اۆتورلىق ساندىك قۋىرشاقتار كورمەسىن ۇيىمداستىرۋعا ەجەلگى كورشى رەسەي فەدەراتسياسىنىڭ الماتىداعى باس كونسۋلدىعى مۇرىندىق بولىپ, ەكى ەلدىڭ ەڭ ۇزدىك قۋىرشاقتارىن ءبىر ەكسپوزيتسيالىق زالدا توعىستىردى.
قاس شەبەرلەردىڭ قولىنان شىققان قۋىرشاقتار كورمەسىندە قازاقستاندىق 30 ىسمەردىڭ جۇزگە جۋىق جۇمىسى قويىلسا, رەسەي تاراپىنان 19 ادامنىڭ 55 تۋىندىسى اكەلىندى. بۇل قۋىرشاقتاردىڭ ىشىندە قۇنى ارعىماقتىڭ باعاسىنا پارا-پارى دا بار. ماسەلەن, بۇل – رەسەيدە تاماشا قۋىرشاقتار جاساۋمەن اتى شىققان الەنا ابراموۆانىڭ جۇمىسى. بويى 1 مەتر 20 سم بولاتىن قۋىرشاق اسىل تاستارمەن بەزەندىرىلگەن. ەگەر قۋىرشاقتار جاساۋ مەن جيناۋعا بۇكىل ءومىرىن ارنايتىن جانداردىڭ بار ەكەنىن ەسكەرسەك, قانشا قىمبات بولسا دا, ولاردىڭ يەسى تابىلماي تۇرمايدى. ماسەلەن, الەنا ابراموۆا ءوز جۇمىسىن 3,5 ميلليون تەڭگەگە باعالاپ وتىر.
كورمەگە قويىلعان قۋىرشاقتاردىڭ ىشىندە ورىندالۋى جاعىنان ءتانتى ەتپەي قويمايتىن ەرەكشە تۋىندىلار بار. مىسالى, ەلەنا فيلاتوۆا, ەلەنا نوۆيتسكايا, اناستاسيا سەروگلازوۆا سىندى نيجني نوۆگورود قۋىرشاقشىلارىنىڭ ءتۇرلى سيپاتتاعى جۇمىستارىن قالاي ماقتاساڭ دا جاراسادى. ال قازاقستان شەبەرلەرىنىڭ اراسىنان كاتەرينا كۋروچكينا, روزا سارسەنباەۆا, يرينا سامويلوۆا, اناستاسيا ەليسەەۆا, مارينا كۋرمانوۆا, گالينا كلەاپوۆسكايا, يرينا يتاحۋنوۆانى بولە-جارىپ اتاپ وتۋگە بولادى. ءبىزدىڭ قۋىرشاق جاساۋشىلار الماتى, قاسكەلەڭ, كوكشەتاۋ, سەمەي, زىريان, ريددەر قالالارىنان جينالدى.
كورمەنىڭ ەرەكشە ءبولىمى ء«بىزدىڭ كەڭەس كەزىندەگى بالالىق شاعىمىز» دەپ اتالادى. بۇل ءبولىم جاستىق شاعى كەڭەستىك داۋىرمەن تۇسپا-تۇس وتكەندەر ءۇشىن تارتىمدى وتەدى دەپ كۇتىلۋدە. بۇل كورمەگە كەلگەندەر باياعى پيونەر وتريادتارىنداعىداي بارابان سوعىپ, كەرنەيلەتىپ, تاقپاق ايتىپ, سول كەزەڭنىڭ قۋىرشاقتارىن تاماشالايدى دەپ جوسپارلانعان.
ايناش ەسالي,
«ەگەمەن قازاقستان»
الماتى
