بۇگىنگى تاڭدا بۇل ورتالىق رەسپۋبليكا بويىنشا بالاماسى جوق تۇڭعىش جوبا بولىپ وتىر. تۇرعىلىقتى حالىق ءۇشىن ماڭىزى زور مەكەمەنىڭ بولاشاقتا الەۋمەتتىك جانە قۇقىقتىق كومەك قاجەت ەتەتىن جاندارعا جاردەمى مول بولماق.
ايتالىق, بۇل ورتالىقتان قىلمىستىق ىسكە كۇدىكتىلەر, تار قاپاستان شىققاندار, پروباتسيا تىزىمىندەگىلەر, از قامتىلعان وتباسىلار, جەتىمدەر مەن مۇمكىندىگى شەكتەۋلى جاندار, وتباسىلىق ءزابىر كورگەن نازىك جاندىلار قاجەتتى كومەك الا الاتىن بولادى.
سالتاناتتى ءراسىم بارىسىندا 6 تاراپ ارىپتەستىك مەموراندۋمعا قول قويدى. بۇدان بىلاي الەۋمەتتىك جانە قۇقىقتىق كومەك كورسەتۋ ورتالىعىنىڭ جۇمىسىنا اۋدان اكىمدىگى, پروكۋراتۋرا, ىشكى ىستەر ءبولىمى, پروباتسيا قىزمەتى, قوعامدىق كەڭەس جانە اۋرۋحانا جاۋاپتى بولماق.
بۇعان دەيىن نۇرا اۋداندىق پروكۋراتۋراسى باسقا دا مۇددەلى ورگاندارمەن بىرلەسىپ, قوعامنىڭ ءالجۋاز توپتار ماسەلەسىندە, جاسوسپىرىمدەر اراسىندا قۇقىق بۇزۋشىلىقتىڭ الدىن الۋ جولىندا اتا-انالار مەن ۇستازداردىڭ باسىن بىرىكتىرىپ, «الەۋمەتتىك ساقشى», «ساقشى اتا-انا» اتتى جوبالاردى جۇزەگە اسىرعان بولاتىن. ەندىگى ۋاقىتتا حالىققا قىزمەت كورسەتۋ ورتالىقتارىندا قۇقىقتىق قىزمەت كورسەتۋ ماسەلەلەرىمەن «سەنىم» ورتالىعى اينالىسپاق.
سالتاناتتى شاراعا اۋدان اكىمى نيقانباي ومارحانوۆ, اۋدان پروكۋرورى بەرىك قاراتاەۆ, اۋداندىق ءىىب باستىعى بەكبولات زەيتوۆ, اۋداندىق قوعامدىق كەڭەس توراعاسى سەيىلحان قوڭىرباەۆ قاتىسىپ, ورتالىقتىڭ الداعى جۇمىسى جايلى ويلارىمەن ءبولىستى.
– «سەنىم» ورتالىعىنىڭ اشىلۋى بۇگىنگى ءومىر تالابى. ەلباسى ن.نازارباەۆتىڭ «100 ناقتى قادام» ۇلت جوسپارىنىڭ 33-قادامىندا بۇگىنگى كۇن تالابىنان تۋىنداپ وتىرعان وزەكتى ماسەلە – باس بوستاندىعىنان ايىرۋ ورنىنان بوساعان جانە سىناقتان ءوتۋ قىزمەتىنە تىركەلگەن ازاماتتاردى الەۋمەتتىك وڭالتۋدىڭ ءتيىمدى جۇيەسىن قالىپقا كەلتىرۋ جايى ايتىلعان. باستالىپ جاتقان بۇل يگى شارا نۇرا اۋدانى ازاماتتارىنىڭ مەملەكەتتىك جانە قۇقىقتىق ورگاندارعا دەگەن سەنىم دەڭگەيىن ارتتىرماق, – دەيدى اۋدان اكىمى.
اتالعان ورتالىق جۇمىسىن باستاعان كۇننەن 15 ازامات قابىلداۋعا كەلىپ, قاجەتتى كەڭەسىن العان. بۇل «سەنىم» ورتالىعىنا دەگەن زور سەنىمدى بىلدىرسە كەرەك.
– اشىلعان ورتالىق قىزمەتى بارلىق مەملەكەتتىك ورگاندارعا بىرلەسىپ, ازاماتتاردىڭ قۇقىقتىق ماسەلەلەرىن شەشۋدە تۇراقتى تۇردە, كەڭ اۋقىمدا الەۋمەتتىك جانە قۇقىقتىق كومەك كورسەتۋ مۇمكىندىگىن بەرەدى. بۇل ورتالىق ارقىلى ەڭ وتكىر الەۋمەتتىك ماسەلەلەر دەر كەزىندە انىقتالىپ, ولاردى شەشۋ جولدارى دەرەۋ قاراستىرىلىپ, كومەك كورسەتىلەتىن بولادى. بۇل ازاماتتارعا الەۋمەتتىك جانە قۇقىقتىق كومەك كورسەتۋ ءتارتىبىن قولجەتىمدى ەتۋ كورىنىسى, – دەيدى نۇرا اۋدانىنىڭ پروكۋرورى بەرىك قاراتاەۆ.
ميراس اسان,
«ەگەمەن قازاقستان»
قاراعاندى وبلىسى,
نۇرا اۋدانى
