– ءبىز مىندەتتى تۇردە جەڭىسكە جەتۋىمىز كەرەك. مەنىڭ كوماندام ويىنعا دايىن. ءبىز قازاقستاندا دەڭگەيىمىزدى تولىق كورسەتە المادىق. بىراق ەرتەڭ كەزدەسۋ باسقاشا جاعدايدا ءوربيدى. كەتكەن ەسەنى قايتارۋعا مۇمكىندىگىمىز تولىق جەتەدى.
– ەكى اپتا بۇرىن «ماككابي» «استانادان» 0:4 ەسەبىمەن جەڭىلۋىنىڭ سەبەبىن نەمەن تۇسىندىرەسىز؟
– قازاقستاندا وتكەن ويىندا «استانا» شابۋىلشىلارى قورعاۋشىلارىمىزدى ابدەن ابىگەرگە ءتۇسىردى. بولماشى گولداردى جىبەرىپ الدىق. بىراق, ەرتەڭ ونداي پروبلەما بولمايتىنىنا سەنىمدىمىن.
– ءىرى جەڭىلىستەن كەيىن, الاڭعا شىعۋ قانشالىقتى قيىن؟
– شىنى كەرەك, ءبىز قازاقستاندا جەڭىلەمىز دەپ ويلاعان جوقپىز. سەبەبى, وتكەن جىلى عانا بىزدە كەلەسى كەزەڭگە وتۋگە تولىق مۇمكىندىگىمىز بولدى. بۇگىندە سول مەجەگە جەتۋگە تالپىنۋدامىز. ايتكەنمەن, ءبىزدىڭ توپتا كىلەڭ مىقتىلار جينالعان. سوعان قاراماستان الدىمىزعا ۇلكەن ماقسات قويىپ وتىرمىز.
– ەرتەڭ جەڭىلىسكە ۇشىراساڭىزدار, سىزدەر ءۇشىن نوكاۋت بولما ما؟
– سول ءۇشىن جەڭىسكە جەتۋىمىز كەرەك. جىگىتتەر ونى جاقسى تۇسىنەدى.
– «استانانىڭ» ارتىقشىلىعى نەدە دەپ ويلايسىز؟
– «استانانىڭ» تاجىريبەلى ويىنشىلارى بار. ونىڭ ۇستىنە قارسىلاس كوماندا جاساندى الاڭعا ابدەن ماشىقتانىپ العان. كەتكەن كەمشىلىكتەر وسى جولى قايتالانباس ءۇشىن جۇمىس جاسادىق. ەرتەڭ – سونىڭ جەمىسىن كورەتىن كەز.
ەستەرىڭىزگە سالا كەتەيىك, 2 قاراشادا نەتانيا قالاسىندا ۋەفا ەۋروپا ليگاسى توپتىق كەزەڭىنىڭ 4-تۋر اياسىندا «ماككابي» مەن «استانا» كوماندالارى جاسىل الاڭعا شىعادى.
الماس ماناپ,
«ەگەمەن قازاقستان» –
نەتانيادان (يزرايل)
