اقپارات جانە كوممۋنيكاتسيالار مينيسترلىگى مەملەكەتتىك قىزمەت كورسەتۋ پروتسەستەرىن ودان ءارى دامىتۋ بويىنشا كەشەندى شارالاردى جۇزەگە اسىرۋدا. مينيسترلىك ەڭ الدىمەن «ەلەكتروندىق ۇكىمەتتىڭ» جانە «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ قىزمەتىن ۇيلەستىرۋ مەن دامىتۋ شارالارىن قولعا الدى.
ۇكىمەت ساعاتىندا ءسوز العان قر اقپارات جانە كوممۋنيكاتسيالار ءمينيسترى داۋرەن اباەۆ جاقىندا استانادا مەملەكەتتىك قىزمەتتەردى تولىقتاي اۆتوماتتاندىرىلعان رەجيمدە ورىندايتىن digital-حقكو ورتالىعى اشىلاتىنىن ايتتى. ءمينيستردىڭ ايتۋىنشا جاڭا تسيفرلىق حالىققا قىزمەت كورسەتۋ ورتالىعىنا ازاماتتار قوعامدىق پۋنكتەر, وزىنە قىزمەت كورسەتۋ سەكتورلارى جانە ارنايى ستەندتەردەگى پلانشەتتەر ارقىلى ەلەكتروندىق وتىنىمدەردى بەرە الادى.
«قازىرگى كەزدە 746 مەملەكەتتىك قىزمەتتىڭ 621-ءى نەمەسە 83 پايىزدان استامىن ازاماتتار مەملەكەتتىك كورپوراتسيا ارقىلى الۋعا قاۋقارلى. ەلىمىز بويىنشا ونىڭ 349 فرونت-كەڭسەسى بار. ولاردا جۇمىس ىستەيتىن 22 مىڭعا جۋىق قىزمەتكەر جىل سايىن 34 ميلليوننان استام قىزمەت كورسەتۋدە», - دەدى داۋرەن اباەۆ.
