بانكتەردەگى قولما-قول اقشا قوزعالىسى بويىنشا كىرىس-شىعىس وپەراتسيالارىنىڭ سوماسىندا دا ءوسىم بايقالادى. وعان كوممەرتسيالىق مەكەمەلەردىڭ قىزمەتتەرى, شەتەل ۆاليۋتاسىن ساتۋدان, جەكە تۇلعالارمەن جاسالاتىن اۋدارىمداردان تۇسكەن سومالاردىڭ كوبەيۋى سەبەپ بولىپ وتىر. ال شىعىس وپەراتسيالارىنىڭ سوماسى زاەمدار, جەكە تۇلعالار اۋدارىمدارىن بەرۋ, ەڭبەكاقى, زەينەتاقى جانە جاردەماقى تولەۋ, بانكوماتتاردى نىعايتۋ ەسەبىنەن ارتتى.
ءوڭىر تۇرعىندارىنىڭ قولما-قول اقشاسىز تولەم جاساۋعا ءمان بەرە باستاعانى بايقالادى. «سونىڭ ناتيجەسىندە كورسەتكىش 52,2 %-عا كوبەيدى جانە 52,9 ملرد تەڭگە سوماسىنا 2,9 ملن ترانزاكتسيا بولدى. بۇل رەسپۋبليكا بويىنشا بارلىق قولما-قول اقشاسىز تولەمدەردىڭ جالپى كولەمىنىڭ 3,2 پايىزى», دەيدى ۇلتتىق بانكتىڭ اتىراۋ فيليالىنىڭ باسشىسى اينۇر كوشەرباەۆا.
وبلىس بويىنشا دەپوزيتتەر 12 %-عا وسكەن. قازىر بانك فيليالدارىنداعى سالىمدار 331,3 ملرد تەڭگە بولدى, بۇل رەسپۋبليكا بويىنشا بانكتەردىڭ دەپوزيتتىك بازاسىنىڭ جالپى كولەمىنىڭ 3%-ى. سونداي-اق نەسيە پورتفەلىنە قاتىستى كورسەتكىشتەردە دە وزگەرىس بار. ءبىر عانا تۇتىنۋشىلىق ماقساتتا بەرىلگەن نەسيەلەر 75,5 پايىزعا ارتىپ وتىر.
«بيىل زاڭدى تۇلعالارعا – 134,9 ملرد تەڭگە, جەكە تۇلعالارعا – 187,7 ملرد تەڭگە نەسيە بەرىلدى.وتكەن جىلدىڭ سايكەس كەزەڭىمەن سالىستىرعاندا ول زاڭدى تۇلعالار بەرەشەكتەرىنىڭ ازايۋى ەسەبىنەن 0,2 %-عا تومەندەدى. زاەمدار زاڭدى تۇلعالارعا ەكونوميكانىڭ ونەركاسىپ, كوتەرمە جانە بولشەك ساۋدا, اۆتوكولىك قۇرالدارىن جوندەۋ سالالارى بويىنشا, جەكە تۇلعالارعا تۇتىنۋ ماقساتىندا بەرىلگەن», دەيدى ا.كوشەرباەۆا.
جالپى, ايماقتا سىرتقى ەكونوميكالىق قىزمەتپەن اينالىساتىن 910 شارۋاشىلىق سۋبەكتىسى ۇلتتىق بانك فيليالىنا تولەم بالانسى بويىنشا ەسەپ تاپسىرادى. جىل باسىنان بەرى قارجىلىق قىزمەتتەردى تۇتىنۋشىلاردىڭ قۇقىقتارىن قورعاۋ ماسەلەلەرى بويىنشا جەكە جانە زاڭدى تۇلعالاردىڭ 125 ءوتىنىشى قارالدى, ونىڭ 105-ءى وبلىس تۇرعىندارىنان تۇسكەن.
باقىتگۇل باباش,
«ەگەمەن قازاقستان»
اتىراۋ
