ايتسا ايتقانداي, قازىرگى تاڭدا اتالعان مينيسترلىكتىڭ الدىنا زور مىندەتتەر قويىلعان. تامىرىن تەرەڭ جايىپ ۇلگەرگەن بۇلدىرگى ءدىننىڭ زاردابىمەن كۇرەس مول كۇش-جىگەردى تالاپ ەتەدى. اسىرەسە, اسىرەدىنشىل ۋاعىزشىلاردىڭ ارباۋىنا تۇسكەن ورىمدەي جاستاردىڭ بەتىن قايتارۋ وڭايعا تۇسپەي وتىر. ىركىلىسسىز, ۇزدىكسىز تۇردە ساناعا ءسىڭىرىلىپ جاتقان تەرىس ۋاعىزداردىڭ ۋىتى قازىردىڭ وزىندە قوعامدىق, ءتىپتى مەملەكەتتىك قاۋىپسىزدىككە قاتەر توندىرە باستاعانداي. ويتكەنى بۇگىنگى كۇندە تەرىس اعىم سەركەلەرى وزدەرىنىڭ جىمىسقى ماقساتتارىن ىسكە اسىرۋ ءۇشىن اقپاراتتىق تەحنولوگيانى بارىنشا ءتيىمدى پايلاناۋعا ۇمتىلۋدا.
ءدىن ىستەرى جانە ازاماتتىق قوعام مينيسترلىگىنىڭ رەسمي مالىمەتىنە سايكەس, بيىلعى جىلى ءىس-ارەكەتى مەن ساياساتى قولدانىستاعى زاڭدارىمىزعا قايشى كەلەتىن 2,5 مىڭ ينتەرنەت-رەسۋرس انىقتالعان. سونىمەن قاتار اتالعان ۆەدومستۆونىڭ ماماندارى عالامتورداعى 5527 اقپارات رەسۋرسىنا زەرتتەۋ جۇرگىزىپ, 2487 زاڭسىز ماتەريالدى تاپقان. زاڭبۇزۋشىلىقتار انىقتالعان سايتتار بويىنشا جاسالعان ساراپتامالىق قورىتىندىلار اقپارات جانە كوممۋنيكاتسيالار مينيسترلىگىنە اتالعان سايتتاردى بۇعاتتاۋ جانە ءتيىستى تەحنيكالىق شارالارى قابىلداۋ ءۇشىن جىبەرىلگەن.
بۇلدىرگى ءدىن سەركەلەرى ۇيالى تەلەفون ارقىلى دا ارام پيعىلدارىن ىسكە اسىرۋعا ابدەن اككىلەنىپ العانعا ۇقسايدى. جاسىراتىنى جوق, قازىر ءىرى-ءىرى قالالارداعى ۇيالى تەلەفون ساتۋمەن اينالىساتىنداردىڭ كوبى ءبىز ءۇشىن ءداستۇرلى ەمەس ءدىن وكىلدەرى. ءبىر قۋانارلىعى, بۇگىندە ءتارتىپ ساقشىلارى بۇل باعىتتاعى زاڭ بۇزۋشىلىقتاردى اشكەرەلەۋ بارىسىندا بارىنشا باتىل قيمىلداۋدا. بۇعان مىسال رەتىندە وسىدان ءبىراز بۇرىن شىمكەنت قالاسىندا موبيلدىك قۇرىلعىلاردىڭ يدەنتيفيكاتسيالىق كودىن وزگەرتىپ, وعان ەكسترەميستىك سيپاتتاعى اقپاراتتاردى جازىپ, ساتقانداردىڭ قۇرىقتالعانىن ايتساق تا بولادى.
مىنە, قاراپ تۇرساڭىز, تەرىس پيعىلدى اعىم وكىلدەرى وزدەرىنىڭ يدەولوگياسىن تىقپالاۋ ءۇشىن اقپاراتتىق قۇرالدىڭ قاندايىنان بولسا دا باس تارتار ەمەس. ىلگەرىدە ءدىني ادەبيەتتەرگە يەك ارتۋشى ەدى, قازىر ينتەرنەت-رەسۋرستى, ۇيالى بايلانىس تۇرلەرى سەكىلدى كەز كەلگەن اقپارات كوزىن اسقان قوماعايلىقپەن پايدالانۋدا.
بۇلدىرگى اعىمنىڭ بۇگىنگى يدەولوگتارى ادام ساناسىنا شابۋىل جاساۋدى كاسىبي تۇرعىدا مەڭگەرگەن. تەرىس ءىلىمنىڭ تانىمال دەگەن وكىلدەرى تاجىريبەسى از, پىكىرسايىستان حابارى جوق ءوز قۇرباندارىمەن ءسوز تالاسىنا تۇسكەندە يسلام پوستۋلاتتارىن ءوز مۇددەلەرىنە ساي, وزگەشەلەۋ ەتىپ ءتۇسىندىرۋدىڭ شەبەرى بولىپ العان. سونىڭ سالدارىنان, ءتۇپتىڭ تۇبىندە ساناسى ۋلاناتىن ادامدار جالعان ۇستازداردىڭ الگى «وزگەشەلەۋ» تۇجىرىمدارىن جالعانداعى جالعىز عانا اقيقات رەتىندە قابىلداپ جاتادى.
وكىنىشتىسى سول, تەرىس اعىمداعىلاردىڭ يدەولوگياسى مەملەكەت پەن قوعامداعى وسكەلەڭ ۇرپاقتى نىسانا ەتىپ الادى. ال مۇنداي جاعدايدا جەتەكتە كەتكەن جاستار اتالعان يدەولوگيانى جالعاستىرۋشى عانا ەمەس, ونىڭ ماقسات-مۇددەسىن جۇزەگە اسىرۋشىعا دا اينالىپ شىعا كەلەدى. ولار, ءتىپتى زايىرلى مەملەكەتتەردىڭ ساياسي بيلىگىمەن قارۋلى قاقتىعىستارعا بارۋدان دا تايىنبايدى. مىنە, قاۋىپتىڭ كوزى قايدا جاتىر!
جالپى قازاقستان رەسپۋبليكاسىنىڭ زاڭناماسىنا قايشى كەلەتىن ماتەريالدار انىقتالعان جاعدايدا ءدىني ساراپتاما جۇرگىزۋ ەرەجەلەرىنە سايكەس, ونى رەسپۋبليكا اۋماعىندا پايدالانۋعا جانە تاراتۋعا رۇقسات ەتىلمەيدى. بۇل ءىستى كۇشەيتە ءتۇسۋ ءۇشىن, ارينە قولدانىستاعى زاڭدارىمىزدىڭ زامان تالابىنا ساي ساپاسى مەن الەۋەتىن تارازىعا تاعى ءبىر مارتە سالىپ العانىمىز ابزال. نەگىزى, بۇل باعىتتا مينيسترلىك تاراپىنان جۇرگىزىلىپ جاتقان جۇمىستار كوڭىلگە سەنىم ۇيالاتادى. مىسالى, قازىرگى ۋاقىتتا ءدىني قىزمەتتى رەتتەيتىن زاڭناماعا تۇزەتۋلەر ەنگىزۋ جونىندەگى قۇجاتتار ازىرلەنۋ ۇستىندە. ونىڭ نەگىزىندە 9 زاڭعا جانە 2 كودەكسكە جالپى سانى 52 تۇزەتۋ ەنگىزۋ قاراستىرىلعان ەكەن.
ءيا, «اۋرۋ باتپانداپ كىرىپ, مىسقالداپ شىعادى» دەيدى قازاق. ساناعا سىڭگەندى بەزدى العانداي سىلىپ تاستاۋدىڭ اۋرە-سارساڭى مول بولسا دا, بۇل باعىتتاعى ىمىراسىز كۇرەس ءۇزىلىسسىز ءھام ۇزدىكسىز جۇرگىزىلە بەرۋى ءتيىس. ايتپەگەن كۇندە سان سوعىپ, وپىق جەپ قالۋىمىز دا ابدەن مۇمكىن.
قايرات ءابىلدا,
«ەگەمەن قازاقستان»
