كەزدەسۋدە توراعا ورىنباسارى قازاقستان ساۋد ارابياسىن تاياۋ شىعىس وڭىرىندەگى ماڭىزدى ساياسي ءارى ەكونوميكالىق ارىپتەسى رەتىندە سانايتىنىن جانە بارلىق سالالارداعى ىنتىماقتاستىقتى دامىتۋعا مۇددەلى ەكەنىن اتاپ ءوتتى. تاراپتار ەكىجاقتى نەگىزدە جانە پارلامەنتارالىق ۇيىمدار اياسىنداعى پارلامەنتشىلەردىڭ بايلانىستارىن ودان ءارى دامىتۋ جايىن تالقىلادى.
«قازاقستان پرەزيدەنتى ن. نازارباەۆتىڭ وتكەن جىلى قازان ايىندا ساۋد ارابياسىنا جاساعان رەسمي ساپارى ەكى ەل اراسىنداعى قارىم-قاتىناستاردى جاڭا دەڭگەيگە كوتەرۋگە تىڭ سەرپىن بەردى. سونىمەن قاتار ەلباسىنىڭ بيىلعى 21 مامىردا ەر-ريادتا وتكەن بىرىككەن اراب امىرلىكتەرى مەن يسلام ەلدەرىنىڭ سامميتىنە قاتىسۋى قازاقستاننىڭ تەرروريزم مەن ەكسترەميزمگە قارسى كۇرەستە ءوزارا ىنتىماقتاستىقتى نىعايتۋعا دەگەن نيەتىنىڭ دالەلى», - دەدى ب.بەكنازاروۆ.
كەزدەسۋ بارىسىندا ساۋد ارابياسى كورولىنىڭ وركەنيەتارالىق تۇسىنىستىككە باعىتتالعان باستامالارى ەلباسى ن.نازارباەۆتىڭ باستاماسىمەن ءوتىپ كەلە جاتقان, دىنارالىق توزىمدىلىك پەن تۇسىنىستىك ارقىلى حالىقارالىق قاقتىعىستاردىڭ الدىن الۋ جانە شەشۋگە ارنالعان الەمدىك جانە ءداستۇرلى دىندەر ليدەرلەرىنىڭ سەزىنىڭ ماقساتتارىمەن ۇندەس ەكەنى ايتىلدى. توراعا ورىنباسارى ساۋد تاراپىن كەلەسى جىلى وتەتىن VI سەزدىڭ جۇمىسىنا قاتىسۋعا شاقىردى.
كەزدەسۋ سوڭىندا ساۋد ارابياسى كورولدىگى كونسۋلتاتيۆتىك كەڭەسى دەلەگاتسياسىنىڭ باسشىسى احماد ءال-حامدي ەلىمىزدىڭ قارقىندى دامۋى تۋرالى ايتا كەلىپ, ءتۇرلى سالالاردا ءوزارا ءتيىمدى ارىپتەستىكتى نىعايتۋعا ءازىر ەكەنىن دە اتاپ ءوتتى.
