– اپىرماي, اق جايىق جاستارى مەن ەلباسىنىڭ اراسىندا ءبىز بىلمەيتىن ءبىر بايلانىس, قارىم-قاتىناس بار-اۋ, ءسىرا! – دەپ ازىلدەدى فورۋمنىڭ قۇرمەتتى قوناعى, ساياساتتانۋشى دوس كوشىم ساحناعا شىعىپ تۇرىپ.
دوس كوشىم جاڭا ءالىپبيدى دايىنداۋ بويىنشا قۇرىلعان مەملەكەتتىك كوميسسيا قۇرامىندا بىرنەشە اي ەڭبەك ەتكەنىن, ءالىپبيدىڭ جۇزدەگەن نۇسقاسىن تالقىلاۋعا قاتىسقانىن ايتىپ بەردى.
– ارينە, باستاپقىدا كوز ۇيرەنىپ قالعان كيريلمەن قوشتاسۋ قيىن كورىنەر. قاي رەفورما دا وڭاي ەمەس, سونىڭ ىشىندە تىلدىك رەفورما – ەڭ قيىن ءىس. ءبىزدىڭ الدىمىزدا ۇلكەن جۇمىس ەندى باستالادى. وسى جولدا كەزدەسەتىن قيىندىقتاردى بىرگە جەڭەيىك, – دەدى ساياساتتانۋشى.
– ءبىز بۇگىنگى كۇنگە ۇلكەن دايىندىقپەن كەلدىك. 2012 جىلى پرەزيدەنت لاتىن الىپبيىنە كوشۋ يدەياسى تۋرالى ويدى ورتاعا سالدى. سودان بەرى ءتورت جىل دايىندىق ءجۇردى. لاتىن ءالىپبيىنىڭ العاشقى نۇسقاسىنا كوپشىلىك حالىقتىڭ نارازى پىكىرىن ەسكەرگەن مەملەكەت باسشىسى ءالىپبيدىڭ ەكىنشى نۇسقاسىن ۇسىندى. وسىنىڭ ءبارى بۇل ءىستىڭ ۇلكەن جاۋاپكەرشىلىكپەن, سالماقتاپ, سارالاپ جاسالىپ جاتقاندىعىن كورسەتەدى. شىنى كەرەك, ءالىپبيدىڭ قازىرگى نۇسقاسىنىڭ ءوزىن تۇبەگەيلى شەشىم دەپ ايتۋعا بولمايدى, قاتەسى مەن كەمشىن تۇسىن تۇزەتۋ, جاڭعىرتۋ – الدا تۇرعان ۇلكەن مىندەت. ەڭ ۇلكەن جۇمىس – جاڭا الىپبيگە كەزەڭ-كەزەڭىمەن, قاتەلىك جىبەرمەي ءوتۋ, – دەدى دوس قالماحان ۇلى.
فورۋمنىڭ تاعى ءبىر قوناعى – استانادان كەلگەن جاس عالىم, گۋمانيتارلىق عىلىمدار ماگيسترى ەلدوس توقتاربايدىڭ جالىندى ءسوزى جاستاردىڭ قىزۋ قولداۋىنا يە بولدى.
– ءبىز, وسى زالدا وتىرعان جاستار, ءبىر زاماننىڭ تۋماسىمىز. تاۋەلسىزدىكتىڭ قۇرداسى رەتىندە ءبىز بۇگىن تاريحي كۇندى قارسى الىپ تۇرمىز. ءدال قازىر ونى ءبىز بالكىم, سەزىنبەسپىز. بۇل كۇننىڭ ءمانى مەن ماڭىزى, ءرولى بولاشاقتا ايقىندالادى. ءبىز وسى كۇننىڭ جەمىسىن بولاشاقتا تاتاتىن بولامىز! – دەدى ەلدوس ءنۇسىپ ۇلى.
باتىس قازاقستان وبلىستىق تىلدەردى دامىتۋ باسقارماسىنىڭ ۇيىمداستىرۋىمەن وتكەن فورۋمدا ءسوز العان سپيكەرلەردىڭ بارلىعى مەملەكەتتىك ءتىلدىڭ ماڭىزىن ناقتىلاپ, لاتىن الىپبيىنە قاتىستى ماسەلەدەگى وزەكتى تاقىرىپتاردى تالقىعا سالدى. وڭىرگە بەلگىلى تاريحشى عالىم جاڭابەك جاقسىعاليەۆ, باتىس قازاقستان وبلىستىق «پريۋرالە» گازەتىنىڭ ءتىلشىسى, بلوگەر گالينا سامويلوۆا لاتىن الىپبيىنە كوشۋدى قولداپ پىكىر ءبىلدىردى.
شاراعا قاتىسقان ورىمدەي cتۋدەنتتەر, ءتىلشى ماماندار, عالىمدار, ءبىلىم بەرۋ ۇيىمدارىنىڭ پەداگوگتەرى, مەملەكەتتىك مەكەمە قىزمەتكەرلەرى, كاسىپكەرلەر, ۇكىمەتتىك ەمەس ۇيىمداردىڭ كوشباسشىلارى, قازاقستان حالقى اسسامبلەياسىنىڭ بقو فيليالىنداعى وكىلدەرى, جاستار مەن ءتىل جاناشىرلارى سويلەۋشىلەردىڭ سوزدەرى مەن ۇسىنىستارىن قىزۋ قولداپ, قول شاپالاقتاپ وتىردى.
فورۋم بارىسىندا جاستار وكىلدەرى ەلباسى بەكىتكەن لاتىن ءالىپبيىنىڭ جاڭا نۇسقاسىنىڭ ماڭىزدىلىعىنا توقتالىپ, ونى ءبىراۋىزدان قولداۋ تۋرالى ۇندەۋ جاريالادى.
قازبەك قۇتتىمۇرات ۇلى,
«ەگەمەن قازاقستان»
سۋرەتتى تۇسىرگەن
ايباتىر نۇراش
