وڭىردە سوڭعى جىلدارى ستريت ۆوركاۋت جاقسى قارقىن الا باستادى. وبلىس اكىمى دانيال اxمەتوۆتىڭ باستاماسىمەن 2016 جىلدان بەرى بىرنەشە قالالار مەن اۋدانداردا ستريت ۆوركاۋت الاڭدارى اشىلدى. سودان دا بولار, وسى سپورت تۇرىنەن وتكەن وبلىستىق تۋرنيرعا 16 كوماندا قاتىستى. بىلەك كۇشىن تالاپ ەتەتىن كۇردەلى سايىستا 14-20 جاس ارالىعىنداعى ۇلدار مەن قىزدار باقتارىن سىناپ كوردى. تۋرنير ەرەجەسىنە ساي ءار كوماندادا ەكى ۇل, ءبىر قىز بولۋى ءتيىس. جالپى سايىس ەكى كەزەڭنەن تۇردى. ءبىرىنشى كەزەڭ كۇشتىك جاتتىعۋلار بويىنشا بولسا, ەكىنشى كەزەڭدە قاتىسۋشىلار تەحنيكالىق ادىستەردى پاش ەتتى. قاتىسۋشىلار اتالمىش سپورتتىڭ 5 جاتتىعۋ ءتۇرى بويىنشا باسەكەگە ءتۇستى. اتاپ ايتساق, ستريتليفتينگ مۋلتيفريت, ستريتليفتينگ كلاسسيك, كلاسسيك, قىزدار جانە ۇلدار اراسىندا ستريتليفتينگ, سونداي-اق, قىزدار جانە ۇلدار اراسىندا فريستايل بويىنشا ءوتتى. جالپى جارىس قورىتىندىسى بويىنشا وسكەمەن قالاسىنىڭ قۇراماسى جالپىكوماندالىق ەسەپتە كوش باستادى, كۋرچاتوۆ قالاسىنىڭ سپورتشىلارى 2-ورىندى يەلەنسە, ريددەر قالاسىنىڭ كومانداسى 3-ورىنعا تابان تىرەدى. سايىس سوڭىندا جەڭىمپازدار مەن جۇلدەگەرلەر العىس حاتتارمەن جانە قارجىلاي سىيلىقتارمەن ماراپاتتالدى. ۇيىمداستىرۋشىلاردىڭ ايتۋىنشا, جارىس جىل سايىن ءداستۇرلى تۇردە وتكىزىلمەك.
ازامات قاسىم,
«ەگەمەن قازاقستان»
وسكەمەن
