تاراتىپ ايتار بولساق, قابىلداۋعا بايلانىستى ءوتىنىمدى Call-ورتالىعىنا (115) قوڭىراۋ شالۋ نەمەسە «115.kz» جانە «egov.kz» پورتالدارى ارقىلى, سونداي-اق جازباشا بەرۋگە بولادى. قابىلداۋعا تىركەۋ پروكۋراتۋرا ورگاندارىنىڭ قۇزىرەتىنە كىرەتىن سۇراقتار بويىنشا جۇرگىزىلەدى. باس پروكۋراتۋرا باسشىلىعى قابىلداۋدى كەمىندە ايىنا ءبىر رەت, وبلىستىق پروكۋراتۋرا باسشىلىعى اپتاسىنا ءبىر رەت جۇرگىزەدى. سونىمەن قاتار ەندى وبلىس جانە اۋدان پروكۋرورلارى ءوز قابىلداۋىنا كەلگەندەرگە بەرگەن الدىڭعى جاۋاپتارىنىڭ بولعانىنا قاراماستان, قابىلداۋعا مىندەتتى. ال باسقا قىزمەتكەرلەر, سونىڭ ىشىندە اۋدان پروكۋرورلارى دا قابىلداۋدى قاجەتتىلىك تۋىنداعانىنا بايلانىستى كۇندەلىكتى جۇرگىزەدى. ول ءۇشىن جازىلۋ كەرەك ەمەس.
قابىلداۋعا وكىلەتتىك بەرىلگەن پروكۋراتۋرا ورگاندارىنىڭ قىزمەتكەرلەرى بەكىتىلگەن كەستەلەرگە سايكەس جۇمىس ۋاقىتىندا ساعات 9.00-دەن باستاپ 18.30-عا دەيىن كۇندەلىكتى قابىلدايدى. ىشكى ىستەر ورگاندارىندا, پەنيتەنتسيارلىق جانە ارناۋلى مەكەمەلەردە ازاماتتاردى قابىلداۋدى بەكىتىلگەن كەستە بويىنشا كەزەكشى پروكۋرورلار جۇرگىزەدى. كەستەمەن مەكەمەلەردىڭ عيماراتتارىندا تانىسۋعا بولادى.
ءبىر ەسكەرەتىن جايت, قاجەتتىلىككە قاراي وبلىس پروكۋرورلارى ءوتىنىش بەرۋشىلەردى قابىلداۋدى وزدەرىنىڭ ورىنباسارلارىنا تاپسىرۋى مۇمكىن. العاشقى كەزدەگىدەي, ارىز يەلەرى ءوتىنىشتىڭ قاراۋىنا جەكە قاتىسۋعا جانە قۇجاتتار ۇسىنۋعا قۇقىلى. وبلىستىق جانە اۋداندىق پروكۋراتۋرالاردىڭ قىزمەتكەرلەرى جەكە قابىلداۋدان تۇسكەن وتىنىشتەرگە جاۋاپتى قاناعاتتاندىرۋدان باس تارتۋعا سەبەپ بولعان نەگىزدەردى ءتۇسىندىرىپ, ءوتىنىش بەرۋشىنىڭ جەكە وزىنە تاپسىرادى.
جاڭا قاعيدالاردا باس پروكۋراتۋرا باسشىلىعىنىڭ قابىلداۋىنا جازۋ جۇرگىزىلمەيتىن نەگىزدەر دە كورسەتىلگەن. ماسەلەن, وتىنىشتە كورسەتىلگەن ماسەلە بويىنشا بۇرىن قابىلدانعان نەمەسە تيىسىنشە, باس پروكۋروردىڭ جانە ونىڭ ورىنباسارىنىڭ جاۋابى بار بولعاندا, ەگەر قىلمىستىق-پروتسەستىك كودەكستىڭ 106-بابىنىڭ 1-بولىگىنە سايكەس, ارىزداردىڭ قارالۋى سوتتىڭ قۇزىرەتىنە كىرەتىن بولسا, سونداي-اق سوتقا جولدانعان قىلمىستىق ىستەر بويىنشا, سوت اكتىلەرىنە شاعىم بەرۋ مەرزىمىن وتكىزىپ العان كەزدە, ازاماتتىق پروتسەستىك كودەكستىڭ 54-بابىنىڭ 2-بولىگىمەن كوزدەلمەگەن ىستەر بويىنشا سوت اكتىلەرىن داۋلاعاندا (مىندەتتى ەمەس ساناتتاعى ىستەر بويىنشا), كاسساتسيالىق تارتىپتە قايتا قاراۋعا جاتپايتىن سوت اكتىلەرىنە شاعىمدانعاندا (اپك-ءتىڭ 429-بابىنىڭ 7-بولىگى, 434-بابىنىڭ 2-بولىگى جانە قپك-ءنىڭ 484-بابىنىڭ 2-بولىگى) باس پروكۋراتۋرا باسشىلىعىنىڭ قابىلداۋىنا جازۋ جۇرگىزىلمەيدى.
سونىمەن قاتار باس پروكۋراتۋرا باسشىلىعىنىڭ قابىلداۋىنا ازاماتتاردىڭ قۇقىق قورعاۋ قىزمەتتەرى ورتالىعى ارقىلى جازىلۋىنا مۇمكىندىكتەرى بارىن دا ايتا كەتەيىك. بۇل ورتالىق بيىلعى جىلدىڭ شىلدەسىندە باس پروكۋراتۋرانىڭ عيماراتىندا اشىلعان. ونى اشۋ «100 ناقتى قادام» ۇلت جوسپارىنان تۋىندايتىن مىندەتتەردى ىسكە اسىرۋ اياسىندا جۇزەگە اسىرىلعان بولاتىن. شاعىمداردى جەدەل قاراۋ, ازاماتتاردىڭ قۇقىق قورعاۋ جانە مەملەكەتتىك ورگاندارىنا سەنىمىن ارتتىرۋ, اكىمشىلىك كەدەرگىلەردى جانە بيۋروكراتيانى جويۋ نەگىزگى ماقساتى بولىپ تابىلاتىن اتالعان ورتالىق حقكو- سياقتى جۇمىس جاسايدى. بىراق تەك قۇقىق قورعاۋ ماسەلەلەرىمەن اينالىسادى. ورتالىقتا تاجىريبەلى پروكۋرورلارمەن بىرگە باسقا ورگانداردىڭ وكىلدەرى, ادۆوكاتتار, پروباتسيا قىزمەتى جانە پسيحولوگ ازاماتتاردى قابىلدايدى, زاڭداردىڭ قولدانۋ سۇراقتارى بويىنشا كەڭەس بەرەدى جانە وتىنىشتەردى دايىنداۋعا كومەك كورسەتەدى.
قازىرگى تاڭدا مۇنداي ورتالىقتار اقتوبە مەن قىزىلوردا قالالارىندا قىزمەتىن باستاپ كەتتى. جىلدىڭ اياعىنا دەيىن بارلىق وڭىرلەردە وسىنداي ورتالىقتار اشۋ كوزدەلۋدە.
جولدىباي بازار,
«ەگەمەن قازاقستان»
