وسىنداي قۇجات بلانكىسى الاشوردالىقتاردا دا بولعان. ياعني 1917 جىلدىڭ اياعىندا قۇرىلىپ,1918 جىلدىڭ ورتاسىنان باستاپ رەسمي ىسكە كىرىسكەن الاشوردا ۇلت كەڭەسى (ۇكىمەتى), 1920 جىلى 9 ناۋرىزدا كازرەۆكوم «الاشوردا» بۋرجۋازيالىق ۇكىمەتىن جويۋ تۋرالى بۇيرىق شىعارعانعا دەيىن بلانك قولدانىپ, ءىس-قىزمەتىن جۇرگىزگەن.
رەسمي بلانكىنىڭ باسىنا, ياعني قۇجات يەسى رەتىندە ات-اتاۋى قويىلاتىن ورىنعا الاشوردا ۇلت كەڭەسى ءوزىنىڭ تيتۋلىن اۋەلى اراب ءالىپبيى نەگىزىندە قازاقشالاپ «قازاق-قىرعىز حۇكمەتى الاش – وردا» دەپ جازسا, ورىسشا كريلليتسامەن «ۆسەكيرگيزسكىي نارودنىي سوۆەت الاش – وردا» دەپ تاڭبالاعان. رەسمي تيتۋلدىڭ استىندا قۇجاتتىڭ جولدانعان ۋاقىتى مەن ءنومىرى تۇر.
وسىنداي رەسمي بلانكىگە جازىلعان ءىس-قاعاز قۇجاتتارىنىڭ دەنى سەمەي قالاسىنداعى قازىرگى زامان تاريحىن قۇجاتتاندىرۋ ورتالىعىندا ساقتاۋلى. اتالمىش مەكەمەنىڭ عىلىمي-انىقتامالىق جانە قۇجاتتاردى پايدالانۋ ءبولىمىنىڭ باسشىسى لاۋرا قادىروۆانىڭ مالىمەتىنە قاراعاندا, قورداعى قۇجاتتار: الاشوردا ۇكىمەتىنىڭ, سەمەي وبلىستىق جانە ۋەزدىك الاشوردا كوميتەتىنىڭ جانە الاش قايراتكەرلەرىنىڭ قىزمەتىنە قاتىستى ەكەن. سونىمەن قاتار بلانكىگە جازىلعان ءىس-قاعازدار بۇكىلرەسەيلىك ۋاقىتشا ۇكىمەتى سەمەي وبلىستىق جانە ۋەزدىك باسقارمالارىنا, سەمەي گۋبەرنيالىق سوتى, توڭكەرىس كوميتەتى, الاش قالالىق قوعامدىق باسقارماسى, الاش جۇمىسشى, شارۋا جانە قىرعىز دەپۋتاتتارى كەڭەسى قاتارلى ۇيىمدارعا جولدانىپ, الاش قايراتكەرلەرى – ءا.بوكەيحانوۆ, ح.عابباسوۆ, ر.مارسەكوۆ, ب.سارسەنوۆ, ا.قوزىباعاروۆ, م.بوشتاەۆتاردىڭ قولتاڭباسى قويىلعان دەيدى.
بۇل بلانكىدەگى ەكىنشى ءبىر ەرەكشە دۇنيە – قۇجاتتىڭ مەكەن-جايى «سەمەي وبلىسى الاش قالاسى» (گ. الاش. سەميپالات. وبل.) دەپ كورسەتىلۋى. ياعني, قالانىڭ قازىرگى جاڭا سەمەي دەپ اتالاتىن بولىگى 1917 جىلدان باستاپ, 1927 جىلعا دەيىن «الاش قالاسى» دەپ اتالعانىنا ناقتى دالەل وسى قۇجات.
سۋرەتتەگى بلانكىدەن الاشوردالىقتاردىڭ ۋەزدىك جەر باسقارماسىنا جازعان حاتىن وقۋعا بولادى. ۋاقىتى «5-ءشى قازان 1918 جىل» دەلىنگەن. قۇجات ءنومىرى – 199. بۇل حات جازىلعان مولشەردە الاشوردا ۇكىمەتىنىڭ رەسمي ىسكە كىرىسكەنىنە ءتورت-بەس اي عانا بولعان كەز. سونىڭ وزىندە قۇجات سانى 200-گە يەك ارتقان ەكەن.
بەكەن قايرات ۇلى,
«ەگەمەن قازاقستان»
