«دارا» قايىرىمدىلىق قورى «Samruk-KazynaTrust» الەۋمەتتىك جوبالارىن دامىتۋ قورىنىڭ قولداۋىمەن ەلىمىزدە جەتىنشى ورتالىق اشىپ وتىر.
مۇمكىندىگى شەكتەۋلى بالالار ءۇشىن باعا جەتپەس ورتالىقتىڭ اشىلۋ سالتاناتىنا سەنات دەپۋتاتى دارحان كالەتاەۆ, «دارا» قورىنىڭ توراعاسى گۇلنار دوساەۆا, «Samruk-KazynaTrust» قورىنىڭ باس ديرەكتورى ەرلان ءدارىموۆ قاتىستى.
تاعدىر تالكەگىنە تۇسكەن بۇلدىرشىندەر مەن ولاردىڭ اتا-انالارىنا قولعابىس بەرەتىن مۇنداي ورتالىق ورال قالاسىندا تۇڭعىش اشىلىپ وتىر. زاماناۋي عىلىم مەن مەديتسينا جەتىستىگىن پايدالانىپ, بالالارعا كاسىبي كومەك كورسەتەتىن مەكەمەنى اشۋعا جاردەم ەتكەن بارلىق مەكەمە-ۇيىم جەتەكشىلەرىنە ءوڭىر باسشىسى التاي كولگىنوۆ العىس ايتتى.
– بيىل «Samruk-KazynaTrust» قورىنىڭ كومەگىمەن ءبىزدىڭ وڭىرگە بالالاردىڭ سپورت جانە ويىن الاڭدارىن سالۋعا 500 ملن تەڭگە ءبولىندى. ال ەرەكشە مۇقتاجدىقتارى بار بۇلدىرشىندەر ءۇشىن اشىلىپ وتىرعان بۇگىنگى الاڭنىڭ ماڭىزى ءتىپتى ەرەكشە. ءبىزدىڭ ستراتەگيالىق ماقساتىمىز – مۇنداي ورتالىقتاردىڭ بارلىعى ەرەكشە ءبىلىمدى قاجەت ەتەتىن بالالار مەن ولاردىڭ وتباسىنا قولجەتىمدى بولۋى, دەپ اتاپ ءوتتى التاي كولگىنوۆ.
ورال قالاسىندا ەرەكشە قاجەتتىلىكتەرى بار ەكى مىڭنان استام بالا تۇرادى. ونىڭ ىشىندە 874 بالانىڭ مۇمكىندىگى شەكتەۋلى, 400-گە جۋىق بالا مامانداردىڭ كاسىبي كومەگىن قاجەت ەتەدى. جاڭا ورتالىق كەز كەلگەن ەرەكشە بالانى جانە ونىڭ وتباسىن دەفەكتولوگ, پسيحولوگ, لوگوپەد, ماسساج, تيفلوپەداگوگ, سۋردوپەداگوگ سەكىلدى مامانداردىڭ جان-جاقتى بىلىكتى كومەگىمەن قامتاماسىز ەتەتىن مەكەمە بولماق. جىل سايىن بۇل ورتالىق دامۋ مۇمكىندىگى شەكتەۋلى 150-200-دەي بالاعا قىزمەت كورسەتپەك. قىزمەتتىڭ بارلىعى بالالارعا جانە ولاردىڭ وتباسىلارىنا تۇرعىلىقتى جەرى بويىنشا تەگىن كورسەتىلەدى. ورالدا اشىلعان جوبانىڭ جالپى قۇنى 15 ملن تەڭگەگە جۋىق. مۇندا زاماناۋي قۇرال-جابدىقپەن قاتار ەرەكشە قاجەتتىلىكتەرى بار بالالارعا ارنايى ءبىلىم بەرۋ, دامىتۋ, تاربيەلەۋ باعىتىنداعى ادىستەمەلىك جيناقتارمەن قامتىلعان ارنايى كىتاپحانا دا قىزمەت ەتپەك.
ورالداعى كوررەكتسيالىق كابينەت جەتەكشىسى گۇلسىم عاليەۆا قازىردىڭ وزىندە مۇندا ەستۋ, كورۋ, سويلەۋ, دامۋ قابىلەتتەرى شەكتەلگەن 62 بالا قابىلدانىپ, 16 كاسىبي ماماننىڭ كومەگىمەن تۇزەتۋ جۇمىستارى باستالىپ كەتكەنىن ايتادى.
قازبەك قۇتتىمۇرات ۇلى,
«ەگەمەن قازاقستان»
ورال
سۋرەتتى تۇسىرگەن
تەمىربولات توقمامبەتوۆ
