وقيعا بىلاي بولعان ەكەن. تۇنگى ۋاقىتتا تاۋكە xان كوشەسىنىڭ بويىندا ورنالاسقان بانك عيماراتىنداعى تەرمينالدان بەلگىسىز بىرەۋلەر 4 ملن تەڭگەگە جۋىق قارجىنى ۇرلاپ كەتەدى. وقيعا ورنىنا جەتكەن پوليتسەيلەر وسى فاكتى بويىنشا قىلمىستىق كودەكستىڭ 188-بابى «ۇرلىق» 4-بولىگىمەن ءىس قوزعاعان بولاتىن. جەدەل ىزدەستىرۋ ناتيجەسىندە وسى قىلمىسقا قاتىسى بار دەگەن ەكى كۇدىكتى ۇستالادى.
قىزىق بولعاندا بانك قىزمەتكەرلەرى ەكى كۇدىكتىنىڭ ءبىرىن جازباي تانىعان. ءدال تانيتىن سەبەبى, كۇدىكتىنىڭ ءبىرى بولىپ تۇرعان 1970 جىلعى جىگىت ۇرىلاردىڭ جولىن كەسۋ ءۇشىن كۇزەتشىلىك جۇمىسقا قابىلدانعان ءوز قىزمەتكەرى ەدى. «كاسپي بانكتىڭ» كۇزەتشىسى ءوز قىزمەتىن شاتاستىرىپ الدى ما, الدە وسى بانككە مەنىڭ دە ماڭداي تەرىم ارتىعىراق توگىلدى دەپ ويلادى ما, سىبايلاسىمەن تۇنگى جورتۋىلعا شىققان.
الايدا, جازا باسقانىن اڭداعان ول تەرگەۋشىلەرگە كىناسىن تەز مويىنداپ, وزىنە «تيەسىلى» 2 ملن تەڭگەنى قايتارىپ بەرگەن. ال ەلەكترشى بولىپ ىستەيتىن سەرىگى قايتارۋ جاعىن ويعا الماپتى. ول دەرەۋ قاماۋعا الىندى. كۇزەتشى يزولياتورعا قامالماعانىمەن قىلمىستىق ىستەن قۇتىلا المادى. ەندى ەكەۋى سوت ۇكىمىن كۇتەدى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
