«اراكس» كەمەسى 2016 جىلدىڭ 4 ماۋسىمىندا قاراقيا اۋدانىنىڭ قۇمدى مۇيىسىندە شامامەن جاعادان 100 مەتر قاشىقتىقتا قالعان بولاتىن. كورسەتىلگەن مالىمەتتەر بويىنشا, كەمەنىڭ ۇستىڭگى پالۋباسىندا باسقا كەمەلەردەن قابىلدانعان مازۋتپەن لاستانعان سۇيىق قۇيىلعان 15 بوشكە, ونىڭ ىشىندە 10 ەكى ءجۇز ليترلىك جانە 5 ەكى ءجۇز ليترلىك بوشكەنىڭ جارتىلاي كەسىلگەنى بار.
ايماق باسشىسى ەرالى توعجانوۆتىڭ تاپسىرماسىمەن ۇستىمىزدەگى جىلدىڭ 10 تامىزىندا وتكەن وتىرىستا «توتەنشە جاعدايلاردى جويۋ جانە الدىن الۋ» بويىنشا ماڭعىستاۋ وبلىستىق كوميسسياسىنىڭ كەزەكتەن تىس وتىرىسىندا كاسپي تەڭىزىندە مۇنايدىڭ توگىلۋىنىڭ بولدىرماۋ, قورشاعان ورتانىڭ لاستانۋىنىڭ الدىن الۋ جانە توتەنشە جاعدايلار قاۋىپسىزدىگىن ساقتاۋ ماقساتىندا, «اراكس» كەمەسىن مۇناي قالدىقتارىنان تەڭىز ارقىلى تازالاۋ جۇمىستارىنا جەرگىلىكتى اتقارۋشى ورگاننىڭ رەزەرۆتىك قورىنان قاراجات ءبولىندى.
«اراكس» كەمەسىنە قاتىستى ەكولوگيالىق توتەنشە جاعدايلاردىڭ الدىن-الۋ ءۇشىن تازالاۋ جۇمىستارىن جۇرگىزۋگە «باتىسمۇناي ترانس» جشس-مەن كەلىسىمشارت جاسالىپ, كوميسسيا قۇرىلدى. قازىرگى ۋاقىتتا «اراكس» كەمەسىن مۇناي قالدىقتارىنان تازارتۋ جۇمىستارى باستالىپ كەتتى.
اراكس كەمەسىندەگى قۇرامىندا مۇناي بار زاتتارمەن لاستانعان قالدىقتاردىڭ كولەمى – 930 ت., دەلىنگەن ءباسپاسوز حابارلاماسىندا.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
