ەكسپو كورمەسىنە 8 سپەكتاكل اپارىپ, استانا قوناقتارىن ونەرىمەن ءتانتى ەتىپ قايتقان تەاتر كوپ جىلدان بەرى ءۇزىلىپ قالعان گاسترولدىك ساپارلارىن قايتا جانداندىرىپ, ەكى اپتا بويى اتىراۋ وبلىسىن ارالاپ, شالعايداعى اۋىل كورەرمەندەرىن شابىتتى ويىنىمەن ءسۇيسىندىرىپ قايتقان ەدى. بۇل كۇندەرى تەاتردىڭ جۇمىس جوسپارى تىعىز بولعانى سونداي, ءبىر كۇندە ءتورت سپەكتاكلدەن قويىپ, قيانداعى ەلدى مەكەندەردەگى قاراپايىم تۇرعىنداردى قاراشاڭىراق تەاتردىڭ بەلومىرتقاسى ىسپەتتەس بەلگىلى ارتىستەرىمەن, كەيىنگى بۋىن اكتەرلەرىمەن جاقىننان جۇزدەستىرىپ, بۇگىنگى شىعارماشىلىق ۇجىمنىڭ باعىت-باعدارىمەن تانىسۋعا كەڭ مۇمكىندىك سىيلادى. اۋىل-ەلدى ارالاپ بولعان سوڭ ىلە-شالا اكەمتەاتر ارتىستەرى ۇلىبريتانياعا اتتانىپ كەتتى. رەجيسسەر ە.وباەۆتىڭ ساحنالاۋىمەن قويىلعان جازۋشى-دراماتۋرگ دۋلات يسابەكوۆتىڭ «جاۋجۇرەك» سپەكتاكلىنىڭ لوندون كورەرمەندەرىنە ۇسىنىلۋى قازاق رۋحاني ومىرىندەگى ايتۋلى وقيعا رەتىندە قابىلداندى. سەبەبى كسرو حالىق ءارتىسى ءاسانالى ءاشىموۆتىڭ ايتۋىنشا, سوناۋ 1960 جىلدارى ايگىلى ساحنا شەبەرى شاكەن ايمانوۆ شەكسپير شىعارمالارى نەگىزىندە ۇيىمداستىرىلعان تەاتر فەستيۆالىنە ەپيزودتىق رولىمەن جەكە-دارا قاتىسىپ قايتقانى بولماسا, اۋەزوۆتىكتەر الەمدىك دراما ونەرىنىڭ ورداسى انگليا تورىندەگى تەاتر ساحناسىندا بۇرىن-سوڭدى ويناماعان.
ۇلىلاردىڭ ءىزى قالعان ورداداعى جەتىستىكتەردى سۇيىنشىلەۋمەن ءسوز باستاعان تەاتر ديرەكتورى, قازاقستاننىڭ ەڭبەك سىڭىرگەن قايراتكەرى ەرلان ءبىلالوۆ ماۋسىمنىڭ اشىلۋىنا وراي شاقىرىلعان ءباسپاسوز ءماسليحاتىندا باسقا دا جاڭالىقتارىمەن ءبولىستى. تەكتى ونەردىڭ توقسان جىلدىق تورىنە كوتەرىلىپ, وزگە تەاترلارعا ۇلگى كورسەتەر ۇلكەن تەاتر بولعاندىقتان, م.اۋەزوۆ تەاترى ءدال وسى كۇنى الماتى قالاسىنداعى 8 تەاتردىڭ باسىن قوسىپ, ەلباسى ن.ءا.نازارباەۆتىڭ «رۋحاني جاڭعىرۋ» باعدارلاماسىنىڭ جانە ۇلى جازۋشى م.اۋەزوۆتىڭ 120 جىلدىعى اياسىندا «تەاتر الەمىندەگى رۋحاني جاڭعىرۋ» اتتى تەاترلار كورمەسىن وتكىزدى. كورمەگە م.لەرمونتوۆ اتىنداعى ورىس اكادەميالىق دراما تەاترى, كورەي تەاترى, نەمىس تەاترى, ع.مۇسىرەپوۆ اتىنداعى بالالار مەن جاستار تەاترى قاتىسىپ, ءوز ونەر وردالارىنداعى تالانتتاردىڭ تەرى سىڭگەن ساحنالىق كيىمدەرىن, ارتىستەر تۇتىنعان بۇيىمدار مەن تاريحي سۋرەتتەردى, بۋتافوريالىق بىرەگەي جادىگەرلەردى جۇرت نازارىنا قويدى.
ەكى ايلىق دەمالىستان سوڭ ساحنانى ساعىنعان تەاتر اكتەرلەرى قىزىل كىلەمنىڭ ۇستىمەن سالتاناتتى تۇردە ءجۇرىپ وتكەن سوڭ, م.اۋەزوۆ اتىنداعى تەاتردىڭ كوركەمدىك جەتەكشىسى ءاسانالى ءاشىموۆ ءسوز الىپ, لەنتاسىن قيعان العاشقى كورمەنى كورەرمەندەر زور قىزىعۋشىلىقپەن تاماشالادى.
سونداي-اق م.اۋەزوۆ تەاترى ءۇشىن بيىلعى جىل – مەرەيتويلار جىلى. تەاتر ەسىمىن تۋ ەتىپ ۇستاعان م.اۋەزوۆتىڭ 120 جىلدىعى, م ۇلىك سۇرتىباەۆتىڭ 100, نۇرمۇحان ءجانتوريننىڭ – 90, رايىمبەك سەيىتمەتوۆ, ءانۋار مولدابەكوۆ, جۇماباي مەدەتباەۆتىڭ – 80, ءانۋار بورانباەۆ پەن اشىربەك سىعايدىڭ 70 جىلدىق مەرەيتويلارى شەرۋ ىسپەتتى بىرىنەن سوڭ ءبىرى وسى تەاتردىڭ تورىندە اتالىپ وتەدى.
كورمەدەن سوڭ قادىم زاماننان قالىپتاسقان داستۇرىنە سايكەس, م.اۋەزوۆ اتىنداعى قازاق مەملەكەتتىك اكادەميالىق دراما تەاترى 92-ماۋسىمىنىڭ شىمىلدىعىن ۇلى دراماتۋرگتىڭ «اباي» سپەكتاكلىمەن اشتى.
ايگۇل احانبايقىزى,
«ەگەمەن قازاقستان»
الماتى
