كومەك قارجى ForteBank كومەك كارتالارىنا اۋدارىلىپ, كەيىن ونى قىزىل جارتى اي قىزمەتكەرلەرى توتەنشە وقيعالار ورىن العان كەزدە زارداپ شەككەندەرگە ءبولىپ بەرەدى. كومەك سوماسى 67 200 000 تەڭگەنى قۇرايدى. 33 600 000 مولشەرىندەگى العاشقى ترانش 2017 جىلى, ال ەكىنشى ترانش 2018 جىلى اۋدارىلادى. بۇل تۋرالى قازاقستان ءباسپاسوز كلۋبى مالىمدەمە تاراتىپ وتىر.
ءبىر كارتاعا اۋدارىلاتىن سوما 20-30 مىڭ تەڭگە ارالىعىندا بولادى دەپ جوسپارلانۋدا. بۇل قارجىعا تابيعي اپاتتىڭ العاشقى كۇندەرى ەڭ قاجەتتى زاتتاردىڭ بارلىعىن ساتىپ الۋعا بولادى. اتالمىش كومەك مەملەكەت تاراپىنان قابىلداناتىن شارالارمەن قاتار زارداپ شەككەندەرگە كورسەتىلەتىن ءبىرىنشى ماتەريالدىق دەمەۋ بولادى.
اتالمىش قايىرىمدىلىق قورىنىڭ يەسى بولات وتەمۇراتوۆ: «تابيعي اپات سالدارىنان ادامدار باسپاناسىز قالىپ, اس-سۋدان ايىرىلعان كەزدە مەن بۇعان بەي-جاي قاراپ تۇرا المايمىن. قوردىڭ, ForteBank جانە قىزىل جارتى اي قوعامىنىڭ بىرلەسە كۇش جۇمىلدىرۋى ارقاسىندا ءبىز العاشقى گۋمانيتارلىق كومەكتى كورسەتەتىن بولامىز. وسى كوپ تاراپتى باستامامىزدى بيزنەس وكىلدەرى جانە قوعامدىق ۇيىمدار قولدايدى دەپ ۇمىتتەنەمىز» دەدى.
قازاقستان قىزىل جارتى اي قوعامىنىڭ باس ديرەكتورى ەلەنا كيم: ء«بىزدىڭ ۇيىم اپاتتى جاعدايلار كەزىندە ارەكەت ەتۋ جانە زارداپ شەككەندەرگە كومەك كورسەتۋ ىسىندە كوپ جىلدىق تاجىريبە جيناقتاعان. ءبىز حالىقارالىق ماشىقتى قولدانا وتىرىپ, ءوز تەتىكتەرىمىزدى ۇدايى جەتىلدىرىپ وتىرامىز. اتالمىش سەرىكتەستىك اياسىندا دايىندالعان مۇنداي جۇيەنىڭ ارقاسىندا ءبىز تۇرعىندارعا بارىنشا جىلدام ءارى ءتيىمدى تۇردە كومەك كورسەتە الامىز» دەدى.
«ForteBank» اق باسقارما توراعاسى ماعجان اۋەزوۆ تابيعي اپات سالدارىنان تۋىنداعان توتەنشە وقيعالار كەزىندە زارداپ شەككەندەرگە شاپشاڭ ءارى جەدەل تۇردە كومەك كورسەتۋ اسا ماڭىزدى ەكەنى اتاي وتىرىپ, قابىلداناتىن شەشىمدەر تەحنولوگيالىق جاعىنان جوعارى, ناقتى, سەنىمدى ءارى ايقىن بولۋى ءتيىس. بۇگىن قول قويىلعان مەموراندۋمنىڭ كوزدەگەنى ءدال وسى ماقسات دەدى.
«وتكەن جىلدارداعى تاجىريبەدەن تۇيگەنىمىز, قازاقستاندىقتار زارداپ شەككەندەرگە كومەك كورسەتۋدە الدىنا جان سالمايدى, – دەيدى بولات وتەمۇراتوۆ قورىنىڭ ديرەكتورى مارات ايتماعامبەتوۆ.
ايناش ەسالي,
«ەگەمەن قازاقستان».
الماتى
