ۇدەرىستەردى باستان كەشتى جانە كومپانيامەن بىرگە كاسىبي تۇرعىدا دامىدى. فورۋمعا شاقىرىلعان ەلىمىزدىڭ بيلىك ينستيتۋتتارى مەن ءىرى كومپانيالاردا قىزمەت ەتىپ جۇرگەن قوناقتاردىڭ ءوز كەزەڭىندە «قازمۇنايگاز» بارلاۋ ءوندىرۋ» اكتسيونەرلىك قوعامىندا قاناتتارىن قاتايتقانىن ايتساق تا جەتكىلىكتى شىعار. سونىڭ ىشىندە فورۋمعا قاتىسۋشىلار اراسىندا ءماجىلىس دەپۋتاتى تاراس حيتۋوۆ, «قازاقتەلەكوم» اق-تىڭ باس قارجى ديرەكتورى اسحات وزبەكوۆ, «Kazakh Tourism» ۇك» اق باسقارۋ ديرەكتورى مايا ەگىمباەۆا بولدى. ءبىر كەزدە «قازمۇنايگاز» بارلاۋ وندىرۋدە» قىزمەت ەتكەن قازىرگى ۇلتتىق ەكونوميكا ءمينيسترى تيمۋر سۇلەيمەنوۆ بەلگىلى ءبىر سەبەپتەرمەن جيىنعا قاتىسا المادى.
– بۇگىن ءبىزدى قولداۋعا كەلگەن ادامداردىڭ بارلىعى دا ءبىز تۋرالى ەستىپ قانا قويماعان, ءبىزدى بىلەدى دە. مەن بارلىعىڭىزعا دا ۇلكەن قۇرمەتپەن قوش كەلدىڭىزدەر دەمەكپىن جانە وسى باستاماعا ءۇن قوسىپ, فورۋم جۇمىسىنا قاتىسۋدى قابىل العان ارنايى قوناقتارعا العىسىمدى بىلدىرەمىن, – دەدى «قازمۇنايگاز» بارلاۋ ءوندىرۋ» اق اپپارات باسشىسى باۋىرجان اسقاروۆ ءوز سوزىندە.
قمگ ءبو-ءنىڭ قۇرىلعالى بەرگى ءوسۋ, دامۋ ناتيجەسىن كورسەتىپ, فورۋمعا ەلىمىزدىڭ التى ايماعىنان 14 ەنشىلەس جانە تاۋەلدى كومپانيالاردىڭ وكىلدەرى جيىلدى. «ەمبىمۇنايگاز» اق جانە «وزەنمۇنايگاز» اق سىندى نەگىزگى كەن اكتيۆتەرىنەن بولەك كومپانيا «قازگەرمۇناي» بك» جشس, «قاراجانباسمۇناي» اق جانە «پەتروقازاقستان ينك.» جانە كوپتەگەن مۇنايسەرۆيستىك كومپانيالاردىڭ ۇلەستەرىن يەمدەنەدى. بۇگىنگى كۇنى «قازمۇنايگاز» بارلاۋ ءوندىرۋ» ءوز شاڭىراعىنىڭ استىنا 26 مىڭنان استام قىزمەتكەردى بىرىكتىرىپ وتىر جانە مۇنداي وراسان زور ۇجىم ءۇشىن قىزمەتكەرلەردى ءتيىمدى باسقارۋ ۇدەرىسى ارقاشان دا ماڭىزدى.
– ءبىزدىڭ HR-قىزمەتتىڭ بارلىق باستامالارى كومپانيا باسشىلىعىنان قولداۋ تابادى. مەن وسى فورۋمدى وتكىزۋ تۋرالى يدەيانى تولىقتاي قولداعان «قازمۇنايگاز» بارلاۋ ءوندىرۋ» اكتسيونەرلىك قوعامىنىڭ باس ديرەكتورى قۇرمانعازى ەسقازيەۆتىڭ ءسوزىن سىزدەرگە جەتكىزگىم كەلەدى. باس ديرەكتور بۇل فورۋمنىڭ قىزمەتكەرلەردى باسقارۋ سالاسىندا, سونداي-اق كومپانيا توپتارىنىڭ ينتەگراتسيالىق ۇدەرىستەگى ۇستامدارىن نىعايتۋدا تاجىريبە مەن ءبىلىم الماسۋ تۇرعىسىنان ماڭىزدى وقيعا ەكەنىن ايتتى, – دەدى باۋىرجان اسقاروۆ.
فورۋم جۇمىسىن قولداۋ ءۇشىن باس كومپانيا اتىنان قاتىسقان وكىل, ياعني «قازمۇنايگاز» ۇك» اق ادام رەسۋرستارىن باسقارۋ بويىنشا ۆيتسە-پرەزيدەنت سەرىك ابدەنوۆ تە جيىندا اۋديتورياعا ءسوز ارنادى.
فورۋم بارىسىندا «قازمۇنايگاز» ۇلتتىق كومپانياسى مەن «قازمۇنايگاز» بارلاۋ ءوندىرۋ» اراسىندا ارىپتەستىك تۋرالى مەموراندۋمعا قول قويىلدى. اتالمىش قۇجات ارقىلى ەكى كومپانيا دا تاجىريبە الماسۋ مەن جۇمىسشىلاردىڭ بىلىكتىلىگىن كوتەرۋ بويىنشا ەڭ جاقسى تاجىريبەلەردىڭ جوباسىن ۇسىناتىن قىزمەتكەرلەردى باسقارۋ سالاسىندا ەكى جاققا دا ءتيىمدى ارىپتەستىكتى دامىتۋ تۋرالى ويلارىن ءبىلدىردى. وسىعان بايلانىستى تاراپتار ۇجىمدار ءۇشىن تاعىلىمدامالاردىڭ الەۋەتتى مۇمكىندىگىن انىقتاۋعا جانە قاراستىرۋعا دايىن ەكەندىكتەرىن ءبىلدىردى. اتالمىش مەموراندۋم قول قويعان كومپانيالاردىڭ ەنشىلەس جانە تاۋەلدى ۇيىمدارىنا دا تاراتىلادى.
قمگ ءبو دامۋىنىڭ ءاربىر ىرگەلى ساتىسى ماڭىزدى سانالاتىن مامان ماسەلەسىن شەشۋمەن بايلانىستى. كومپانيا قۇرىلعالى بەرى ەڭبەك ەتىپ كەلە جاتقان, قىزمەتكەرلەردى باسقارۋ جانە ەڭبەككە اقى تولەۋ دەپارتامەنتىنىڭ ديرەكتورى ەلميرا كارىموۆا قمگ ءبو تاريحىنىڭ ماڭىزدى كەزەڭدەرى مەن سول كەزەڭدەردە شەشىلۋى ءتيىس بولعان ماسەلەلەر جونىندە جان-جاقتى ايتىپ بەردى. بۇلار – كومپانيانى قۇرۋ, IPO وتكىزۋ, قۇرىلىمدىق وڭتايلاندىرۋ, ەڭبەك ۇجىمدارى مەن كاسىپوداق وكىلدەرىمەن بىرگە ارەكەت ەتۋگە باسىمدىق جاساۋ.
– 2006 جىلى ءبىزدىڭ كومپانيا IPO-عا شىقتى. سول كەزدە ءبىزدىڭ الدىمىزدا KPI, بەنچماركينگ, شەتەلدىك جۇمىس كۇشىن تارتۋ سىندى جاڭا ماسەلەلەر تۇردى. سول كەزدە ءبىز «بەستپراكتيك» دەگەن ءسوزدى تۇڭعىش رەت ەستىدىك, – دەيدى ەلميرا كارىموۆا.
«قازمۇنايگاز» بارلاۋ ءوندىرۋ» بۇل كۇندە قازاقستانداعى ەڭ تابىستى كومپانيالاردىڭ ءبىرى. كومپانيا تابىسىنىڭ سىرى قىزمەتكەرلەردى جىگەرلەندىرۋ مەن ولاردىڭ كاسىبي الەۋەتىن مولىنان جۇزەگە اسىرۋدا جاتسا كەرەك. كومپانيا تاريحىنىڭ ەڭ قولايسىز كەزەڭدەرىندە دە ادام رەسۋرستارىن ساقتاۋ ماڭىزدى ورىندا تۇرعان.
بۇل تۇرعىدا فورۋمدا تانىمدىق پىكىرتالاس تا ءوربىدى. قاتىسۋشىلارعا كومپانيادا داعدارىس جاعدايىندا قىزمەتكەرلەر شتاتىن مەيلىنشە از قىسقارتۋعا باعىتتالعان شەشىم تابۋ ۇسىنىلدى. پىكىرلەر كوپ بولدى. بىرەۋلەر زەينەت جاسىنا كەلىپ قالعان قىزمەتكەرلەرمەن قوشتاسۋدى ۇسىنسا, باسقا بىرەۋلەر جاستاردى ەركىندىككە جىبەرۋدى ۇسىندى. بىزگە جۇمىس ورىندارىن ساقتاۋ ءۇشىن ەڭبەككە اقى تولەۋ قورىن ازايتۋ تۋرالى ءوزارا كەلىسىم جانى بار ۇسىنىس سياقتى كورىندى. قمگ ءبو مۇنايسەرۆيس جوباسى بويىنشا باسقارۋشى ديرەكتور اينۇر شانەنوۆانىڭ سوزىنەن باقساق, مۇنايدىڭ باعاسى 10 دوللارعا تۇسكەن كەزدە دە كومپانيادا جۇمىس ورىندارى ساقتالعان. سونداي-اق قمگ ءبو سوڭعى جىلدارى ەشقانداي دا قىسقارتۋدى بولدىرماۋعا كۇش سالۋدا جانە سونى ورىنداۋدا.
ودان باسقا كومپانيا ءوز قىزمەتكەرلەرىنىڭ ءبىلىم الۋى جانە ولاردى وقىتۋ بارىسىندا دامۋ جوبالارىن بەلسەندى تۇردە ەنگىزۋدە. وسى جازدا قمگ ءبو «شەلل», «ەني» كومپانيالارىمەن جانە رەسەيدىڭ گۋبكين اتىنداعى مۇناي جانە گاز ۋنيۆەرسيتەتىمەن ءبىر ۋاقىتتا ءۇش مەموراندۋمعا قول قويدى. كومپانيالارداعى ارىپتەستەر اراسىندا ءبىلىم باعدارلامالارىنا قاتىستى كوپتەن بەرى ىسكەرلىك ارىپتەستىك ورناعان-دى. مىسالى, رەسەيلىك مۇناي جانە گاز ۋنيۆەرسيتەتىندە «مۇناي-گاز ءىسى» بويىنشا ماگيسترلىك باعدارلاما بويىنشا «ەمبىمۇنايگاز» بەن «وزەنمۇنايگازدىڭ» بەس قىزمەتكەرى ءبىلىم الۋدا. ەندى قول قويىلعان مەموراندۋمنىڭ شەڭبەرىندە وسى كاسىپورىنداردىڭ 115 قىزمەتكەرىن وقىتۋعا ارنالعان ءبىلىم بەرۋ باعدارلاماسى دايارلانۋدا.
«ەني» كومپانياسىمەن دە ارىپتەستىك تاجىريبە بار. وسى جىلى «وزەنمۇنايگازدىڭ» 12 ينجەنەرى جارتى جىل بويى «ەني» كورپوراتيۆتى ۋنيۆەرسيتەتىندە تاعىلىمدامادان ءوتتى. ولار گەولوگيا جانە گەوفيزيكا, ءوندىرۋ جانە بۇرعىلاۋ, مۇناي كەن ورىندارىن ازىرلەۋ, تەحنيكا قاۋىپسىزدىگى سىندى كاسىبي سالالار بويىنشا ءوندىرىس ورىندارىندا بولدى. مەموراندۋم ءبىلىم بەرۋ باعدارلامالارىن جالعاستىرۋدى ۇسىنادى. سونداي-اق قمگ ءبو كومپانيالارى قىزمەتكەرلەرىنە تاجىريبە الماسۋ, وقىتۋ كۋرس-
تارىن جانە مۇمكىن بولعان تاعىلىمدامالاردى ۇيىمداستىرۋ ءۇشىن «شەلل» كومپانياسىمەن ءىس-شارالار جوسپارىن ازىرلەۋ جوسپارلانعان.
قاتىسۋشىلاردىڭ ايتۋى بويىنشا ەكى كۇندىك فورۋم ءبىر دەممەن ءوتتى. ارىپتەستەر ءوز تاجىريبەلەرىمەن ءبولىستى, جاڭا نارسەلەردى ۇيرەندى. قمگ ءبو قىزمەتكەرلەردى باسقارۋ دەپارتامەنتى ءۇشىن بۇل تابىستى جوبالاردىڭ ءبىرى بولماق. مۇنداي باستامالار كومپانيانىڭ ىشكى ومىرىندە بەلسەندىلىك پەن باستاماشىلىقتى كوبىرەك تۋىنداتادى. «جاس ماماندار كۇنى», «ۇزدىك مامان», «دۋبلەر كۇنى» سىندى جوبالاردىڭ كومپانيا ءۇشىن ماڭىزى زور. ولار جاس ارىپتەستەردى وزدەرىنىڭ ەڭ جاقسى قىرلارى مەن قابىلەتتەرىن اشۋعا جىگەرلەندىرىپ, قورىتىندىسىندا كومپانياداعى ولاردىڭ جۇمىسىنىڭ ناتيجەلىلىگى بايقالادى.
– ءبىر جوبانى ەڭ ماڭىزدى نەمەسە ەڭ مىقتى دەپ تانداۋ وتە قيىن. ويتكەنى ءبىزدىڭ جوبالار تۇتاستالا كەلە «كورپوراتيۆتىك مادەنيەت» اتتى بىرەگەي جوبانى قۇرايدى. ءبىز كومپانيادا باسشىلىققا سەنىم, جالپىنىڭ مۇددەسى, قامقور قولدى سەزىنۋ, قىزمەتكەرگە قامقورلىق, سونداي-اق بولاشاققا سەنىم اتموسفەراسىن قالىپتاستىردىق, – دەيدى ەلميرا كارىموۆا.
بۇگىندە HR-قىزمەتى كومپانياداعى كادر ساياساتىنىڭ شەكاراسىن ايتارلىقتاي كەڭەيتكەن. كورپوراتيۆتىك بىرلىك, ۇجىمدى بىرىكتىرۋ, ارىپتەستەردىڭ پسيحولوگيالىق اداپتاتسيادان ءوتۋى, ارىپتەستەردى موتيۆاتسيالاۋ, ءبىلىم بەرۋ – مۇنىڭ ءبارى قىزمەتكەرلەردى ءتيىمدى باسقارۋعا قاتىستى شەڭبەرلى ماسەلەلەر. بۇل قۇزىرەتتىلىكتىڭ ىشىنە كادر ساياساتىن رەتتەۋدىڭ ءبىر بولىگى رەتىندە الەۋمەتتىك قولداۋ دا كىرەتىنى راس.
قمگ ءبو ماتەريالدىق اكتيۆتەرىن ءوز ارەكەتتەرىنىڭ ارتىقشىلىعى رەتىندە باعالايتىن بولسا, ال ادام كاپيتالىن كومپانيانىڭ قۇندىلىعى رەتىندە قاراستىرادى. كومپانيا ءوز ارىپتەستەرىن دۇرىس موتيۆاتسيالاۋ ارقىلى جانە ولاردىڭ كاسىبي الەۋەتىن مولىنان جۇزەگە اسىرۋ ارقىلى جوعارى ناتيجەلەرگە جەتتى دەپ ايتۋعا بولادى.
نۇرسۇلتان سادۋاقاسوۆ
