– ءبىز كەزەكتى روبوتتى تەحنيكا فەستيۆالىنىڭ اقتوبە جەرىندە ءوتىپ جاتقانىنا قۋانىشتىمىز. ەلباسى نۇرسۇلتان نازارباەۆ حالىققا جولداۋىندا ادامي كاپيتالدى دامىتۋ قاجەتتىگىن باسا ايتقان ەدى. سوعان بايلانىستى وبلىستا روبوتتى تەحنيكانى دامىتۋ – باسىم باعىتتاردىڭ ءبىرى. ءبىز بالالار شىعارماشىلىعىن ىنتالاندىرۋدى جانە سول ارقىلى دارىندىلاردى انىقتاۋعا تىرىسامىز. اقتوبەدە سالىنعان جاڭا عيماراتتاردىڭ بىرىندە روبوتتىتەحنيكا جانە كەمە مودەلدەۋ ۇيىرمەسى جۇمىس جاساي باستادى. ءبىز مۇنى «بۇلاق كورسە كوزىن اشۋدىڭ» ءبىر جولى دەپ تۇسىنەمىز. فەستيۆال قىزمەتى ءساتتى بولسىن,–دەدى حالىقارالىق جيىننىڭ اشىلۋ راسىمىندە اقتوبە وبلىسىنىڭ اكىمى بەردىبەك ساپارباەۆ.
بۇدان سوڭ «KazRoboSport-2017» رەسپۋبليكالىق عىلىمي-تەحنيكالىق جوبالار كونكۋرسىنىڭ فينالدىق تۋرى مارەگە جەتتى. وعان ايماقتىق ىرىكتەۋ تۋرنيرلەرىنىڭ جەڭىمپازدارى, ياعني ەلىمىزدەگى جالپى ءبىلىم بەرەتىن مەكتەپتەردەن بارلىعى 141 بالا قاتىستى. فينالدىق كەزدەسۋدە روبوسپورتتىڭ بەس ءتۇرى – فۋتبول, سۋمو, سىزىقپەن ءجۇرۋ, كەگەلرينگ جانە بياتلوننان باق سىناستى. جەكپە-جەك سارايىنىڭ كەڭ زالىندا اتالعان سپورت تۇرلەرىنە شىعارىلعان روبوتتاردىڭ ءىس-قيمىلىنا كوپشىلىك قىزىعۋشىلىقپەن قارادى. اقىلدى تەحنيكانىڭ بۇل ءتۇرىن مەكتەپ وقۋشىلارى ويلاپ تاۋىپ, سول ءۇشىن ارنايى باعدارلاما ەنگىزگەن. روبوتتاردىڭ قيمىل-قوزعالىسى ۇيالى تەلەفون قوسىمشاسى ارقىلى باسقارىلادى.
سالتاناتتى شارا كەزىندە فەستيۆال قوناقتارى – رەسەيدەگى روبوتتى تەحنيكادان ءبىلىم بەرۋ قاۋىمداستىعىنىڭ پرەزيدەنتى ماكسيم ۆاسيلەۆ, تمد ەلدەرىنەن جانە شەتەلدەن كەلگەن روبوتتى تەحنيكا سالاسىنىڭ ساراپشىلارى ەل ايماقتارىنداعى روبوتتى تەحنيكادان ءبىلىم بەرەتىن وقىتۋشىلار زاماناۋي روبوتتى تەحنيكا ونىمدەرىنىڭ كورمەسىن تاماشالادى. وندا Lego جيىنتىعى, 3D-پرينتەرلەر, كۆادروكوپتەرلەر مەن باسقا دا كوپتەگەن ونىمدەر بار.
ال استانا قالاسىنداعى گيمنازيالاردىڭ بىرىندە وقيتىن دانيل كرۋجەۆنيكوۆ روبوتوتەحنيكا جاساۋمەن ءبىر جىلدان بەرى اينالىسادى. ول ءۇي جيناۋ جۇمىستارىن ءبىر ءوزى اتقاراتىن روبوت جاساۋدى الدىنا ماقسات ەتىپ قويىپتى. ەل چەمپيوناتىنىڭ اقتىق كەزەڭىندە ول 40 مينۋتتا بەرىلگەن جولدى اسا جوعارى جىلدامدىقپەن ءوتىپ, شىنىلاردى قۇلاتاتىن ماشينا جاساپ شىعاردى.
«KazRobotics» ءبىلىم بەرۋ جانە سپورتتىق روبوتتى تەحنيكا فەدەراتسياسىنىڭ پرەزيدەنتى ايجان جەكەەۆانىڭ مالىمەتىنشە, «KazRobotics-2017» حالىقارالىق روبوتتى تەحنيكا فەستيۆالى اياسىندا وتكەن عىلىمي-تەحنيكالىق جوبالار كونكۋرسىنىڭ فينالدىق تۋرىندا جالپىكوماندالىق ەسەپتە قاراعاندى وبلىسى ءبىرىنشى ورىندى ەنشىلەدى. ەكىنشى ورىن – اقتوبە وبلىسىنا تيسە, ءۇشىنشى ورىنعا باتىس قازاقستان وبلىسىنان كەلگەن ورەندەردىڭ جۇمىسى لايىق دەپ تانىلدى.
تەمىر قۇسايىن,
«ەگەمەن قازاقستان»
اقتوبە
