سودان بەرى جولدىڭ بۇل بولىگىنە كۇردەلى جوندەۋ جۇمىستارى جۇرگىزىلمەپتى. وسىنىڭ سالدارىنان قازىرگى جاي-كۇيى وتە مۇشكىل دەۋگە بولادى.
«نۇرلى جول» باعدارلاماسى بويىنشا باستالعان يننوۆاتسيالىق ماڭىزى جوعارى جوبانىڭ اۋقىمىن تەك ءبىر عانا اقتوبە – اتىراۋ ارالىعىمەن شەكتەي سالۋعا بولمايدى. بۇل اۆتوجول قۇرىلىسى رەسەيدىڭ وڭتۇستىك بولىگىندە ورنالاسقان استراحان قالاسىن جالعايتىن ماگيسترالعا بارىپ قوسىلماق. بۇدان ءارى ورتالىق ازيا مەن پارسى شىعاناعى ەلدەرىنە شىعۋعا دا جاڭا مۇمكىندىكتەر اشىلادى. سونىمەن بىرگە «نۇرلى جول» ارقىلى بەلگىلەنگەن جوبا اگلومەراتسيالىق ايماقتان ماڭعىستاۋ باعىتىنا دەيىنگى اۆتوجولدى دا جالعاستىرا الادى.
ء«ىرى مەملەكەتتەر اراسىنداعى ءوزارا ەكونوميكالىق ىنتىماقتاستىق پەن قارىم-قاتىناستار تۇرعىسىنان قاراستىرعاندا, اتالعان اۋقىمدى قۇرىلىس قازاقستاننىڭ قىتايمەن, رەسەيمەن جانە باتىس ەۋروپا ەلدەرىمەن اراسىنداعى تاۋار ءترانزيتىنىڭ كولەمىن 2-3 ەسە وسىرۋگە مۇمكىندىك بەرەدى», دەپ مالىمدەدى ينۆەستيتسيالار جانە دامۋ مينيسترلىگى اۆتوموبيل جولدارى كوميتەتىنىڭ توراعاسى مەرەكە پىشەمباەۆ. «بۇعان قوسا, اتالعان جوبانىڭ الەۋمەتتىك-تۇرمىستىق بايلانىستار مەن قارىم-قاتىناستار ماسەلەسىندەگى ورنى دا ايرىقشا. ياعني جوندەلگەن جول جولاۋشىلار لەگىنىڭ وسە تۇسۋىنە دە قولايلى جاعدايلار تۋعىزادى», دەدى ول ودان ءارى.
«نۇرلى جول» باعدارلاماسىنىڭ شاپاعاتى ايماقتارداعى جەرگىلىكتى كاسىپكەرلىك پەن شاعىن جانە ورتاشا بيزنەستى دامىتۋعا دا تيەتىنى بەلگىلى بولىپ وتىر. ءبىر سوزبەن ايتقاندا, وڭىرلەر ارقىلى وتەتىن جولداردىڭ دامۋى مەن قۇرىلىسى جەرگىلىكتى ازاماتتارعا كەمپينگ, اۆتوسەرۆيس جانە وزگە دە دەمالۋ مەن تاماقتاندىرۋ ورىندارىن سالىپ, تابىس تابۋعا مۇمكىندىك بەرەدى. اتالعان اۆتوموبيل جولىنا كۇردەلى جوندەۋ جۇرگىزۋ بارىسىندا 2000-نان استام ادام جاڭا جۇمىس ورىندارىنا تارتىلادى دەپ كۇتىلۋدە. ولاردىڭ 90 پايىزىن جەرگىلىكتى تۇرعىندار قۇراماق. قۇرىلىس جۇمىستارىنا تۇركيا, ازەربايجان جانە يتاليا ەلدەرىنىڭ كومپانيالارى قاتىسپاق.
ينۆەستيتسيالار جانە دامۋ مينيسترلىگى اۆتوموبيل جولدارى كوميتەتىنىڭ دەرەكتەرىنە سۇيەنسەك, العاشقى كەزەكتەگى «اقتوبە – اتىراۋ» جول بولىگىن قايتا قالپىنا كەلتىرۋگە ازيا دامۋ بانكى, يسلام دامۋ بانكى سەكىلدى حالىقارالىق قارجى ينستيتۋتتارىنىڭ قاراجاتتارى تارتىلماق. ونىڭ جالپى سوماسى 147 ميلليارد تەڭگەنى قۇرايدى. تاعى ءبىر جاعىمدى جايت, جوعارىدا اتالعان ەلدەردىڭ كومپانيالارى وڭىردەگى اتقارۋشى بيلىكپەن جاسالعان ءوزارا كەلىسىمدەرگە سايكەس قۇرىلىس پەن قالپىنا كەلتىرۋ جۇمىستارىنا جەرگىلىكتى قۇرىلىس يندۋسترياسىنىڭ ماتەريالدارى مەن ەڭبەك رەسۋرستارىن پايدالانباق. بۇل بيۋدجەتكە تۇسەتىن قوسىمشا سالىمدار مەن جاڭا جۇمىس ورىندارى كوبەيەدى دەگەن ءسوز.
اتالعان جوبانىڭ بەلگىلەنگەن كەستە مەن مەرزىمگە ساي ورىندالۋىن باقىلاۋ جۇيەسى دا قوسا ويلاستىرىلعان. قۇرىلىس ساپاسىن قاداعالاۋ ءىسى دە وسى قاتاردا تۇر. بۇل مىندەت «قازاۆتوجول» ۇك» اق مەن كورەيالىق «دونسۋنگ» كومپانياسىنىڭ ەنشىسىنە ءتيىپ وتىر. كۇردەلى قۇرىلىس پەن قالپىنا كەلتىرۋ جۇمىستارى 2020 جىلعا دەيىن اياقتالۋعا ءتيىس.
تەمىر قۇسايىن,
«ەگەمەن قازاقستان»
اقتوبە
