القالى جيىنعا ساياسي كەڭەس مۇشەلەرى – ۇكىمەتتىڭ, پارلامەنتتىڭ, پرەزيدەنت اكىمشىلىگىنىڭ باسشىلىعى, مەملەكەتتىك حاتشى, «نۇر وتان» پارتياسىنىڭ ماجىلىستەگى فراكتسياسىنىڭ دەپۋتاتتارى, ورتالىق جانە جەرگىلىكتى مەملەكەتتىك ورگانداردىڭ باسشىلارى قاتىستى. وندا ەلىمىزدىڭ ساياسي, ەكونوميكالىق جانە رۋحاني جاڭعىرۋ ۇدەرىستەرى اياسىندا پارتيانىڭ اتقارعان جۇمىسى قورىتىندىلانىپ, ونىڭ قىزمەتىن ءارى قاراي جەتىلدىرۋ ماسەلەلەرى قارالدى.
«بۇگىن ءبىز «نۇر وتان» پارتياسىن جاڭعىرتۋعا قاتىستى ماڭىزدى ماسەلەنى تالقىلايمىز. بيىل «نۇر وتان» پارتياسىنىڭ قۇرىلعانىنا 18 جىل بولادى. بۇل ادام ءومىرىنىڭ ولشەمىندەگى العاشقى كامەلەت جاسى بولىپ سانالاتىنىن بىلەسىزدەر. وسى ۋاقىتتىڭ ىشىندە پارتيامىز شىنىعىپ, شىڭدالىپ, ەلىمىزدەگى ەڭ ۇلكەن ساياسي كۇشكە اينالعانى بەلگىلى. قۇرىلعان كۇننەن باستاپ بارلىق ەلدىك ىستەردىڭ باسى-قاسىندا بولىپ كەلە جاتىر», دەدى كەڭەيتىلگەن وتىرىستىڭ اشىلۋىندا قازاقستان پرەزيدەنتى نۇرسۇلتان نازارباەۆ. سونىمەن قاتار مەملەكەت باسشىسى حالقىمىزدىڭ بەرەكە-بىرلىگىنىڭ ارتۋىنا, ەلىمىزدىڭ ساياسي تۇراقتىلىعىنىڭ نىعايىپ, ەكونوميكالىق رەفورمالاردى تابىستى ىسكە اسىرۋعا دا «نۇر وتان» پارتياسى بەلسەندى اتسالىسىپ كەلە جاتقانىن باسا ايتتى.
«حالىقپەن تىكەلەي جۇمىس ىستەپ, كەزەك كۇتتىرمەي شەشىلۋگە ءتيىستى ماسەلەلەردى ۇنەمى نازاردا ۇستاپ, ناعىز ەلدىك پارتيا اتاندى. وعان وتكەن سايلاۋلارداعى ەلدىڭ زور سەنىمى ايقىن دالەل. سول سايلاۋلارعا بەلسەندى قاتىسقان ءبىزدىڭ پارتيا مۇشەلەرىنىڭ اتقارعان جۇمىسى, جەرگىلىكتى ۇيىمداردىڭ ىستەگەن شارۋاسى ناتيجەسىندە حالىقتىڭ جۇرگىزىپ وتىرعان ساياساتىمىزعا سەنىپ, بىرىڭعاي داۋىس بەرگەنىن كورىپ وتىرمىز. پارتيا بولاشاقتا دا ەلمەن ەتەنە بولىپ, حالىققا قالتقىسىز قىزمەت ەتۋدى جالعاستىرا بەرەدى دەپ سەنەمىن», دەدى پرەزيدەنت.
ەلباسى پارتيا الدىندا ءالى تالاي شارۋا بار ەكەندىگىن دە اتاپ ءوتتى. «قاجەتتى باعدارلامانىڭ بارلىعى قابىلداندى, ونى وزدەرىڭىز دە بىلەسىزدەر. دەگەنمەن قازىرگى جاعدايدا, دۇنيەدەگى عىلىمي-تەحنيكالىق دامۋدىڭ جاڭا سالاسىنا بۇكىل الەم ءتۇسىپ وتىرعان كەزدە ءبىزدىڭ العا قويعان ماقساتتارىمىز از ەمەس. سوندىقتان وسىنىڭ بارلىعىنا پارتيا باسشى بولىپ, جەرگىلىكتى جەرلەردە ساياساتتى ءتۇسىندىرۋى قاجەت», دەدى ن.نازارباەۆ. قازاقستان پرەزيدەنتى پارتيانىڭ ەلىمىزدەگى ستراتەگيالىق رەفورمالاردى ىسكە اسىرۋ جولىنداعى جەتىستىكتەرى مەن اتقارعان جۇمىسىنا توقتالىپ, كۇردەلى ءارى جۇيەلى شەشىمدەر قابىلداۋ قاجەتتىگى جانە ولاردى دايەكتى ىسكە اسىرۋدىڭ ماڭىزدىلىعى جونىندە ايتتى.
«جاڭعىرۋ ەشقاشان وڭاي جۇزەگە اسا قويمايدى. ول كەدەرگىگە دە تاپ بولۋى مۇمكىن. وسى رەتتە, «نۇر وتان» پارتياسى, ەڭ الدىمەن, جاڭعىرۋ باعىتىنا ساياسي قولداۋ كورسەتۋ تەتىكتەرىن قالىپتاستىرۋعا ءتيىس. بيلىك تارماقتارى اراسىنداعى بىرقاتار وكىلەتتىكتەردى قايتا بولۋگە قاتىستى كونستيتۋتسيالىق رەفورما ماسەلەلەرىنە كەلەتىن بولساق, بۇل – ەلىمىزدىڭ ساياسي جۇيەسىن دەموكراتيالاندىرۋ ماقساتىندا جاسالعان ماڭىزدى قادام», دەدى نۇرسۇلتان نازارباەۆ.
ەلباسى «رۋحاني جاڭعىرۋ» باعدارلاماسىن «نۇر وتان» پارتياسىنىڭ قازىرگى يدەولوگيالىق جۇمىسىنىڭ پلاتفورماسى دەپ اتادى. «پارتيا قىزمەتىن جاڭعىرتۋ جونىندە ايتقان كەزدە, ءبىز جاڭعىرۋدىڭ 2017 جىلى جاريالانعان ءۇش باعدارلاماسىن ىسكە اسىرۋ بارىسىندا «نۇر وتان» پارتياسىنىڭ ءرولىن ايقىن ءارى انىق ءتۇسىنۋىمىز كەرەك. وسى باعدارلامالاردى جۇزەگە اسىرۋعا لايىقتى اتسالىسۋ ءۇشىن پارتيا ءوز جۇمىسىن وزگەرتۋدىڭ ناقتى جولدارىن تابۋعا ءتيىس», دەدى مەملەكەت باسشىسى.
قازاقستان پرەزيدەنتى پارتيا قىزمەتىن ودان ءارى جەتىلدىرۋ جونىندە ناقتى ۇسىنىستار ازىرلەۋدىڭ ماڭىزدىلىعىنا نازار اۋدارىپ, پارتيا توراعاسىنىڭ ءبىرىنشى ورىنباسارى مۇحتار قۇل-مۇحاممەدتىڭ ەسەبىن تىڭدادى.
«نۇر وتان» پارتياسى 18 جىل بۇرىن ءوز جۇمىسىن باستاعاندا نە تۇراقتى جۇمىس ىستەيتىن قۇرىلىمدارى, نە وزىنە تيەسىلى عيماراتى, نە قاجەتتى قاراجاتى جوق بولدى. وسى جىلدار ىشىندە ءسىزدىڭ پاراساتتى توراعالىعىڭىزبەن وركەندەپ, ميلليوننان استام مۇشەسى بار, 16 وبلىستىق جانە استانا مەن الماتى قالالىق, 227 اۋداندىق ءارى تەرريتوريالىق, 5824 باستاۋىش ۇيىمداردان تۇراتىن ەلىمىزدىڭ ەڭ ۇلكەن ساياسي پارتياسىنا اينالدى. ءسىز ۇسىنعان ۇلتتىق ستراتەگياعا ساي الەمدەگى ەڭ ۇزدىك پارتيالار جيناقتاعان تاجىريبەلەردى ەسكەرە وتىرىپ, «نۇر وتان» پارتياسى بۇگىندە ينستيتۋتتىق جاعىنان ابدەن تولىستى دەپ نىق سەنىممەن ايتا الامىز.
سوندىقتان قازىرگى كەزەڭدە پارتيا قاتارىنا قابىلداۋ تالابى كۇشەيتىلىپ, وزىنە دە, پارتياعا دا ابىروي اكەلەتىن, ەلگە ءسوزى وتەتىن, جاۋاپكەرشىلىك جۇگىن سەزىنە بىلەتىن بەدەلدى ازاماتتار عانا قابىلدانۋدا», دەدى م. قۇل-مۇحاممەد ەلباسىنا قاراتا ايتقان سوزىندە. وسى ورايدا ول عاسىرلار جۇگىن ارقالاعان ەل تاۋەلسىزدىگىنىڭ ءار جىلى ەرەكشە تاريحي وقيعالارعا تولى بولعانىن, ءۇش بىردەي جاڭعىرۋعا, كونستيتۋتسيالىق رەفورماعا, ەكونوميكاداعى ءۇشىنشى جاڭعىرۋعا, ۇلت رۋحانياتىن جاڭا بيىككە كوتەرگەن «رۋحاني جاڭعىرۋعا» جارقىن جول اشىلعانىن اتاپ ءوتتى.
«وسى ءۇش جاڭعىرۋ جاريالانعان كۇننەن باستاپ, نۇروتاندىقتار پارتيا توراعاسىنىڭ تاريحي باستامالارىن ءار قازاقستاندىقتىڭ جۇرەگىنە جەتكىزۋگە بار كۇش-جىگەرىن جۇمساپ كەلەدى. پارتيانىڭ كۇندەلىكتى جۇمىسىندا رەسپۋبليكا ۇكىمەتىمەن بىرلەسە قابىلدانىپ, 2021 جىلعا دەيىنگى مەرزىمدەگى سايلاۋالدى باعدارلاماسىن ورىنداۋ ءبىرىنشى كەزەكتە تۇر. پارتيانىڭ رەسپۋبليكالىق جەلىلىك كەستەسىنە ساي, جىل باسىنان بەرى 5 ميلليوننان استام ادامدى قامتىعان 85 مىڭعا جۋىق ءىس-شارانىڭ ناتيجەسىندە باعدارلامادا بەلگىلەنگەن مەجەلىك كورسەتكىشتەردىڭ 96 پايىزى بۇگىندە ورىندالدى», دەپ اتاپ ءوتتى مۇحتار قۇل-مۇحاممەد.
قازىرگى كۇنى پارلامەنت ماجىلىسىندەگى پارتيانىڭ فراكتسيالىق قىزمەتى جەتىلدىرىلدى جانە پارتيالىق ءتارتىپ نىعايتىلدى. بيىلعى جىلى دەپۋتاتتار – پارتيا فراكتسياسىنىڭ مۇشەلەرى ماجىلىسكە كەلىپ تۇسكەن 148 زاڭ جوباسىنىڭ 131-ءىن قاراۋ جونىندەگى جۇمىس توپتارىن باسقارعان. 8 زاڭ جوباسىنا باستاماشىلىق جاسالدى, ولاردىڭ تورتەۋى قابىلداندى. پارتيانىڭ مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىن ناسيحاتتاۋ بويىنشا جۇمىسىنا بارلىق پارتيالىق قۇرىلىمدار – باستاۋىش پارتيا ۇيىمدارى, فراكتسيا دەپۋتاتتارى, كونسۋلتاتيۆتى-كەڭەستىك ورگاندار مەن ديالوگ الاڭدارى, ورتالىقتاعى ءارى جەرگىلىكتى قوعامدىق قابىلداۋ بولمەلەرى جۇمىلدىرىلدى.
اقپاراتتىق ىلگەرىلەتۋ مەن جولداۋدىڭ باستى باسىمدىقتارىن ىسكە اسىرۋ پارتيالىق جوبالاردى جۇزەگە اسىرۋ نەگىزىندە ۇيىمداستىرىلدى. جالپى العاندا, 4 ملن ادامدى قامتىعان 46,9 مىڭ ءىس-شارا وتكىزىلگەن. ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن اقپاراتتىق ىلگەرىلەتۋ ماقساتىندا پارتيا بارلىق رەسۋرستار مەن اكتيۆتەردى ىسكە قوستى, جاستاردى, ساراپشىلار مەن زيالى قاۋىمدى تارتا وتىرىپ, ءارتۇرلى ديالوگ الاڭدارىندا جۇمىس جۇرگىزەدى. بۇگىندە «نۇر وتان» پارتياسىنىڭ قاتارىندا 190 مىڭ (29 جاسقا دەيىنگى) جاس قازاقستاندىق بار. «جاس وتان» قىزمەتى 16 ايماقتىق جانە 208 قالالىق ءارى اۋداندىق فيليال, كاسىپورىندارداعى 230 بولىمشە مەن جوو-داعى 96 بولىمشە ارقىلى جۇزەگە اسىرىلادى.
دينارا بىتىك,
«ەگەمەن قازاقستان»
سۋرەتتەر پرەزيدەنتتىڭ ءباسپاسوز
قىزمەتىنەن الىندى
