"كۇزگى تازالاۋ" اتتى سەنبىلىك جۇمىستارى "ەكو ماڭعىستاۋ" ۇكىمەتتىك ەمەس ۇيىمىنىڭ باستاماسىمەن ۇيىمداستىرىلىپ, شارانىڭ وتۋىنە تۇپقاراعان جانە ماڭعىستاۋ وبلىسىنىڭ اكىمدىگى قولداۋ كورسەتتى. سەنبىلىكتىڭ نەگىزگى ماقساتى - كۇندەلىكتى ەكولوگيالىق مادەنيەتتى قالىپتاستىرۋ بويىنشا كۇش-جىگەردى بىرىكتىرۋ, تۇرعىندار نازارىن قورشاعان ورتانى قورعاۋ ماسەلەلەرىنە اۋدارۋ جانە ەكولوگيالىق احۋالدى جاقسارتۋ. تازالىق شاراسىنا كەز-كەلگەن ادام قاتىسۋعا مۇمكىندىك الدى.
"ەكو ماڭعىستاۋ" ۇكىمەتتىك ەمەس ۇيىمىنىڭ ديرەكتورى كيريلل وسيننىڭ ايتۋىنشا, سەنبىلىككە ەڭ بەلسەندى قاتىسقاندار - ماڭعىستاۋ وبلىسى وڭىرلىك كوممۋنيكاتسيالار قىزمەتى, "قوعامدىق كەلىسىم" كوممۋنالدىق ۇيىمى, وبلىستىق پروكۋراتۋرا, ماڭعىستاۋ تۋريزم كوللەدجى, "ADVER" كومپانياسى جانە تابيعاتقا جاناشىر تۇرعىندار بولدى.
"گولۋبايا بۋحتا" تۇپقاراعان اۋدانىنا بارا جاتقان جولدىڭ 63 شاقىرىمىنان بۇرىلعان اۋماقتا ورنالاسقان, ال سەنبىلىككە قاتىسۋشىلار بولسا اۆتوبۋستارمەن جەتكىزىلدى. تازالىق ساقشىلارى بارلىق قاجەتتى قۇرال-سايماندارمەن قامتاماسىز ەتىلدى. تەڭىز جاعالاۋى پلاستيكالىق, شىنى جانە باسقا دا قوقىستاردان تازارتىلدى. سەنبىلىكتىڭ قورىتىندىسى بويىنشا بارلىعى 200-دەن استام قاپشىق, بارلىعى 1 توننادان استام قوقىس جينالعان.
- كاسپي تەڭىزى جاعالاۋىن جينالىپ قالعان قوقىستان تازارتۋ جۇمىستارى تۇراقتى تۇردە جۇرگىزىلەدى. ماسەلەن, "گولۋبايا بۋحتا" اۋماعىندا ەكولوگيالىق دەسانت وسىدان 4 اي بۇرىن بولعان ەدى. قاراپ وتىرساق ايتارلىقتاي كوپ ۋاقىت وتكەن جوق. مۇنداعى جاعدايدى كورىپ, كوڭىل-كۇيىمىز ءتۇسىپ كەتتى. قالايشا تۋعان ولكەگە دەگەن وسىنداي جاۋاپسىزدىقپەن قاراۋعا بولادى؟ بۇل جاعدايدان كەيىن ادامدارىڭ وزدەرىنە دەگەن قۇرمەتىنىڭ جوق بولعانى ما دەگەن ويعا قالادى ەكەنسىڭ. ونىڭ ۇستىنە ايماقتا ءتۋريزمدى دامىتقىمىز كەلەدى. مۇنداي كورىنىستەن كەيىن تۋريزم تۋرالى ايتۋدىڭ ءوزى ارتىق. وسىنداي دەمالىس ورىندارىنا كەلۋشىلەر قاتارى كوپ ەكەندىگى ءسوزسىز, بىراق ولار قاراپايىم تازالىق ەرەجەلەرىن ساقتامايتىنى كوڭىلگە قاياۋ تۇسىرەدى", - دەيدى ك.وسين.
ەلباسى ن.نازارباەۆتىڭ "بولاشاققا باعدار: رۋحاني جاڭعىرۋ" باعدارلاماسى اياسىندا "ساكرالدى قازاقستان" جوباسى جۇزەگە اسىرىلۋدا. ونىڭ اياسىندا ەكولوگيالىق احۋالدى جاقسارتۋ مەن ەلدى مەكەندەردى اباتتاندىرۋ جۇمىستارى جۇرگىزىلۋدە. ماڭعىستاۋلىقتار اتالمىش جوبانى جۇزەگە اسىرۋعا بەلسەندى كىرىسىپ كەتتى, دەلىنگەن ءباسپاسوز حابارلاماسىندا.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
