- «ماككابيدىڭ» جەڭىسكە جەتۋ مۇمكىنشىلىگى قانشالىقتى جوعارى؟
- قيىن ەكەنى بەلگىلى. «استانا» ءوز الاڭىندا اسىرەسە ەۋروپالىق ويىنداردا ەشكىمگە ەسە جىبەرمەيدى. ونىڭ ۇستىنە الاڭ دا جاساندى. بۇل قارسىلاستارىمىزعا سەپتىگىن تيگىزەرى انىق.
- ءسىز ويىنشى رەتىندە عۇمىرىڭىزدى اياقتاعاننان كەيىن فۋتبولعا قاتىستى بارلىق سالادا جۇمىس ىستەدىڭىز. وزىڭىزگە ىڭعايلى ناقتى ءبىر سالاعا توقتالدىڭىز با؟
- مەن ەڭ باستىسى فۋتبولدى جاقسى كورەمىن. بولاشاقتا نە بولارىن بىلمەيىن. ءبارىن ۋاقىت كورسەتەدى.
- ءسىز جايلى ستانيمير ستويلوۆ جىلى لەبىزدەرىن ءبىلدىردى. ال ءسىز ارىپتەسىڭىز تۋرالى قانداي پىكىردە بىلدىرەسىز؟
- مەن ونىمەن سىيلاسپىن. وسىدان بەس-التى جىل بۇرىن ەكەۋىمىز كيپردە تانىستىق. مەن ونى ادام رەتىندە دە, مامان رەتىندە دە قاتتى سىيلايمىن. الداعى ۋاقىتتا ارىپتەسىمە تەك ساتتىلىك تىلەيمىن بىراق ەرتەڭگى ويىندا ەمەس.
- ءسىزدىڭ كومانداڭىز وتكەن جىلى «قايراتپەن» وينادى. ەندى «استانا». قاي كلۋب مىقتى دەپ ويلايسىز؟
- ەگەر قازاقستان چەمپيوناتىن الار بولساق, «استانا» چەمپيون. بۇل ءوز كەزەگىندە كىمنىڭ مىقتى ەكەنىن ايتىپ تۇر. ال «قايراتقا» قارسى ويىندا ءوز بابىمىزدا ەمەس ەدىك. جەڭىسكە جەتىپ, ارى قاراي وتكەنىمىزگە قۋانامىن. ال «استاناعا» كەلەر بولساق, بۇل جەردە جاعداي مۇلدەم باسقاشا.
- ءسىز ايگىلى يوحان كرويففتىڭ ۇلىسىز. اكەڭىزدىڭ فيلوسوفياسىن وزىڭىزگە سىڭىرە الدىڭىز با؟
- اكەم باپكەر رەتىندە دە, ويىنشى رەتىندە دە ۇلكەن جەتىستىكتەرگە جەتكەن. اتى اڭىزعا اينالعان تۇلعا. بىراق مەنى ول كىسىمەن سالىستىرماعان ءجون.
- «استانادا» بىرنەشە ويىنشى جاراقات الىپ قالدى. بۇل ءوز كەزەگىندە «ماككابيگە» سەپتىگىن تيگىزە مە؟
- بىزدە دە جاراقات العان ويىنشىلار بار. سوندىقتان جاعدايىمىز بىردەي دەپ ويلايمىن.
- قانشا ويىنشى جاراقات الىپ قالدى؟
- تەل اۆيۆتە التى-جەتى ماڭىزدى ويىنشىمىزدى قالدىرىپ كەتتىك.
- توپتاعى كوماندالاردىڭ ىشىندە قاي ۇجىمنىڭ پلەي-وففقا شىعۋ مۇمكىندىگى جوعارى؟
- توپتاعى ءتورت كوماندا دا جەڭىسكە جەتۋ ءۇشىن بارىن سالادى. ارينە ارامىزدا «ۆيلياررەالدىڭ» فاۆوريت ەكەنى تۇسىنىكتى. ال قالعان ءۇش كوماندا ءوزارا مىقتىنى انىقتاپ, ۇپاي بولىسەدى. ءبارى توپتان شىعۋ ءۇشىن ايانىپ قالمايدى.
ايان ءابدۋالي,
«ەگەمەن قازاقستان»
