ەلىمىزدىڭ مەملەكەتتىك قىزمەت كورسەتۋ تاجىريبەسى, يننوۆاتسيالىق جوبالاردى مەملەكەتتىك باسقارۋ سەكتورىنا ەنگىزۋ مۇمكىندىكتەرى تالقىلانعان كونفەرەنتسيانىڭ اشىلۋىندا اقپارات جانە كوممۋنيكاتسيالار ۆيتسە-ءمينيسترى قايرات بالىقباەۆ, استاناداعى مەملەكەتتىك قىزمەت سالاسىنداعى وڭىرلىك حابتىڭ باسقارۋشى كوميتەت توراعاسى ءاليحان بايمەنوۆ, پارلامەنت ءماجىلىسىنىڭ دەپۋتاتى مايرا ايسينا جانە سينگاپۋرداعى مەملەكەتتىك قىزمەتتى جەتىلدىرۋ جونىندەگى بۇۇ دامۋ باعدارلاماسى جاھاندىق ورتالىعىنىڭ ديرەكتورى ماكس ەۆەرەست فيلليپس قۇتتىقتاۋ ءسوز سويلەدى.
جيىن تاقىرىبىنداعى ماسەلەلەرمەن كەڭىرەك تانىستىرعان «ازاماتتارعا ارنالعان ۇكىمەت» كورپوراتسياسىنىڭ باسقارما توراعاسى ابىلايحان وسپانوۆتىڭ ايتۋىنشا, قازىرگى كەزدە قازاقستان UNDESA ەلەكتروندى ۇكىمەتتى دامىتۋ يندەكسى بويىنشا 27-ءشى ورىندا تۇر. بۇل – ۇكىمەتتىڭ حالىققا قىزمەتتەردى ۇسىنۋ ءتارتىبىن جەتىلدىرۋگە باعىتتالعان بەلسەندى جۇمىسىنىڭ ناقتى كورىنىسى. «بۇگىندە مەملەكەتتىك قىزمەتتەر بىرنەشە ءتاسىل – ەلەكتروندى ۇكىمەت پورتالى, حالىققا قىزمەت كورسەتۋ ورتالىقتارى جانە «mgov» ءموبيلدى قوسىمشالار ارقىلى كورسەتىلەدى, – دەدى ا.وسپانوۆ. – قازىرگى كەزدە 723 مەملەكەتتىك قىزمەتتىڭ 548-ءى «ازاماتتارعا ارنالعان ۇكىمەتتىڭ» 349 فرونت-وفيستەرى بويىنشا ۇسىنىلادى. قىزمەت كورسەتۋدىڭ وسىنداي ءتۇرى جىل وتكەن سايىن ارتىپ كەلەدى».
كورپوراتسيا باسشىسىنىڭ اتاپ وتۋىنشە, بۇگىندە قىزمەتتەر تولىق تسيكلمەن كورسەتىلەتىندىكتەن, ازاماتتاردىڭ سۇراتاتىن قۇجاتتارىنىڭ سانى ازايعان. سونداي-اق, قىزمەتتەردىڭ ەلەكتروندى تۇرگە كوشىرىلۋىنە بايلانىستى كورپوراتسياعا كەلۋشىلەردىڭ قاتارى ازايا تۇسكەن. حالىققا قىزمەت كورسەتۋ ورتالىقتارى جۇمىسىنىڭ ساپاسىن كوتەرگەن باستى ەرەكشەلىك – ءارتۇرلى ورگانداردىڭ قۇجاتتارىن ء«بىر تەرەزە» قاعيداتى بويىنشا دايىندار بەرۋ. ياعني ازامات وزىنە قاجەتتى قۇجاتتاردى ورتالىقتىڭ كەز كەلگەن قىزمەتكەرىنەن الا الادى.
كورپوراتسيا باسشىسى ءسوز اراسىندا وسى جىلدىڭ قاراشاسىندا ەلوردادا بىرىڭعاي تسيفرلى حالىققا قىزمەت كورسەتۋ ورتالىعى اشىلاتىنىنان دا حاباردار ەتتى. «حالىققا قىزمەت كورسەتۋ ورتالىقتارىنىڭ جۇمىسىن كۇشەيتۋ ماقساتىندا تسيفرلى قىزمەت كورسەتۋ ورتالىقتارىن اشۋ كوزدەلىپ وتىر, – دەدى وسى جونىندە ا.وسپانوۆ. – بيىلعى جىلدىڭ قاراشا ايىندا استاناداعى ساۋران كوشەسىنىڭ بويىندا تسيفرلى حالىققا قىزمەت كورسەتۋ ورتالىعى اشىلادى».
ا.وسپانوۆتىڭ سوزىنە قاراعاندا, ەلەكتروندى تسيفرلى قولتاڭبا كەيبىر قىزمەتتەر ءۇشىن الىنىپ تاستالعان. مىسالى, مەكەن-جاي انىقتاماسىن الۋ ءۇشىن تالعان قولتاڭبا ەندى قاجەت ەمەس. ال تسيفرلى حقكو-دا ازاماتتارعا ەلەكتروندى قىزمەتتەردى قالاي پايدالانۋدى ماماندار ۇيرەتەدى. ەندى ولار كەيبىر ەلەكتروندى انىقتامالاردى ۇيدە وتىرىپ-اق الا الادى.
ءاليسۇلتان قۇلانباي,
«ەگەمەن قازاقستان»
