«قازترانسويل» مەرەيلى داتاعا وراي «كومپانيانىڭ 20 جىلدىعىنا – 20 يگى ءىس» شارالار جوسپارىن بەكىتكەن ەكەن. وندا كاسىپورىن قىزمەتكەرلەرىنىڭ بارلىق توبى مەن ولاردىڭ بالالارى, جاس ماماندار, تاجىريبەلى كاسىبي قىزمەتكەرلەر مەن ارداگەرلەر, ستۋدەنتتەر مەن بەيىندى جوعارى وقۋ ورىندارى قامتىلعان. ماسەلەن, جاقىندا ماماندار «ۇزدىك مامان-2017» كونكۋرسى ءوتىپ, توپ جارعان ۇزدىكتەر ومبى قالاسىنداعى حالىقارالىق دوداعا قاتىسىپ, ءتۇرلى ماراپاتتارعا يە بولعان. سونداي-اق ق.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ 4-كۋرس ستۋدەنتتەرى اراسىندا «قازترانسويل» اق تاجىريبەسى نەگىزىندە ماگيسترالدى مۇناي قۇبىرلارى جۇيەسىن زەرتتەۋ تاقىرىبىندا بايقاۋ ۇيىمداستىرىلعان. ناتيجەسىندە وقۋ ورنىنىڭ تالانتتى دا تالاپتى ستۋدەنتى دانا جۇرقاباەۆا «وزەن-اتىراۋ-سامارا» مۇناي قۇبىرىنىڭ مودەرنيزاتسياسى» اياسىندا وتكەن عىلىمي جوباسى ءۇشىن باس جۇلدە – «قازترانسويل» اق-قا جۇمىسقا تۇرۋ مۇمكىندىگىنە يە بولدى.
قازان ايىنىڭ ورتاسىندا «قازترانسويل» كومپانياسىنىڭ تاريحىندا تۇڭعىش رەت قازاقستاننىڭ ءار تۇكپىرىندەگى جاس مۇناي قۇبىرى ماماندارى الماتىدا وتكەن جاس ماماندار كەڭەسىنىڭ فورۋمىندا باس قوسىپتى. ون بەس قۇرىلىمدىق بولىمشەدەن جيىلعان 60 قاتىسۋشى ءۇش كۇن بويى اتقارعان جۇمىستارىنا ەسەپ بەرىپ, تاجىريبەلەرىن ورتاعا سالعان. «قازترانسويل» اق جاس ماماندار كەڭەسىنىڭ قۇرىلعانىنا كوپ ۋاقىت بولا قويعان جوق. دەگەنمەن وسى كەزەڭدە كەڭەس كومپانيا قۇرىلىمدارىنداعى 34 جاسقا دەيىنگى مامانداردىڭ باسىن بىرىكتىرىپ, جۇمىسقا كىرىسكەن بۋىننىڭ كاسىپورىنداردا الەۋمەتتىك جانە كاسىبي داعدىعا ۇيرەنۋىنە, بىلىكتىلىگىن ارتتىرۋعا, الەۋمەتتىك جانە تۇرمىستىق ماسەلەلەرىن شەشۋگە وڭ ىقپال ەتىپ كەلەدى. «ماسەلەن, «پەتەرفەلد» ءجودس پەن وپەراتورلىق قىزمەت كورسەتۋ باسقارماسىنىڭ جاس ماماندارى جانات قازبەكوۆ پەن عالىمجان ءابۋوۆ – كومپانيانىڭ 20 جىلدىق نىشانى مەن ۇرانىنىڭ اۆتورى.
شىمكەنت مۇناي قۇبىرى باسقارماسىنىڭ ماس وپەراتورى الەكساندر گاۆريلين – سپورت شەبەرى, سەمسەرلەسۋدەن رەسپۋبليكالىق جانە حالىقارالىق سايىستاردىڭ جۇلدەگەرى. بىلتىر قاڭتاردا ححVIII دۇنيەجۇزىلىك ۋنيۆەرسيادانىڭ اشىلۋ سالتاناتىنا وراي شىمكەنتتە الاۋ الىپ جۇرۋشىلەردىڭ قاتارىندا بولدى. ال پاۆلودار مۇناي قۇبىرى باسقارماسىنىڭ جەتەكشى ينجەنەر-باعدارلاماشىسى ناريمان قابدۋاليەۆ فيلوسوفيا دوكتورى عىلىمي (PhD) دارەجەسىن يەمدەنگەن. سونداي-اق ول ەلەكتروەنەرگەتيك, اۆتوسپورتتان وبلىستىق جانە رەسپۋبليكالىق سايىستاردىڭ بىرنەشە دۇركىن جەڭىمپازى, اۆتوكولىك سپورتى بويىنشا 1-ساناتتى كاسىبي تورەشى, قازاقستان رەسپۋبليكاسى قۇراماسىنىڭ مۇشەسى», دەيدى كەڭەس جەتەكشىسى ءانۋار پەرۋاش.
كاسىپورىن وتاندىق كومپانيالار اراسىندا تاۋارلاردى, جۇمىستار مەن قىزمەتتەردى ساتىپ الۋ كەزىندە جەرگىلىكتى قامتۋدى ارتتىرۋعا بارىنشا قولداۋ بىلدىرۋدە. ماسەلەنىڭ وزەكتىلىگىن ەسكەرە وتىرىپ, ماگيسترالدى مۇناي قۇبىرى بويىنشا ۇلتتىق وپەراتور «قازترانسويل» مەملەكەتتىك دەڭگەيدەگى شارانى قولداۋعا جوعارى جاۋاپكەرشىلىك تانىتۋدا. ۇكىمەت تاراپىنان جەرگىلىكتى بيزنەستى دامىتۋداعى تيىمدىلىكتى جوعارىلاتۋ اياسىندا مۇناي-گاز سالاسىنداعى ءىرى تاپسىرىس بەرۋشىلەرگە ناقتى ماقساتتار قويىلدى. كومپانيا وسى كەشەندى مەجەگە قول جەتكىزۋدىڭ ايقىن مىسالى بولا الادى. مۇناي قۇبىرىنىڭ ستراتەگيالىق سالاسىندا بۇل باستامالار تولىق قولداۋ تاپقانى قۋانتادى.
ەلىمىزدىڭ كەشەندى دامۋى ءۇشىن جەرگىلىكتى قامتۋدى دامىتۋ جانە ۇلعايتۋ ماسەلەسىنىڭ ماڭىزدىلىعىن ەسكەرگەن كاسىپورىن ساتىپ الۋ ناۋقانىن وتكىزۋ كەزىندە وتاندىق تاۋار وندىرۋشىلەرمەن ىنتىماقتاستىققا باسىمدىق بەرەدى, سول سەكىلدى مۇگەدەكتەر ۇيىمدارىنا قولداۋ كورسەتىپ كەلەدى. «قازترانسويل» ارنايى كيىم وندىرۋشىلەرمەن, تەحنولوگيالىق تۇرعىدان جەڭىل ءونىم جەتكىزەتىن وندىرۋشىلەرمەن, سوعان قوسا ارنايى تەحنيكا, جىلىتۋ پەشتەرى جانە باسقا دا كۇردەلى تەحنيكالىق جابدىقتاردى جەتكىزەتىن قازاقستاندىق تاۋار وندىرۋشىلەرمەن ىنتىماقتاستىق ورناتۋدا.
كومپانيا قىزمەتتەردى كورسەتۋگە جەرگىلىكتى كاسىبي بىلىكتىلىگى جوعارى مامانداردى تارتۋعا تىرىسادى.
قتو ءبىر جاعىنان وتاندىق وندىرۋشىلەردىڭ تاۋارلارىنىڭ ساپاسىنا قويىلاتىن تالاپتاردىڭ ۇيلەسۋىن, ەكىنشى جاعىنان ۇزاق مەرزىمدى كەلىسىمشارتتار جاساۋ ارقاسىندا تەك قانا قازاقستاندىق مۇناي تاسىمالىن قامتاماسىز ەتىپ قانا قويمايدى, سول سەكىلدى قازاقستاندا جاڭا ءوندىرىس ورىندارىنىڭ جولعا قويىلۋىنا ىقپال ەتۋدە.
استانادا وتكەن حالىقارالىق مامانداندىرىلعان ەكسپو-2017 كورمەسى ءىرى وندىرىستىك كومپانيالار ءۇشىن يننوۆاتسيالىق تەحنولوگيالار الاڭىنا اينالدى. شەتەل مەملەكەتتەرىنىڭ تەحنولوگيالارىن قازاقستاننىڭ ەكونوميكاسىنا ارنايى ىرىكتەپ, ەنگىزۋ ءۇشىن ەنەرگەتيكا مينيسترلىگى نەگىزىندە ساراپشىلىق توپ جاساقتالدى. ونىڭ قۇرامىنا «قازترانسويل» اق-تىڭ ءۇش وكىلى كىردى.
جاقىندا بۇل توپ جۇمىس ناتيجەلەرىمەن ءبولىستى. كورمەدە ۇسىنىلعان پاۆيلونداردى سارالاي كەلە 105 جوبا تاڭدالدى, ونىڭ ۇشەۋى كاسىپورىن ماماندارىن قىزىقتىردى. ەنەرگيا رەسۋرسىن ۇنەمدەۋشى تەحنولوگيا ماسەلەلەرى كومپانيا ءۇشىن وزەكتى. ولار كوپ جىلدان بەرى وسى باعىتتاعى تەحنولوگيالار مەن قۇرالداردى وندىرىسكە ەنگىزىپ كەلەدى. ماسەلەن, جيىلىك رەتتەمەلى جەتەكتەردى ەنگىزۋدىڭ ارقاسىندا قۇرىلعى ورنالاسقان نىسانداردا كومپانيا جارىق كوزىن 30 پايىزعا دەيىن ۇنەمدەيدى.
«بۇدان باسقا مۇناي تاسىمالىنىڭ شىعىنىن ازايتۋعا مۇمكىندىك بەرەتىن تۋربۋلەنتتىلىككە قارسى قوسپالاردى قولدانۋ اياسىندا اۋقىمدى جۇمىس اتقارىلدى. ساراپشىلىق توپتىڭ مۇشەلەرى رەتىندە كومپانيا ەكسپو-2017-گە قاتىسۋشى-مەملەكەتتەردىڭ بارلىق پاۆيلوندارىن ارالاپ شىقتى. وندىرىستە قولدانۋعا بولاتىن جىلىتۋ مەن سالقىنداتۋدىڭ ءىرى گەليوجۇيەلەرىنىڭ جەتەكشى الەمدىك جەتكىزۋشىسى, اۋستريالىق Solid كومپانياسىنىڭ تەحنولوگياسى تاڭدالدى. ءبىز Solid وكىلدەرىمەن تاجىريبەلىك سىناقتار جۇرگىزۋدى جانە كەلەشەكتە اتالعان تەحنولوگيالاردى كەڭسەلىك, تۇرعىن جانە وندىرىستىك عيماراتتاردا قولدانۋدى جوسپارلاپ وتىرمىز.
سونداي-اق سلوۆاكيالىق EcoCapsule كومپانياسىنىڭ تەحنولوگيالىق شەشىمدەرىن تاڭداپ الدىق. ول – جەلدىك گەنەراتور مەن فوتوەلەكترلىك پانەلدەرمەن جابدىقتالعان ءموبيلدى تۇرعىن مودۋلدەرىنىڭ ءوندىرۋشىسى. مودۋلدەردى قورشاعان اۋا تەمپەراتۋراسى -50 گرادۋس پەن +50 گرادۋس ارالىعىندا پايدالانۋعا بولادى. ولار مۇناي ءوندىرۋ جانە ماگيسترالدى مۇناي-گاز قۇبىرى نىساندارىن باقىلاۋدىڭ, مونيتورينگ جانە كۇزەتتىڭ ۋاقىتشا نەمەسە تۇراقتى بەكەتتەرىن مونتاجداۋ قاجەت بولعان كەزدە وتە ىڭعايلى», دەيدى «قازترانسويل» اق پايدالانۋ دەپارتامەنتى ديرەكتورىنىڭ ورىنباسارى سەرگەي كوستين.
قتو اۋستريالىق 1stLevelSolar كومپانياسىنىڭ تەحنولوگيالىق شەشىمدەرىن قولدانۋ تۋرالى شەشىم قابىلداعان. كومپانيا ءموبيلدى كۇن ەلەكتر ستانسالارىن شىعارۋمەن اينالىسادى. Sundrops-تى جابدىقتاردى قۋاتتاندىرۋعا جانە كوممۋنيكاتسياسى جوق, قاشىقتا ورنالاسقان نىسانداردىڭ دالا جۇمىستارىن جۇرگىزۋ كەزىندە پايدالانۋعا بولادى. قتو كومپانيا وكىلدەرىمەن بايلانىسقا شىعىپ, بولاشاقتا رەسمي كەزدەسۋلەر وتكىزىپ, نىسانداردا سىنامالار جاساۋ جونىندە شەشىم قابىلدادى.
كورمەدە ەكسپوزيتسيا تۇرىندە ۇسىنىلماعان تەحنولوگيالار دا بولدى. مىسالى, اقش پاۆيلونىندا مۇناي بۋىنىڭ رەكۋپەراتسيا قۇرىلعىسىتس ن شىعاراتىن كومپانيا وكىلدەرى بولدى. كومپانيانىڭ رەزەرۆۋارلىق پاركى اۋقىمدى بولعاندىقتان قورشاعان ورتاعا ەميسسيالاردى تومەندەتۋگە باعىتتالعان تەحنولوگيالاردى ەنگىزۋگە مۇددەلى. «قازترانسويل» اتالمىش كومپانيا وكىلدەرىمەن بىرلەسە قۇرىلعىلاردى تەكسەرىپ باقىلاۋ باعىتىندا جۇمىستار جۇرگىزۋگە ءازىر. ياعني ەكسپو-2017 كورمەسىندە ۇسىنىلعان تەحنولوگيالاردان تاڭدالعان 105 ادىستەن باسقا «قازترانسويل» وندىرىسكە ساي كەلەتىن باسقا دا تەحنولوگيالاردى قاراستىرۋدى جالعاستىرۋدا
اسحات رايقۇل,
«ەگەمەن قازاقستان»
«ەگەمەن قازاقستان» مەن «شەۆروننىڭ» بىرلەسكەن جوباسى
