جىل باسىنان بەرى ەۋروپىشىمدە شىعا باستاعان گازەتتە ساراپتامالىق ماتەريالدارعا باسىمدىق بەرىلدى, ءتول اۆتورلارى مەن كولۋمنيستەرى قالىپتاستى. ءار سالاعا ارنالعان جاڭا ايدارلار مەن ارنايى بەتتەر, تىڭ جوبالار پايدا بولدى.
البەتتە, جاڭا ۋاقىت – ينتەرنەت كەڭىستىگىندەگى مۇمكىندىكتەر كەزەڭى دەپ سيپاتتالعانىمەن ساپالى گازەت كونتەنتى ءالى دە ءداستۇرلى وقىرماننىڭ سۇرانىسىنا يە بولىپ قالا بەرمەك. ويتكەنى قازىر تەحنولوگيانىڭ سونى جەتىستىكتەرى اركىمنىڭ قولىنا ءبىر-ءبىر كامەرا, قولجەتىمدى ينتەرنەت جۇيەسى ارقىلى اقپارات تاراتۋ كەڭىستىگىن «سىيلاپ» وتىر. ارينە, تالعامعا تارازى جوق. دەسە دە سمارتفون مەن گادجەت يەلەرىنىڭ وي-پايىمى تۇتاس رەداكتسيانىڭ, قالىپتاسقان ءداستۇرلى اقپارات قۇرالىنىڭ مىندەتىن ارقالاۋعا قاۋقارسىز. سوندىقتان دا سانالى وقىرمان سەنىمدى اقپارات كوزى رەتىندە ءداستۇرلى مەديانىڭ ونىمدەرىن تۇتىنادى. ويتكەنى ءداستۇرلى مەديا اقپارات تاراتۋ قوعامنىڭ نازارىن اۋدارۋ عانا ەمەس, جۋرناليست الدىنداعى جاۋاپكەرشىلىك ەكەنىن ءجىتى تۇسىنەدى. وسى تۇرعىدا عاسىرعا جۋىق تاريحى بار اعا گازەتتە ورمانداي وقىرماننىڭ ويىنان شىعۋ نيەتىمەن كەرى بايلانىس تەتىكتەرى جۇيەلەنە ءتۇستى. بۇل ءۇشىن وقىرماندارعا گازەتتىڭ كۇندەلىكتى سانىنىڭ ەدەل-جەدەل جەتۋىنىڭ ماڭىزى زور.
«ەگەمەن قازاقستان» گازەتى وسى ۋاقىتقا دەيىن وقىرمان قولىنا نەگىزىنەن جازىلىم ارقىلى جەتكىزىلدى. ايتالىق, گازەتتىڭ بولشەك ساۋداداعى ۇلەسى 1 عانا پايىزدى قۇراعاندىقتان, وقىرمانداردىڭ 99 پايىزى گازەتتى جازىلۋ ارقىلى الاتىن. ال جەكە ساتىلىم «قازپوشتا» بولىمشەلەرى ارقىلى ۇيىمداستىرىلىپ كەلدى. ەندى گازەتتىڭ تارالىم ساياساتى قايتا قارالىپ, كۇندەلىكتى گازەت ءنومىرى تۇراقتى تۇردە بولشەك ساۋداعا شىعارىلاتىن بولدى. ياعني رەداكتسيا مەن تاراتۋ كاسىپورىندارى اراسىندا گازەتتى بولشەك ساۋدادا ساتۋ تۋرالى كەلىسىمگە قول جەتكىزىلدى. ماسەلەن, الداعى ۋاقىتتا «Kazakhstan Today» اگەنتتىگى» جشس-ىنە قاراستى «كاراۆان» دۇڭگىرشەكتەر جەلىسىنىڭ 61 نۇكتەسىندە «ەگەمەن قازاقستان» گازەتى ساتىلىمعا شىعارىلا باستايدى. بۇل دۇڭگىرشەكتەر الماتى قالاسىندا ورنالاسقان. الىپ مەگاپوليستەگى گازەتتىڭ ساتىلىمى حالىققا قىزمەت كورسەتۋ ورتالىقتارىندا دا جۇرگىزىلەتىن بولادى. ناقتى ايتقاندا, «ەۆريكا پرەسس» جشس-مەن بەكىتكەن كەلىسىمشارتقا سايكەس, گازەتتى الماتى قالاسىنىڭ بوستاندىق اۋداندىق جانە اۋەزوۆ اۋداندىق حقو-دان الۋعا بولادى. بۇل مەكەنجايلارعا گازەت 2017 جىلدىڭ 26 قاراشاسىنان باستاپ تۇسە باستايدى. ال استانا قالاسىندا گازەت سارىارقا اۋداندىق جانە الماتى اۋداندىق حقو-دا ساتىلادى. گازەت ساتىلىمىن ۇيىمداستىرۋ باعىتىنداعى جۇمىستار الداعى ۋاقىتتا دا جالعاسىن تابا بەرمەك. جالپى, وتكەن عاسىردىڭ توقسانىنشى جىلدارىنىڭ ورتاسىنان باستاپ گازەتتىڭ جەكە دۇڭگىرشەكتەردە ساتىلۋى كىلت توقتاعاندىقتان, نارىقتىق تەتىكتەر جۇيەسىمەن ساتىلىمعا شىعارىلۋى اراعا شيرەك عاسىر سالىپ قايتادان قولعا الىنىپ وتىر دەۋگە بولادى.
بۇگىندە الەمدەگى دامىعان ەلدەردىڭ اقپاراتتاعى مادەني كەڭىستىگىنە نازار اۋدارساڭىز, مەرزىمدى باسىلىمداردىڭ ءرولى نىعايا تۇسكەنىن اڭداۋعا بولادى. ماسەلەن, جاپونيا يننوۆاتسيالىق تەحنولوگيانىڭ ءتۇرلى بۋىنىن دۇنيەگە الىپ كەلىپ جاتسا دا مەرزىمدى باسپاسوزدەن باس تارتپاعان ەل. ايتالىق, جاپوننىڭ «اساحي شيمبۋن» باسىلىمى 6,2 ميلليون دانا تارالىممەن كۇنىنە 2 مارتە جارىق كورەدى. جاپون ارالدارىندا كۇنىنە ميلليونداعان تارالىممەن وقىرمانعا جول تارتاتىن گازەتتەر تۋرالى كوپتەپ مىسال كەلتىرۋگە بولادى. بۇل گازەت وقۋدىڭ وزىق مادەنيەتى. ءبىزدىڭ مىندەتىمىز دە ەلىمىزدە گازەت وقۋ مادەنيەتىن نىعايتا ءتۇسۋ بولماق. قازىر ايتۋلى ساراپشىلار گازەتتى گازەت كۇيىندە وقۋدىڭ ەلەكتروندى نۇسقاعا قاراعاندا كوز جانارىنا اسەرى, جادىعا جاتتالۋى ەرەكشە بولاتىنىن ايتىپ ءجۇر.
باس باسىلىم وقىرماندارىنىڭ اۋقىمدى بولىگى بيۋدجەت قىزمەتكەرلەرى, ونىڭ ىشىندە ەلىمىزدىڭ تۇكپىر-تۇكپىرىندە ەڭبەك ەتىپ جاتقان مۇعالىمدەر مەن دارىگەرلەر قاۋىمى ەكەنى بەلگىلى. وسى رەتتە وقىرماندار باسىلىم بەتىنەن بارلىق سالاعا قاتىستى اقپاراتقا قانىعا الاتىنىن ايتقىمىز كەلەدى. جىل باسىنان بەرى مەكتەپ پەن بالاباقشا قىزمەتكەرلەرىنىڭ وقۋ ادىستەمەسى مەن بالا تاربيەسىنە ارنالعان ء«تالىم» بەتى, جوعارى ءبىلىم بەرۋ جۇيەسىنە باعىتتالعان ء«بىلىم» بەتى جارىق كورەدى. اتالعان بەتتەر الىستاعى اۋىلدار ءۇشىن جاڭا ءبىلىم جۇيەسىنىڭ جاڭالىقتارى مەن ادىستەمەلەرىنەن حاباردار بولىپ وتىرۋعا جاسالعان مۇمكىندىك رەتىندە باعالانىپ وتىر. سونداي-اق وقۋشىلاردى جاڭا فورماتتاعى ۇلتتىق بىرىڭعاي تەستىلەۋگە دايارلاۋعا كولەمدى ورىن بەرىلدى. وسى ىسپەتتى ورامدى جوبالار ءالى جالعاسىن تابادى. بۇل رەتتە رەداكتسيا ۇجىمى قازاقستان مەن جاھانداعى وزەكتى وقيعالارعا بەيجاي قارامايتىن وزىق ويلى وقىرماندارمەن تىعىز ارىپتەستىك ورناتۋعا مۇددەلى ەكەنىن ەستەرىڭىزگە سالامىز.
