مۇنى ايتىپ وتىرعانداعى سەبەبىمىز, 1940 جىلدىڭ 13 قاراشاسىندا «قازاق جازۋىن لاتىنداندىرىلعان الىپبيدەن ورىس گرافيكاسى نەگىزىندەگى جاڭا الىپبيگە كوشىرۋ تۋرالى» زاڭ قابىلدانعان بولاتىن. ەندى مىنە, تاۋەلسىز قازاقستاننىڭ تۇڭعىش پرەزيدەنتى نۇرسۇلتان نازارباەۆ «قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى» جارلىققا قول قويدى.
بۇل وتكەن حح عاسىردىڭ نەبىر ناۋبەتتەرىن كوپ كورگەن, زاماننىڭ سوقتىقپالى دا سوقپالى جولدارىنان ءوتىپ, مىڭ ءولىپ, مىڭ تىرىلگەن بۇگىنگى تاۋەلسىزدىك زامانىندا ءومىر ءسۇرىپ وتىرعان قازاق دەگەن حالىقتىڭ ولگەنى ءتىرىلىپ, وشكەنى جانعان كۇن!
لاتىنشا وقۋ دا جانە لاتىنشا جازۋ دا ءبىزدىڭ حالقىمىز ءۇشىن جات ەمەستىگى داۋ تۋدىرمايتىن ماسەلە. لاتىن ءالىپبيىنىڭ پايدا بولىپ, قولدانىلىپ كەلە جاتقاندىعىنا جالپى ءۇش مىڭداي جىل بولسا, سول لاتىنشاڭدى, ياعني لاتىن ءالىپبيى ۇلگىسىندەگى جازۋدى ءبىزدىڭ حالقىمىز 1929 جىلدان باستاپ, 1940 جىلعا دەيىن قولدانىپ كەلگەن-ءدى. سول 1940 جىلدىڭ 13 قاراشاسىندا «قازاق جازۋىن لاتىنداندىرىلعان الىپبيدەن ورىس گرافيكاسى نەگىزىندەگى جاڭا الىپبيگە كوشىرۋ تۋرالى» زاڭ قابىلدانىپ, ءبىز سول ۇردىسپەن كۇنى بۇگىنگە دەيىن ءجۇرىپ كەلەمىز.
ەندىگى ارادا ءالىپبيىمىزدى لاتىن قارپىنە, لاتىن الىپبيىنە كوشىرۋ ەلىمىزدىڭ جانە ءوز ۇرپاعىمىزدىڭ بولاشاعى ءۇشىن جانە بۇكىل الەممەن بىرلەسە تۇسۋىمىزگە, اعىلشىن ءتىلى مەن ينتەرنەت ءتىلىن جەتىك يگەرۋىمىزگە, ەڭ باستىسى, قازاق ءتىلىن جاڭعىرتۋعا جاعداي تۋعىزاتىندىعى باسى اشىق باستى ماسەلە ەكەندىگى بارشا قازاقستاندىقتاردىڭ ساناسىنا ءسىڭدى عوي دەپ ويلايمىن.
لاتىن گرافيكاسىنا كوشۋ ماسەلەسى ءبىر كۇندە عانا تۋىنداعان جوق. وسى ورايدا ەلباسى نۇرسۇلتان نازارباەۆ سوناۋ 2006 جىلى قازاقستان حالقى اسسامبلەياسىنىڭ ءحىى سەسسياسىندا: «قازاق ءالىپبيىن لاتىنعا كوشىرۋ جونىندەگى ماسەلەگە قايتا ورالۋ كەرەك. ءبىر كەزدەرى ءبىز ونى كەيىنگە قالدىرعان ەدىك. ايتسە دە, لاتىن قارپى كوممۋنيكاتسيالىق كەڭىستىكتە باسىمدىققا يە جانە كوپتەگەن ەلدەر, سونىڭ ىشىندە پوستكەڭەستىك ەلدەردىڭ لاتىن قارپىنە كوشۋى كەزدەيسوقتىق ەمەس.
البەتتە, ءبىز بۇل جەردە اسىعىستىققا بوي الدىرماي, ونىڭ ارتىقشىلىقتارى مەن كەمشىلىكتەرىن زەردەلەپ الۋىمىز كەرەك», دەگەنى بار-دى. مىنە, سودان بەرى بۇل ماسەلە قازاقستاندىق قوعامنىڭ ۇدايى نازارىندا بولدى دەسەك تە ارتىق ەمەس. ءتىلشى-عالىمدارىمىز, تاريحشىلارىمىز بەن ادەبيەتشىلەرىمىز, بارلىق قازاقستاندىقتار لاتىن گرافيكاسىن بۇگىنگى زامانعا ساي ءالىپبي ەسەبىندە ەنگىزۋ ءۇشىن قىرۋار ءارى زەردەلى جۇمىستار جۇرگىزدى.
ەلباسى ءوز جارلىعىندا قازاق ءتىلى ءالىپبيىن كيريلليتسادان لاتىن گرافيكاسىنا كوشىرىلۋىن قامتاماسىز ەتۋ ءۇشىن ۇكىمەتكە ناقتىلى تاپسىرمالار بەردى. ەندى ءبىزدىڭ قوعام 2025 جىلعا دەيىن لاتىنشاعا كەزەڭ-كەزەڭىمەن كوشۋدىڭ قامى مەن ارەكەتىن جاساماقشى. ىسكە ءسات, قازاق ەلى! ەلىمىز دە ءتىلىمىز دە ماڭگى جاساسىن!
جابال ەرعاليەۆ,
جازۋشى-دراماتۋرگ,
قازاقستاننىڭ ەڭبەك سىڭىرگەن قايراتكەرى
