امان ەڭبەككە دە, سپورتقا دا ەرتە ارالاسقان. جۇگىرگەن, ۇزىندىققا سەكىرگەن, كۇرەسكەن, اۋداندىق, وبلىستىق جارىستاردا بەلدەسكەنىن جەرگە الىپ ۇرىپ, تالاي رەت جەڭىس تۇعىرىنا كوتەرىلگەن, اتاقتى بالۋان اتانعان. اماننىڭ تالانتىن تانىعان وبلىستاعى سپورت ماماندارى ونى سەمەيگە شاقىرىپ, حات تا جازىپتى. ول كەزدە اۋىل باسشىلارى ءۇشىن ازاماتتىڭ بولاشاعى ەمەس, اۋىلداعى شارۋاشىلىق, قويدىڭ دۇرىس باعىلۋى, ەگىن مەن ءشوپتىڭ دۇرىس جينالۋى سياقتى قاۋىرت تىرلىك قىمبات بولعان. اماندى سەمەيگە جىبەرىپ قويسا, اۋىلداعى شارۋاشىلىقتىڭ ءبىر پۇشپاعى قيسايىپ قالاتىنداي كورىنگەن. سوندىقتان وبلىستان كەلگەن حاتتى اماننىڭ قولىنا تيگىزبەي, جاسىرىپ قالعان. مۇنى ەندى «سپورتشىنىڭ باعىن بايلاعان» دەيمىز بە, ۋاقىت وتكەن سوڭ ايتتىڭ نە, ايتپادىڭ نە, ءبىر كەم دۇنيە عوي.
سوۆحوزدىڭ اۋىر جۇمىسى اماننىڭ دەنساۋلىعىنا كەرى اسەر ەتىپتى. دارىگەرلەر «بەل ومىرتقا وستەوحوندروزى» دەگەن قورىتىندى جاساپتى. جۇمىس-جۇمىس دەپ ءجۇرىپ دەنساۋلىعىن قۇرتىپ العان اماننىڭ ءجۇرىپ-تۇرۋى دا قيىنداپ كەتەدى. ءدارى-دارمەك, اۋرۋحانا دارىگەرلەرى وعان كومەكتەسە الماعان. ءسويتىپ, بالداق ۇستاپ قالعان امانعا سپورتقا ارقا سۇيەۋدەن باسقا جول دا قالماعان.
ەلۋ ەكى جاستان باستاپ امان سپورتپەن قايتا تابىستى. تاۋەكەلگە بەل بۋعان جىگەرلى جىگىت اعاسى ءومىرىن قۇتقارىپ, كەسەلدەن ايىقتىراتىن بىردەن-ءبىر جول – سپورتپەن شۇعىلدانۋ ەكەنىنە ابدەن كوز جەتكىزدى. «يۆانوۆتىڭ 12 قاعيداسى» دەگەن ساۋىعۋ ەرەجەسىن تاۋىپ الىپ, سونى باسشىلىققا الدى. جىل ون ەكى اي سپورت جاتتىعۋلارىن جاسادى. قازىر امان اقساقال ءوزىن سەرگەك سەزىنەدى. كۇندەلىكتى تاڭعى بەس جارىمدا اۋىلدان شىعىپ, ساعات سەگىزگە دەيىن جۇگىرىپ, دەنە جاتتىعۋلارىن جاساپ قايتادى. قازىر ول كىسى 42 شاقىرىمدىق قاشىقتىقتى بەس جارىم ساعاتتا جۇگىرىپ وتەدى. مۇنىڭ ءوزى گيننەستىڭ رەكوردتار كىتابىنا ەنگەندەردىڭ كورسەتكىشىمەن شامالاس كورىنەدى. وسى گيننەس كىتابىنا ەنۋگە نەگە تالپىنىس جاسامايمىن دەگەن وي امان اعامىزدى دا مازالاپتى. ءسويتىپ ول كىسى الماتىداعى گيننەستەر ورتالىعىن ىزدەپ, تابا الماي قايتىپتى. تەك «ايتۋعا وڭاي» باعدارلاماسىنىڭ جۇرگىزۋشىسى بەيسەن قۇرانبەك قانا جىلى قاباق تانىتىپ, «حابارلاسايىق» دەپتى.
– 42 شاقىرىم قاشىقتىقتى 70-85 جاستا جۇگىرىپ, جاقسى ناتيجە كورسەتىپ, گيننەستىڭ رەكوردتار كىتابىنا ەنگەن قاريالار بار ەكەن. ايتەۋىر ءۇمىت دۇنيەسى عوي, مەن دە سوعان دايىندالىپ ءجۇرمىن. قازىر وسى قاشىقتىقتى بەس جارىم ساعاتتا جۇگىرىپ وتەمىن, – دەيدى امان اقساقال.
امان اقساقالدىڭ وسى اڭگىمەسىن ەستىپ ويعا قالاسىڭ. سپورتتىڭ دەنساۋلىققا پايدالى ەكەنىن, ونىڭ ارتىقشىلىعىن جاستار اراسىندا ناسيحاتتاۋدىڭ بىردەن-ءبىر مىسالى – وسى امان كاكىموۆ سياقتى ارداگەرلەرىمىزدىڭ ونەگەلى ىستەرىن كورسەتۋ ەمەس پە؟ اماننىڭ سپورتتاعى تالپىنىسىن, ارمان-ماقساتىن اۋداندىق سپورت ۇيىمدارى قالاي ەستىمەگەن؟ ەستىسە, امان قاريانىڭ سپورت ارقىلى اۋرۋدى جەڭە بىلگەن ەرلىگىن باسقالارعا ۇلگى ەتۋ شارالارىن ۇيىمداستىرار ەدى-اۋ دەپ تە ويلايسىڭ. اۋەلى, ءبىر زەينەتاقىسىنان باسقا تابىسى جوق اماندى الماتىداعى گيننەستەر ورتالىعىنا ەرتىپ بارىپ, جەلاياق قاريالاردىڭ سايىسىنا قوسىپ, باعىن سىناسا, سالاماتتىلىق ءومىر سالتىن ناسيحاتتايتىن تارباعاتاي اۋداندىق مادەنيەت جانە سپورت ءبولىمىنىڭ ابىرويى ارتپاسا, كەمىمەس ەدى.
حامزا ساتيەۆ,
قازاقستاننىڭ قۇرمەتتى ءجۋرناليسى
شىعىس قازاقستان وبلىسى,تارباعاتاي اۋدانى
