وسىنداي وڭىرلەردىڭ ءبىرى بولىپ سانالاتىن قازتالوۆ اۋدانىندا دا تالاي تاريحتىڭ قيلى كەزەڭدەرى وتكەنىن بىرەۋ بىلەر, بىرەۋ بىلمەس. سوناۋ ورتا عاسىرلارعا جاتاتىن قوس وزەننىڭ بويىنان تابىلىپ جاتقان جالپاقتال, سارىوزەن قالالارى بۇعان دالەل بولماق.
سونىڭ ءبىر ايعاعىنداي تاريحي جادىگەرلەر كوپ تابىلىپ جاتقان كوكتەرەك اۋىلدىق وكرۋگىن اتاپ ايتۋعا بولادى. ءبىز اۋدان اكىمى ابات شىنىبەكوۆپەن بىرگە وسى اۋىلدىق وكرۋگكە قاراستى سارالجىن (كيروۆ) اۋىلىنا بارعان ءىسساپارىمىزدا اۋىل توڭىرەگىنەن تابىلعان تاريحي جادىگەرلەردىڭ كۋاسى بولدىق.
سارالجىن اۋىلىنداعى م.ءجۇنىسوۆ اتىنداعى نەگىزگى جالپى ءبىلىم بەرەتىن مەكتەپتە ەلباسىمىزدىڭ ماقالاسىنان تۋىندايتىن «تۋعان جەر» باعدارلاماسىنا وراي, مەكتەپ ۇجىمى اۋىل تاريحىنان سىر شەرتەتىن ولكەتانۋ مۋزەيىن اشۋدى قولعا الىپ جاتىر ەكەن. جاراس عالىموۆ باسقاراتىن ۇجىم مەكتەپ ىشىنەن ءبىر بۇرىش اشىپ, تاريحي جادىگەرلەردى جيناقتاۋدا. ءارتۇرلى كەزەڭدەردەن سىر شەرتەتىن جادىگەرلەر ىشىنەن كوزگە تۇسكەنى قانجار, قىلىش جانە ساداقتىڭ جەبەسى. مەكتەپ ديرەكتورىنىڭ ايتۋىنشا, بۇل جادىگەرلەر اۋىلدان 10 شاقىرىم قاشىقتىقتا ورنالاسقان ءبىرالى وباسىنان تابىلعان ەكەن. قاي عاسىردا جاسالعانى بەلگىسىز. زەرتتەۋدى قاجەت ەتەدى. ءبىرالى سياقتى وبالار سارالجىن اۋىلى اۋماعىندا كوپ كەزدەسەدى دەيدى. جاراس عالىموۆتىڭ سوزىنەن بايقاعانىمىزداي, بۇنداي جادىگەرلەر وبانىڭ بەتكى قاباتىنان عانا تابىلعان. ال استىڭعى قاباتىندا قانداي قۇندى زاتتار جاتقانىن كورۋ ءۇشىن قازبا جۇمىستارىن جۇرگىزۋ كەرەك سياقتى. بۇل بولاشاقتىڭ ەنشىسىندە دەمەكپىز.
شالعايدا جاتقان شاعىن عانا اۋىلدىڭ تاريحىن اشىپ جاتقان مەكتەپ ۇجىمىنىڭ ەڭبەگى بارشا قازاقستاندىقتارعا ۇلگى بولارى انىق. ويتكەنى وسى ۇجىم سياقتى تاريحىمىزدى زەردەلەپ, وتكەنىمىزگە كوز جىبەرسەك, ءاربىر اۋىلدىڭ تاريحىن تۇگەندەۋ ارقىلى تۋعان وتانىمىزدىڭ تاريحىن جاساۋمەن پارا-پار دەپ ءتۇسىنۋىمىز كەرەك.
قايرات جاقىپ,
باتىس قازاقستان وبلىسى,
قازتالوۆ اۋدانى
