«سالاماتتى قازاقستان» پويىزىنىڭ باس دارىگەرى التىن مىرزاحمەتوۆانىڭ ايتۋىنا قاراعاندا, كوپ سالالى دياگوستيكالىق قىزمەتتەرمەن جابدىقتالعان بريگادا بەلوگرادوۆكا, قايرانكول, اقسۋات سەكىلدى وبلىس ورتالىعىنان شالعاي ورنالاسقان ەلدى مەكەندەرگە ايالداپ, ناۋقاستاردىڭ قارالۋىنا بارلىق مۇمكىندىك جاسالعان. قايرانكول ستانساسىندا 200-گە جۋىق ادام دارىگەرلەردىڭ قابىلداۋىنا جازىلعان. اسىرەسە نەۆروپاتولوگ پەن كارديولوگتارعا, ۋزي ماماندارىنا ءوتىنىش بىلدىرۋشىلەر قاراسى قالىڭ بولعان. سول سياقتى پەدياترلار دا بالالاردىڭ دەنساۋلىعىن ءجىتى تەكسەرىپ, ەم-دوم شارالارىن بەلگىلەپ بەردى. مونيتورينگ جۇرگىزۋ بارىسىندا سولتۇستىكقازاقستاندىقتاردىڭ قان قىسىمى, جۇرەك-قان تامىرلارى, قانت ديابەتى اۋرۋلارىنا كوبىرەك شالدىعاتىنى انىقتالعان.
پويىزدا دۋش كابيناسى, ديزەلدى گەنەراتور, جىلجىمالى زاماناۋي قۇرال-جابدىقتار ورناتىلعان. سونداي-اق اۋرۋى اسقىنعان جاندارعا شۇعىل كەڭەس بەرۋ ماقساتىندا ورتالىق كلينيكالارمەن, ينستيتۋتتارمەن بايلانىس جاساۋ جولدارى قاراستىرىلعان.
– اۋدان, وبلىس ورتالىقتارىنا بارۋعا كەز كەلگەن ادامنىڭ شاماسى كەلە بەرمەيدى. ونىڭ ۇستىنە بىلىكتى ماماندار دا تاپشى. سوندىقتان وسىنداي تەگىن مەديتسينالىق ساپارلاردىڭ ءجيى ۇيىمداستىرىلعانىن قالايمىز, – دەيدى اۋىل تۇرعىندارى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
