كاسپي تەڭىزى ماسەلەلەرىن شەشۋ جانە كاسپي ماڭى ايماعىندا ءبىرتۇتاس ءبىلىم بەرۋ كەڭىستىگىن قۇرۋ ماقساتىندا 1996 جىلى جۇمىسىن باستاعان اسسوتسياتسياعا قازىر 55 ۋنيۆەرسيتەت مۇشە. ازەربايجان, يران, رەسەي, تۇركىمەنستان مەن قازاقستاننىڭ جوعارى وقۋ ورىندارىنىڭ رەكتورلارى باس قوسقان جيىنعا ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ رەكتورى, پروفەسسور ابزال تالتەنوۆ توراعالىق ەتتى.
پلەنارلىق ءماجىلىستى باستاعان اتىراۋ وبلىسىنىڭ اكىمى نۇرلان نوعاەۆ: «تاريحي تاعدىرلاس مەملەكەتتەردىڭ ەجەلدەن قالىپتاسقان دوستىق قارىم-قاتىناسىنا وسىنداي شارالار تىڭ سەرپىن بەرەدى, - دەدى. - مۇندا ءتۇرلى سالالارداعى كەلەلى ماسەلەلەر كوتەرىلىپ, ورتاق شەشىمىن تابادى دەپ سەنەمىن. قازاق ەلىندە قوعامدىق كەلىسىم, ساياسي تۇراقتىلىق پەن ۇلتارالىق تاتۋلىق سالتانات قۇرعان. بۇل - ەلباسىمىزدىڭ سارابدال ساياساتىنىڭ جەمىسى. قوعامىمىز ءوسىپ-وركەندەسىن دەسەك, باسەكەگە قابىلەتتى بولۋىمىز كەرەك. وسى ورايدا جوعارى وقۋ ورىندارىنىڭ اتقارار ءرولى زور بولماق. كاسپي ماڭى ەلدەرى ۋنيۆەرسيتەتتەرىنىڭ اراسىندا تىعىز بايلانىس ورناتۋدىڭ ماڭىزى زور».
كاسپي ماڭى ەلدەرى مەملەكەتتىك ۋنيۆەرسيتەتتەرى قاۋىمداستىعى - اشىق پىكىر الاڭى. ون بەس جىلدان بەرى كوپتەگەن عىلىمي-تاجىريبەلىك كونفەرەنتسيالار مەن دوڭگەلەك ۇستەلدەر ۇيىمداستىرىلدى, كاسپي ماسەلەسى بويىنشا زەرتتەۋ جوبالارى جاسالدى, عىلىمي جۋرنالدار باسىلىپ, بىرلەسكەن ستۋدەنتتىك وليمپيادالار مەن ەكسپەديتسيالار ءوتتى.
اسسامبلەيا اياسىندا پلەنارلىق ماجىلىستەن بولەك «جوعارى ءبىلىم بەرۋ سالاسىنداعى جوبالىق مەنەدجمەنت» رەكتورلار ءسامميتى بولدى. ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە يران مادەنيەتى مەن ءتىلى ورتالىعى اشىلدى. ۋنيۆەرسيتەتتەردىڭ حالىقارالىق جانە عىلىمي ىنتىماقتاستىق مەنەدجەرلەرىنە ارنالعان ۆوركشوپ ۇيىمداستىرىلدى. اسسوتسياتسيانىڭ عىلىمي ىنتىماقتاستىعى مەن زەرتتەۋلەرى توعىسقان كاسپي پورتالى جوباسى تانىستىرىلدى.
باقىتگۇل باباش,
«ەگەمەن قازاقستان»
اتىراۋ
سۋرەتتى تۇسىرگەن ەرلان التىباەۆ
