قالا باسشىسى №73 فيزيكا-تەحنيكالىق مەكتەبىنە باردى. مۇندا وقۋ عيماراتىنىڭ اينالاسىنداعى ينفراقۇرىلىم ماسەلەسى قوردالانىپ قالعان. مەكتەپتىڭ اينالاسىنداعى قارقىندى ءجۇرىپ جاتقان قۇرىلىستىڭ سالدارىنان اتا-انالار مەن وقۋشىلار اينالىپ وتۋگە ءماجبۇر. مەكتەپتىڭ جانىندا اۆتوبۋس ايالداماسى جوق, كوشەنى جارىقتاندىراتىن شامدار جەتكىلىكسىز, ال قۇرىلىس اۋماعى قورشاۋسىز جاتاتىن.
اپپارات جينالىسىندا ءا.يسەكەشەۆ اۋدان اكىمدەرى مەن ءتيىستى باسقارمالارعا 28 ءبىلىم وشاعىنداعى جاياۋ جول جۇرگىنشىلەرى مەن جۇرەتىن جولدىڭ جەتكىلىكسىزدىگىن ايتىپ, ماسەلەنى شەشۋگە تاپسىرما بەرگەن بولاتىن.
وسىعان بايلانىستى قالا اكىمى جاۋاپتى تۇلعالارعا قاتاڭ سوگىس جاريالاپ, اۋدانداعى ءبىلىم مەكەمەلەرىندەگى ولقىلىقتاردى رەتتەۋگە ءبىر اپتا مەرزىم بەردى.
«مەكتەپكە دەيىنگى جولدار مەن كىرە بەرىستەگى جولدار بالالار مەن اتا-انالار ءۇشىن ىڭعايلى ءارى قاۋىپسىز بولۋى كەرەك. وقۋشىلار مەكتەپكە دەيىن كەدەرگىسىز جەتۋى ءتيىس. ونى جاساۋ - قالالىق بيلىكتىڭ مىندەتى. ءبىز بالالارعا ساپالى ءبىلىم الۋ ءۇشىن جاعداي جاساۋعا مىندەتتىمىز», - دەدى ءا.يسەكەشەۆ.
قازىرگى تاڭدا تۇرعىندار جول جابىندىسى جوق دەپ ءجيى شاعىمدانعان كوشەلەردە قۇرىلىس جۇمىستارى قارقىندى ءجۇرىپ جاتىر. قالالىق اكىمدىكتىڭ مالىمەتى بويىنشا, جىل سوڭىنا دەيىن تۇرعىن ءۇي الابىنا اپاراتىن 50 كوشە سالىنىپ بىتەدى. ماسەلەن, اقان سەرى كوشەسىندەگى قۇرىلىس اياقتالدى. قالا اكىمى قۇرىلىس جۇمىستارىنىڭ ساپاسىن تەكسەرىپ, جول جوندەۋشىلەر جىبەرگەن كەمشىلىكتەردى تۇزەۋگە ناقتى تاپسىرمالار بەردى.
