– ەرتەڭ ءبىز ءۇشىن ەڭ قيىن ويىنداردىڭ ءبىرى بولماق. سەبەبى ماككابيلىكتەر استانادا كەتكەن ەسەنى قايتارۋعا بىلەك سىبانا كىرىسەتىنى بەلگىلى. ايتكەنمەن, ءبىزدىڭ جىگىتتەر پلەي-وفف كەزەڭىنە شىعۋ ءۇشىن ەرتەڭ جەڭىسكە جەتۋ كەرەكتىگىن جاقسى بىلەدى. سوندىقتان شايقاسقا دايىنبىز.
– ەرتەڭ «ماككابي» ويىنشىلارى بىردەن شابۋىلداۋعا كوشەتىنى ايتپاسا دا تۇسىنىكتى. وسى تاكتيكا ءسىزدىڭ كومانداڭىز ءۇشىن قولايلى بولا ما؟
– «ماككابي» ءوز الاڭىندا ەسە جىبەرمەيتىن كوماندا. استاناداعى جەڭىلىسى ءبىزدى باعالاماعاننان ورىن الدى دەپ ويلايمىن. ايتپەسە, ولار شابۋىلداۋدى جاقسى كورەتىن ۇجىم. ەگەر دە تەپە-تەڭدىكتى ساقتاي وتىرىپ, ناتيجەلى قارىمتا جاۋاپ بەرىپ وتىرساق, ءبىز ءۇشىن وڭ ناتيجە بەرەتىنى ءسوزسىز.
– جەكسەنبى كۇنى «ايجايىقپەن» بولاتىن ويىن ءسىزدىڭ كومانداڭىز ءۇشىن ماڭىزدى ما؟
– ءبىز ءبىرىنشى كەزەكتە قازاقستان چەمپيوناتىن جەڭىپ الۋىمىز كەرەك. سودان كەيىنگى ماقساتىمىز – ەۋروپا ليگانىڭ توپتىق كەزەڭىنەن شىعۋ. ەكى باعىتتا ونەر كورسەتىپ جاتقاندىقتان, جاسىل الاڭدا ءۇش كۇن سايىن ايقاسۋعا تۋرا كەلىپ تۇر. التى ساعات ارى, التى ساعات بەرى ۇشۋ, ەكى كۇننەن كەيىن قايتا جاۋاپتى ماتچقا شىعۋ جىگىتتەرگە اۋىر تيەتىنى ءسوزسىز. ءبىز وزىمىزگە اۋىر جولدى تاڭداپ الدىق. وزىمىزگە جەڭىل بولۋ ءۇشىن «قايراتتان» باسىم ءتۇسىپ چەمپيون اتانۋ كەرەك ەدى. الايدا, سول كۇنى الماتىلىقتاردىڭ جولى بولدى. ەندى جەكسەنبىدە «اقجايىقپەن» وتەتىن ماتچتا دا بارىمىزدى سالىپ وينايمىز. بىراق, ول ەكىنشى ماسەلە. ءبىرىنشى كەزەكتە ەرتەڭگى قيىن ءارى جاۋاپتى كەزدەسۋدە قالاي دا جەڭىسكە جەتۋىمىز كەرەك.
– ەرتەڭ كومانداڭىز قانداي تاكتيكانى قولدانادى؟
– جەڭىسكە جەتۋ ءۇشىن ساۋاتتى قورعانىپ, شابۋىلدى ناتيجەلى اياقتاۋ.
– بىلتىرعى جىلعى ەۋرو دودانىڭ باستى قاھارماندارىنىڭ ءبىرى دجوردجە دەسپوتوۆيچ جاراقاتىنان ەندى ايىعىپ, قاتارعا قوسىلدى. سوڭعى ويىنداردا كومانداعا پايداسىن تيگىزۋگە تالپىنىپ جاتقانى كورىنىپ-اق تۇر. وسى سەرب جىگىتى تۋرالى نە ايتاسىز؟
– ءۇش اي بويى ەمدەلىپ, ەندى عانا قاتارعا قوسىلعان فۋتبولشىدان كوپ ەشتەڭە تالاپ ەتە المايسىڭ. قولىنان كەلسە, دجوردجە كوماندا ءۇشىن ءبىراز ءىس تىندىرا الادى. بىراق, ازىرگە ول ءوزىنىڭ بيىك دەڭگەيىنە جەتە العان جوق.
– نەگىزگى ويىنشىلارىنىڭ ءبىرى يۋري لوگۆينەنكونىڭ كومانداعا كومەكتەسە المايتىنى ءسىزدىڭ جوسپارىڭىزدى وزگەرتپەي مە؟
– يۋري لوگۆينەنكونىڭ قاتاردان شىعىپ قالۋى ءبىز ءۇشىن ۇلكەن پروبلەما. بىراق, ونىڭ ورنىندا توپ تەبەتىن قورعاۋشىلارىمىز بار. سوندىقتان, جوسپارىمىز ەشقانداي وزگەرمەيدى. ەگەر دە كوڭىل-كۇيىمىز, جەڭىسكە دەگەن نيەت بارىنەن بيىك تۇرسا, وندا ءبىز جەڭىسكە جەتۋىمىز ابدەن مۇمكىن.
– ەگەر دە «استانا» جەڭىسكە جەتسە, سەنساتسيا دەپ باعالاۋعا بولا ما؟
– جالپى, ەۋرو دودادا ءاربىر جەڭىسىڭ سەنساتسياعا باعالانادى. ال, ەرتەڭ ءبىز جەڭىسكە جەتسەك, وندا TOP سەنساتسياعا جاتقىزۋعا بولادى.
ەستەرىڭىزگە سالا كەتەيىك, 2 قاراشادا نەتانيا قالاسىندا ۋەفا ەۋروپا ليگاسى توپتىق كەزەڭىنىڭ 4-تۋر اياسىندا «ماككابي» مەن «استانا» كوماندالارى استانا ۋاقىتىمەن 00:00-دە الاڭعا شىعادى.
الماس ماناپ,
«ەگەمەن قازاقستان» –
نەتانيادان (يزرايل)
