بۇل «قازاقستان» ۇلتتىق ارناسى ارقىلى كورەرمەنگە جول تارتقان «قىزىق ەكەن» باعدارلاماسىنىڭ بىرەر سانىن كورگەننەن كەيىنگى العان اسەرىمىزدەن تۋعان وي. قاتىپ قالعان قاساڭ قاعيدا, قايتالانا بەرەتىن قارابايىر قالىپ ءبارىمىزدى جالىقتىرعالى قاشان. ال «قىزىق ەكەندى» كورگەندە قىزىقتىڭ ىشىنە قالاي كىرىپ كەتكەنىڭىزدى بىلمەي قالاسىز. تانىم كوكجيەگىڭىزدى كەڭەيتەتىن ءتۇرلى ۆيكتورينالىق سۇراقتار وي ورماننىڭ اراسىنا الىپ كەتكەندە «ەەە راسىندا سولاي ەكەن عوي» دەپ تاڭىرقايسىز.
الەمنىڭ ءار تۇكپىرىندە بولىپ جاتقان ءتۇرلى قىزىقتارعا ساياحات جاساپ, ساناڭىزعا مۇلدە كىرىپ شىقپاعان تىڭ اقپاراتقا قانىعاسىز. باعدارلامانىڭ ءبىز بايقاعان باستى ەرەكشەلىگى – ءبىر قالىپپەن شەكتەلىپ قالماي كورەرمەندى سان قىرىنان تارتا بىلۋىندە. ءبىلىم قورجىنىڭىزدى مولايتاتىن اعىل-تەگىل اقپارات, ويلاۋ قابىلەتىڭىزدى ارتتىراتىن لوگيكالىق ساۋالدار, ادەمى استارلى ءازىل, شىعارماشىلىق ەركىندىك, تانىمال تۇلعالاردىڭ وي-ورەسىن كورسەتىپ جاڭا قىرىنان اشۋ سىندى بىرنەشە باعىت ءبىر باعدارلامانىڭ ونە بويىنان تابىلادى. ەڭ باستىسى, بارلىق جاستاعى كورەرمەننىڭ تالعامىنا ساي. جوبانىڭ تابيعاتىنان كەيبىر شوۋ-باعدارلامالارداعىداي شەكتەن تىس ۇساقتىق, ارزان ءسوز, ءاجۋا اڭگىمە كورمەيسىز.
وتاندىق تەلەكەڭىستىكتە كوپتەگەن تۋىندىلارىمەن تانىلعان سەرىك اقىشەۆ جەتەكشىلىك ەتەتىن جوبانى تانىمال تەلەجۇرگىزۋشى راحمان ومار جۇرگىزەدى. باعدارلاما جەلىسى, جۇرگىزۋشىنىڭ ءسوز ساپتاۋى, ستۋديا قوناقتارىمەن تىعىز بايلانىس, ءبارى ادەمى ۇيلەسىم تاپقان. «عالام عاجايىپتارى», «سەن بىلەسىڭ بە؟», «قازاق سپورتى», «تۇلعا», «زەرتتەۋ» سياقتى ءار شىعارىلىم سايىن اۋىسىپ وتىراتىن ايدارلار كوپتەگەن تاريحي دەرەكتەردەن, قىزىقتى جاڭالىقتاردان سىر شەرتەدى.
تەك, ۇلكەن-كىشىنى تەگىس باۋراپ الاتىن حالىققا پايداسى مول تانىمدىق جوبا جۇرتتىڭ ءبارى جۇمىستان قايتىپ وتباسى مۇشەلەرى ەكران الدىنا تۇگەل جينالاتىن كەشكى ۋاقىتتا كورسەتىلسە دەگەن وي مازالايدى. كوپ ءبىلۋ ادامزات ءۇشىن ەڭ اسىل قازىنا دەسەك اتالعان جوبانىڭ نەگىزگى ماقساتى «تال بەسىكتەن, جەر بەسىككە دەيىن ءبىلىم ال» دەگەندى ۇندەيتىندەي. سەبەبى دۇنيەدە ءبىز بىلمەيتىن قىزىقتار مەن قۇپيالار وتە كوپ. بىلۋگە قۇمارتقان جاس ورەندەردى جالىقتىرىپ الماي ءار قىزىقتى اقپاراتتى زامانعا ساي يكەمدەپ جەڭىل ءارى اسەرلى جەتكىزەتىن «قىزىق ەكەن» سياقتى جاڭاشا تۇرپاتتاعى تانىمدىق دۇنيەلەر كوپ بولسا ەكەن دەيسىڭ. ءسىز نە كورىپ ءجۇرسىز كورەرمەن؟
ارمان وكتيابر,
«ەگەمەن قازاقستان»
الماتى
