فورۋم جۇمىسىنا قحر مەملەكەتتىك تۋريزم باسقارماسى توراعاسىنىڭ ورىنباسارى دۋ تسزيان, قر مادەنيەت جانە سپورت مينيسترلىگىنىڭ تۋريزم يندۋسترياسى كوميتەتىنىڭ ءتورايىمى م.مۋرزاماديەۆا, وڭتۇستىك قازاقستان وبلىسىنىڭ اكىمى ج.تۇيمەباەۆ, «Kazakh tourism» ۇلتتىق كومپانياسىنىڭ توراعاسى ر.كۇزەمباەۆ, «اتامەكەن» ۇكپ وكىلدەرى, حالىقارالىق جانە قازاقستاندىق تۋروپەراتورلار, ينۆەستيتسيالىق كومپانيالار, تۋريستتىك اسسوتسياتسيالار مەن شەتەلدىك جانە قازاقستاندىق باق جالپى سانى 500-گە جۋىق ادام قاتىسۋدا.
وڭتۇستىك وڭىرىنە قوش كەلدىڭىزدەر دەگەن وبلىس اكىمى ج.تۇيمەباەۆ وڭتۇستىك قازاقستان وبلىسى بۇگىنگى تاڭدا مىقتى ەكونوميكالىق الەۋەتى بار, تۇراقتى دامىپ كەلە جاتقان ءوڭىر ەكەنىن اتاپ ءوتتى.
«ايماق ورتا ازيا, تاياۋ شىعىس پەن ەۋروپا ەلدەرىن بايلانىستىراتىن جولداردىڭ قيىلىسىندا ورنالاسقان. ناتيجەسىندە – شەكارالىق ساۋدا-ساتتىق پەن ەكسپورتتىق ءوندىرىس وركەندەپ, وبلىسىمىزدىڭ تۋريستىك تارتىمدىلىعى كوبەيىپ, تاماشالاۋعا كەلۋشى تۋريستەر سانى جىل سايىن ءوسىپ كەلەدى. سونداي-اق, ءوڭىرىمىزدىڭ جاعىمدى ينۆەستيتسيالىق ءيميدجى قالىپتاستىرىلىپ, ۇلعايۋدا. ماسەلەن, وتكەن جىلمەن سالىستىرعاندا تۋريستىك نىساندار سانى وبلىستا 31 پايىزعا ءوسىپ, 195-ءتى قۇرادى. ولاردا كورسەتىلگەن قىزمەتتەر كولەمى 43 پايىزعا كوبەيىپ, 1,7 ملرد.تەڭگەگە جەتتى. وسىنىڭ ناتيجەسىندە بيىل وڭتۇستىك قازاقستان وبلىسىنا 128 مىڭ تۋريست كەلسە, بۇل وتكەن جىلمەن سالىستىرعاندا 55 پايىزعا ارتقانىن كورسەتەدى»,-دەدى ج.تۇيمەباەۆ.
سونىمەن قاتار اكىم وڭتۇستىككە كەلۋشى تۋريستەرگە قولايلى جاعداي جاساۋ ماقساتىندا 1, 2 جانە 3 كۇندىك تۋريستىك مارشرۋتتار ازىرلەنىپ, اتالعان مارشرۋتقا 84 تاريحي-مادەني وبەكتىلەر مەن تابيعي ورىندار ەنگىزىلگەنىن جەتكىزدى. سونداي-اق, ول « ۇلى جىبەك جولى ەسكەرتكىشتەرى» اتالىمى بويىنشا 8 ەسكەرتكىش ياعني, ساۋران, تۇركىستان, سيداق, قاراسپان, جۋانتوبە, كۇلتوبە, وتىرار, ءبورجار ەسكەرتكىشتەرى وڭتۇستىك وڭىرىندە ورنالاسقانىن ايتتى.
مادەنيەت جانە سپورت مينيسترلىگى مەن وڭتۇستىك قازاقستان وبلىسى اكىمدىگى ۇيىمداستىرۋىمەن ءوتىپ جاتقان ءىس-شارادا تۋريزم سالاسىنداعى الەۋەتتى جوبالار تانىستىرىلىپ, ولاردى جۇزەگە اسىرۋ جولدارى تالقىلانۋدا. سالا ماماندارىنىڭ باسى قوسىلعان جيىندا سونىمەن بىرگە ۇلى جىبەك جولىندا تۋريزم يندۋسترياسىن دامىتۋدىڭ وزەكتى ماسەلەلەرى مەن جىبەك جولى بويىنداعى تۋريستىك ونىمدەردى دامىتۋ, ءوڭىردىڭ ينۆەستيتسيالىق مۇمكىندىكتەرىن تانىستىرۋ جانە ينۆەستورلاردى تارتۋ جايى قارالماق. سونداي-اق, قاتىسۋشىلار الەۋەتتى سەرىكتەستەرمەن ۆ2ۆ فورماتىندا كەزدەسۋلەرگە قاتىسىپ, وتاندىق جانە حالىقارالىق دەڭگەيدەگى ساراپشىلارمەن سۇحباتتاساتىن بولادى. كەلۋشى قوناقتار سونىمەن بىرگە قازاقستاننىڭ جىبەك جولىنا ارنالعان فوتوكورمە, «Silk Road Fair» تۋريستىك جارمەڭكەسىن تاماشالادى.
