استاناعا كەشكە تامان قىرعىز رەسپۋبليكاسىنىڭ پرەمەر-ءمينيسترى ساپار يساكوۆ باستاعان ۇلكەن وكىلدىك دەلەگاتسيا كەلدى. قىرعىز دەلەگاتسياسىنىڭ قۇرامىندا ءبىرىنشى ۆيتسە-پرەمەر-مينيستر ت. ابدىعۇلوۆ, سىرتقى ىستەر ءمينيسترى ە. ابدىلداەۆ, قارجى ءمينيسترى ا. قاسىماليەۆ, ەكونوميكا ءمينيسترى ا. نوۆيكوۆ, مەملەكەتتىك كەدەن قىزمەتىنىڭ توراعاسى ا. سۋلايمانوۆ, مەملەكەتتىك سالىق قىزمەتىنىڭ توراعاسى و. ابدىكايموۆ, ەكونوميكالىق قىلمىستارمەن كۇرەس جونىندەگى مەملەكەتتىك قىزمەت توراعاسى ز. وسمونوۆ, مەملەكەتتىك كوشى-قون قىزمەتىنىڭ توراعاسى م. ايداراليەۆ, مەملەكەتتىك شەكارا قىزمەتى توراعاسىنىڭ ورىنباسارى ك. يساكوۆ جانە وزگەلەر بار.
شاعىن قۇرامدا ەكىجاقتى كەلىسسوزدەر جۇرگىزىلدى. قازىر ەكى ەلدىڭ مينيسترلىكتەرى مەن ۆەدومستۆولارى باسشىلارىنىڭ قاتىسۋىمەن كەڭەيتىلگەن قۇرامدا كەلىسسوزدەر ءجۇرىپ جاتىر. كەزدەسۋگە قىرعىز تاراپى باستاماشىلىق ەتكەن.
قازاقستان رەسپۋبليكاسىنىڭ قىرعىز رەسپۋبليكاسىمەن ساۋدا اينالىمى 2017 جىلدىڭ قاڭتار-شىلدە ارالىعىندا $399,2 ملن-دى قۇراعان, سونداي-اق, وتكەن جىلدىڭ وسى كەزەڭىمەن ($311,6 ملن) سالىستىرعاندا 28,1%-عا ($87,6 ملن) ۇلعايعان.
قازاقستاننىڭ قىرعىز رەسپۋبليكاسىمەن 2017 جىلدىڭ قاڭتار-شىلدە ارالىعىنداعى ساۋدا تەڭگەرىمى وڭ كورسەتكىشكە يە بولىپ, $127,6 ملن-دى قۇراعان. بۇل وتكەن جىلمەن ($101,2 ملن) سالىستىرعاندا 26%-عا وسكەن.
