ءالى ەسىمدە, وسىدان شيرەك عاسىر بۇرىن تۇڭعىش ءتىل كوميتەتى قۇرىلعان جىلى لاتىن قارپىنە كوشۋ تۋرالى يدەيا كەڭ تالقىعا ءتۇستى. ءتىلشى عالىمداردىڭ ۇسىنىسىن ءتىل كوميتەتى قىزۋ قولداپ, باسپاسوزدە ءبىر جىلداي پىكىرتالاس ۇيىمداستىردى. بۇعان قالىڭ قاۋىم بەلسەنە اتسالىستى.
لاتىن قارپىنە كوشۋدىڭ پايدالى جاعى دا, كەمشىلىگى دە ءسوز بولدى. وتە ساليقالى پىكىرلەر ايتىلدى. لاتىن قارپىندەگى قازاق ءالىپبيىنىڭ كوپتەگەن نۇسقالارى جيناقتالدى. بۇعان قاراپايىم ينجەنەردەن باستاپ, ءتىلشى عالىمدار, مەكتەپ مۇعالىمدەرى – جالپى شىعارماشىلىق ينتەلليگەنتسيا بەلسەنە ارالاستى. ناتيجەسىندە, وسى ۇسىنىستاردى تالداپ, جيناقتاپ, قولداپ پرەزيدەنت اپپاراتىنا جولدادىق. ءبىزدىڭ بۇل ارەكەتىمىز قيسىندى بولعانىمەن تاۋەلسىزدىكتىڭ ەلەڭ-الاڭىندا, قازاق ءتىلى ءالى ەڭسەسىن تىكتەمەي تۇرعاندا اسىعىستىققا اپاراتىن ەدى.
سوندىقتان, بۇل يگىلىكتى ءىس ءوزىنىڭ جۇلدىزدى شاعىن توستى. ول كۇن تۋدى. سوڭعى ءبىر جىل بويعى تالقىلاۋدان بايقاعانىمىز لاتىن قارپىنە كوشۋ – وڭاي شارۋا ەمەس. بۇل – بۇكىلحالىقتىق, مەملەكەتتىك اسا ماڭىزدى ءىس. ودان ەشكىم دە سىرت قالماۋعا ءتيىس. ەندەشە بوس داۋرۋعۋدى ازايتىپ, ەندى ناقتى شارۋا تىندىرۋ كەرەك. بۇل ءبىر كۇننىڭ, ءبىر جىلدىڭ وتكىنشى وقيعاسى ەمەس, بولاشاق ۇرپاعىمىزدىڭ وركەنيەت كوشىندە ءوز ورنىن تاۋىپ, انا ءتىلىمىزدىڭ جاڭعىرىپ دامۋىنا, شىن مانىندە مەملەكەتتىك ءتىل دارەجەسىنە كوتەرىلۋىنە قىزمەت ەتەتىن باستى قۇرالعا اينالسا, وزگە ءتىلدىڭ وكتەمدىگىنە توسقاۋىل بولسا, تىلەكتىڭ ورىندالعانى دەپ ويلايمىن.
سۇلتان ورازالى,
جازۋشى, بۇرىنعى
مينيسترلەر كابينەتىنىڭ جانىنداعى
ءتىل كوميتەتىنىڭ تۇڭعىش توراعاسى, قازاقستاننىڭ ەڭبەك سىڭىرگەن قايراتكەرى, پروفەسسور
