رەبرەندينگتىڭ باستى ماقساتى – كورپوراتسيانىڭ بارلىق قۇرىلىمدارىن زاماناۋي ۇلگىدە دامىتىپ, مازمۇندى, ساپالى جوبالاردى ارتتىرۋ. سونداي-اق, «QAZAQSTAN» كورپوراتسياسىنىڭ قۇرامىنداعى ارنالاردىڭ اتاۋلارى وزگەرىپ, لوگوتيپتەردىڭ تۇستەرى انىقتالدى.
باسقارما توراعاسى ەرلان قاريننىڭ ايتۋىنشا: «بارلىق ارنالاردىڭ لوگوتيپتەرىنە وزگەرىس ەنگىزىپ, ءار ءوڭىردىڭ وزىنە عانا ءتان تابيعي-گەوگرافيالىق اتاۋلارىن قولدانۋدى ءجون كوردىك. مىسالى, بۇرىن «قازاقستان – پاۆلودار», «قازاقستان - قاراعاندى», «قازاقستان – قىزىلوردا» جانە ت.ب بولىپ اتالسا, ەندى «ERTIS», «SARYARQA», «QYZYLORDA» بولىپ وزگەردى. جاڭا ماۋسىم اياسىندا ايماقتىق تەلەارنالاردا بىرقاتار جاڭا باعدارلامالار شىعا باستادى. ستۋديالاردىڭ ديزاينى جاڭارىپ, ءار ءتۇرلى جوبالاردىڭ سانى ارتتى. جالپى, بۇل باستاما ايماقتارداعى تەلەارنالارعا جاڭا لەپ, جاڭا سەرپىلىس قانا بەرىپ قويماي, قازاق تەلەۆيزياسىنىڭ زاماناۋي ۇردىستەرگە بەيىمدەلىپ, ءارى قاراي دامۋىنا جول اشادى».
جاڭا ماۋسىم اياسىندا بارلىق ايماقتاعى تەلەارنالاردى ءار ءتۇرلى باعىتتاعى جالپى سانى 96 باعدارلاما شىعىپ ۇلگەردى. سول باعدارلامالاردىڭ قاتارىندا: ءبىلىم سالاسىنداعى يننوۆاتسيالار مەن رەسپۋبليكالىق, حالىقارالىق وليمپيادالارعا قاتىسىپ, جەتىستىككە جەتكەن جاستار جايلى «ەرتىس ءوڭىرىنىڭ ەرەڭدەرى», قازاقتىڭ ۇلتتىق قولونەرىنە ارنالعان «تالعام مەن تانىم», اۋىل مەن قالانىڭ تىنىس-تىرشىلىگىن سالىستىرا وتىرىپ, ۇمىت بولىپ بارا جاتقان: مال سويۋ, جىلىكتەۋ, تاباق تارتۋ, قىمىز ءپىسىرۋ سياقتى قازاقى تۇرمىستى ناسيحاتتايتىن «بۇك-شىك» جانە باسقا دا كوپتەگەن قىزىقتى جوبالار بار.
ايتا كەتەيىك, وسى جىلدىڭ 28 تامىزىندا, كورپوراتسيانىڭ جاڭا تەلەۆيزيالىق ماۋسىمى اياسىندا «QAZAQSTAN», «BALAPAN», «QAZSPORT» تەلەارنالارى ەلىمىزدىڭ مەملەكەتتىك تۋى تۇستەس ورتاق لوگوتيپپەن بەكىتىلىپ, جاڭا فورماتتا شىققان بولاتىن. ۇلتتىق ارنادا 10-نان استام جاڭا جوبا كورەرمەنگە جول تارتتى. قازاقستاننىڭ كوپشىلىككە بەيمالىم تاريحى تۋرالى باياندايتىن - «كيەلى قازاقستان», ەلىمىزدىڭ ايگىلى ادامدارى جايلى سىر شەرتەتىن - « ۇلى دالا ۇلاعاتى» دەرەكتى فيلمدەرى, حالىقارالىق مۋزىكالىق - «مەن قازاقپىن», «Silk way star» مەگاجوبالارى, تابيعاتتىڭ تىلسىم كۇشى مەن قۇدىرەتىن بەينەلەيتىن - «24 ساعات تابيعات قۇشاعىندا», كاسىپكەرلىكتى ناسيحاتتايتىن - «ۇمىتكەر», سونداي-اق, قوعامدىق-ساياسي, وتباسىلىق قۇندىلىقتاردى دارىپتەيتىن, زاماننىڭ سۇرانىسىنا ساي كەلەتىن رەاليتي - شوۋ جانرىنداعى باعدارلامالار جارىق كوردى.
