...قولداۋ كورسەتەدى
پارىزىم ءارى مىندەتىم
مەن بالاباقشا تاربيەشىسى رەتىندە ءارى «نۇر وتان» پارتياسىنىڭ مۇشەسى بولعاندىقتان ەلباسىمىزدىڭ ساياساتىنان تىسقارى قالا المايتىنىمدى ايتقىم كەلەدى. وسى ورايدا, ۋاقىت وتكەن سايىن ەڭ الدىمەن ءبىلىمىمدى جەتىلدىرىپ, ءىس-ارەكەتىممەن جاستارعا ۇلگى بولۋدى پارىزىم ءارى مىندەتىم دەپ سانايمىن.
ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىن وقىپ شىعىپ, ءبىزدىڭ كەلەشەگىمىزدىڭ كەمەل ەكەندىگىنە سەنىمىم ارتا ءتۇستى.
ەكى بالانىڭ اناسى بولعاندىقتان, جەتكىنشەكتەردىڭ بولاشاعى ويلانتارى ءسوزسىز. قولعا الىنىپ وتىرعان ءۇش ءتىلدى مەڭگەرۋ باستاماسىن ءوز باسىم قولدايمىن. ەلورداداعى 500-دەن اسا بالا تاربيەلەنىپ وتىرعان «دۋمان» اتتى بالاباقشادا وسى يگىلىكتى ءىس قولعا الىندى. سونداي-اق «تۋعان جەر» باعدارلاماسى قازىردەن ءار بالانىڭ سانا-سەزىمىنە ۇيالاعاندىقتان ولار كەلەشەكتە تۋعان ەلىنە قىزمەت جاسايتىنىنا سەنىمدىمىن.
دينا توقتامىسوۆا
استانا
...پىكىر بىلدىرەدى
وتكىر ماسەلەنى قوزعادى
ەلباسىنىڭ تالاي القالى توپتا سويلەگەنىن ەستىپ ءجۇرمىز. ال تەلەديداردان كورسەتكەن نۇرسۇلتان ءابىش ۇلىنىڭ بەلگىلى قالامگەرلەرمەن سۇحباتى ەرەكشە اسەرلى وتكەنىن اتاپ وتكەنىمىز ابزال. وتە ەركىن قۇرىلعان سۇحباتتا ەلدىڭ پىكىرلەرىن اشىق بىلدىرگەن ءۇش جازۋشىنىڭ پاراساتتى وي-تولعامدارىنا ريزامىز. سوندا ايتىلعان ماسەلەلەردىڭ ءبىر-ەكەۋىنە ءوز پىكىرىمدى دە قوساقتاي كەتەيىن.
مەكتەپ وقۋشىلارى 6 سىنىپتى بىتىرگەنشە تەك قازاق تىلىندە وقىعانى دۇرىس. ورىس ءتىلى اپتاسىنا ءبىر رەت قوسىمشا ساباق رەتىندە جۇرگىزىلسە, 6 سىنىپتان باستاپ از مولشەردە ورىس ءتىلىن, 8 سىنىپتان باستاپ اعىلشىن تىلىنە دەن قويعانى دۇرىس. وسى باعىتتا بولسا قازاق بالالارىنىڭ ۇلتتىق ساناسى مىقتاپ بەكي تۇسەدى. ءوز ۇلتىنىڭ تاريحىن, اتا-باباسىنىڭ سالت-ءداستۇرىن بويىنا ءسىڭىرىپ العان سوڭ, ەشقانداي بوگدە كۇشكە بوي بەرمەيدى. ءدىن جونىندە, يمامدار جونىندە, قازاق ايەلدەرىنىڭ قارا جامىلىپ جۇرگەندەرى جايلى اشىق ءارى وتكىر ايتقانى ءۇشىن مىڭ العىس. ازاتتىق جولىندا قۇربان بولعانداردىڭ ەسىمدەرىن جاستاردىڭ جادىنا بەكىتە بەرۋدىڭ ورنىنا, رۋ-رۋ بولىپ مەشىت سالىپ, وعان ءوز رۋلارىنىڭ, كوسەمدەرىنىڭ, باي-ماناپتاردىڭ اتىن قويىپ العاندار قانشاما! كەشەگى الاشتىڭ سەركەلەرى – ەلدىڭ كوزىن اشىپ, نامىسىن قايراپ, جىگەرىنە جىگەر قوسىپ وتكەن ارۋاقتى اعالار – مەشىت-مەدرەسەدە ەمەس, ادامزاتتىق ءبىلىم بەرگەن مەكتەپتەردەن ءنار الىپ, ساناسىن بەكىتىپ, حالقىنا باقىت سىيلادى.
وسىنداي پاراساتتى وي-تولعامدار قوزعاعان ەل جاقسىلارىنىڭ ونەگەلى ىستەرىنە ريزاشىلىق بىلدىرەمىز.
نۇرماحان نازاروۆ,
قازاقستان جۋرناليستەر وداعىنىڭ مۇشەسى
تۇركىستان
...ساقتاندىرادى
ەكىجۇزدىلەرگە ەل سەنبەيدى
ەلىن توناپ, بايلىعىن شەتەل اسىرىپ, قازىر سول ەلدەن «دانىشپاندىق» تانىتىپ جاتاتىنداردىڭ كۇڭكىلىن ەستىپ جىنىم كەلەدى! ولار ۇرى! ۇرىنىڭ ءبىر سوزىنە سەنبەيمىن! ماسەلەن, سولاردىڭ ءبىرى ءابىليازوۆ ۇلت ءۇشىن, قازاق ءۇشىن نەندەي جاقسىلىق ىستەدى؟ ەلدە ءجۇرىپ كۇرەسكەرلىك تانىتتى ما؟ بيۋدجەتتەن قوماقتى قارجى ۇرلاپ, بۇگىندە ەۋروپاعا ساياسي قۇربان, «دەموكراتيا جولىنداعى كۇرەسكەر» سەكىلدى كورسەتكىسى كەلەدى ءوزىن. بىزگە ارتىندا بىلىعى جوق – ارى تازا, اقشانىڭ ەمەس, قازاقتىڭ مۇڭىن مۇڭدايتىن مىقتىلار كەرەك! اقشانىڭ بىلىعىنا كومىلگەندەر ءارى ءجۇرسىن ەلىمىزدەن.
ەكىجۇزدى, ءسوزىنىڭ تۇراعى جوق افەريستەردەن ساقتاسىن! ءوز ءومىرىن بىلىققا باتىرعان ادام, انا ءتىلىن مەڭگەرمەگەن, ميلليونداعان سالىمشىنىڭ اقشاسىن قولدى ەتكەن الاياق ەلدى ب ۇلىككە شاقىرىپ, مىسىقتىلەۋلەنىپ وتىرادى. قۇداي سولاردان ساقتاسىن!
دينا ەلگەزەك
الماتى
...سەنىم ارتادى
جاستار ۇيىمى قۇرىلدى
جاستاردى رۋحاني-ادامگەرشىلىك ۇستانىمدارمەن قارۋلاندىرىپ, جوعارى مادەني وركەنيەت كەڭىستىگىن جاساۋعا دايىنداۋ باعىتىندا جانە ادامي قۇندىلىقتارمەن تاربيەلەۋ ءۇشىن ماڭعىستاۋ اۋداندىق جاستار رەسۋرستىق ورتالىعى مەن شەتپە مەشىتىنىڭ ۇيىمداستىرۋىمەن باسقوسۋ وتكىزىلدى.
باسقوسۋ ماقساتى جاستاردىڭ رۋحاني ادامگەرشىلىك قۇندىلىقتارىن ناسيحاتتاۋ جانە «ماڭگىلىك ەل» ۇلتتىق يدەياسىن قولداۋ باعىتىندا ورتالىق مەشىت جانىنان قوعامدىق نەگىزدە جاستار ۇيىمىن اشۋ بولىپ تابىلدى. جاستار ءبىراۋىزدان ۇيىمدى اشۋ كەرەكتىگىن جانە ونىڭ ۋاقىتى جەتكىندىگىن العا تارتىپ, ۇيىمنىڭ اتاۋىن «يمان نۇرى» جاستار بىرلەستىگى دەپ اتاۋدى ۇيعاردى.
ۇيىم مىناداي باعىتتار بويىنشا ماقساتتى جۇمىستار اتقارۋدى قولعا الىپ وتىر. ولار – تۇلعانىڭ ادامگەرشىلىك, ازاماتتىق قاسيەتتەرىن كەمەلىنە جەتكىزۋ, سانالى ازاماتتىق كوزقاراسىن وياتىپ, ەلىمىزدىڭ دامىپ-گۇلدەنۋىنە ماقتانىش سەزىمىن, پاتريوتتىق جىگەرىن قالىپتاستىرۋ, شىنايى شەشىمدەردى قابىلداۋ مادەنيەتىن, تولەرانتتىلىقتى قالىپتاستىرۋ, ءوز ورتاسىنداعى, قوعامداعى بەلسەندىلىككە, جاۋاپكەرشىلىككە, قايىرىمدىلىققا دەگەن ىنتا-ىقىلاسىنا جول اشۋ, تۇلعانىڭ ۇزدىكسىز جەتىلۋىنە تىرەك بولاتىن قابىلەتى مەن دارىنىن شىڭداۋ بولىپ تابىلادى.
اللابەرگەن قونارباەۆ
ماڭعىستاۋ وبلىسى
...جاڭالىعىن جەتكىزەدى
جىلىجايدا تروپيكالىق جەمىس وسىرىلەدى
قىسى-جازى جايقالىپ تۇراتىن باق نەمەسە تروپيكالىق دجۋنگلي. شىعىس قازاقستانداعى ۋكراينكا اۋىلىندا ورنالاسقان جىلىجايدى ءدال وسىلاي اتاۋعا بولادى. سانالى عۇمىرىندا ينجەنەر-تەحنيك قىزمەتىن اتقارعان ليۋدميلا زەمليانايا زەينەت جاسىنا جەتكەندە ءومىرىنىڭ جاڭا بەلەسىنە قادام باستى. وسىدان 9 جىل بۇرىن جىلىجاي اشىپ, تروپيكالىق جانە سۋبتروپيكالىق داقىلداردى وسىرۋگە دەن قويادى.
ەڭبەگى ناتيجەسىز ەمەس. ويىنداعى وسىمدىكتەرى ءوسىپ, تاڭعاجايىپ باققا اينالدى. جىلىجايدا وسىمدىكتىڭ 500-گە جۋىق ءتۇرى بار. ارقايسىسىنا ەرەكشە كۇتىم مەن قامقورلىق قاجەت. كوپشىلىكتى ءتانتى ەتكەن الىپ ليموندار مەن كىشكەنتاي بانانداردى تاماشالاۋشىلار ەلىمىزدىڭ تۇكپىر-تۇكپىرىنەن كەلەدى ەكەن.
جالپى اۋماعى مىڭ شارشى مەتردى قۇرايتىن كەشەن ءتورت توپتان تۇرادى. ءوڭىر ناتۋراليستەرى مەن فلوريستەرى دە جىلىجايدىڭ تۇراقتى مەيماندارىنا اينالعان. عىلىمي جۇمىستار بويىنشا كەلىسىم جاساۋ ءۇشىن ەلىمىزدىڭ وزگە وڭىرلەرىنەن دە ماماندار كەلەدى ەكەن.
ايناش كىتاپباەۆا
شىعىس قازاقستان وبلىسى
