وسىعان وراي الماتى قالاسىنداعى ۇلتتىق كىتاپحانادا, ەرمەك تۇرسىنوۆتىڭ كينوكلۋبىندا مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق تۇسىرگەن دەرەكتى ءفيلمنىڭ تۇساۋكەسەرى ءوتتى.
التىن ساۋساقتى, اعاشتان ءتۇيىن تۇيگەن شەبەردىڭ بىرەگەي ەسىمى قازاق ونەرىندە الابوتەن اتالىپ قانا قويماي, ۇلتىمىزدىڭ جويىلىپ بارا جاتقان ءداستۇرلى قولدانبالى ونەرىن قايتا جاڭعىرتقان ەڭبەگىنە ءالى تالاي ۇرپاقتىڭ ءتانتى بولاتىنى ءسوزسىز. كۇنى بۇگىنگە دەيىن بىرقاتار كوركەم, دەرەكتى فيلمدەردىڭ اۆتورى بولىپ ۇلگەرگەن ءفيلمنىڭ رەجيسسەرى مىرعالىم ەسىركەپوۆ كەيىپكەرىن كەزدەيسوق تاڭداماعان. ءفيلمنىڭ «ۇستا» دەگەن اتاۋىنىڭ ءوزى تار زاماننىڭ شەڭبەرىنىڭ ىشىندە جۇرسە دە قازاقتىڭ ۇمىتىلا باستاعان, قولدانىستان قالىپ بارا جاتقان قولونەرىنە قاناتتى قيالىمەن جان ءبىتىرىپ, ساقتاپ قالۋعا تىرىسقان ۇلتجاندى ۇل داركەمباي شوقپار ۇلى ەكەنىن اينا-قاتەسىز تۇسپالدايدى. رەجيسسەردىڭ شوقتىعى بيىك قولونەر شەبەرلەرىنىڭ قۇپيا سىرىن مەڭگەرگەن داركەمباي سەكىلدى دارا ونەر يەسىنىڭ بولمىسىن تەرەڭ بىلەتىن تانىمى جاڭا تۋىندىسىندا جان-جاقتى تانىلادى.
– مەن داركەمباي شوقپار ۇلىنىڭ تۇلعالىق بەينەسىن تەرەڭىنەن تانىعىم كەلدى. سوندىقتان دا وسى ءفيلمدى تۇسىرەمىن دەپ شەشتىم. ول كىسىنى زەرتتەي كەلە, ول – الدىنا قويعان ماقساتىنا جەتۋ ءۇشىن تايعاناقتامايتىن, باتىل ءارى اقجارقىن ادام ەكەنىن ءبىلدىم. ونىڭ بار ماقساتى – بويىنداعى تالانتىن يگەرىپ كورسەتۋ, ونى دامىتۋ عانا ەمەس, سونىمەن بىرگە ۇلتتىق ونەر مەن ءداستۇردى شاكىرتتەرىنە, ءىزباسار ۇستالارعا ۇيرەتۋ ەدى. كەڭەس زامانىنان بەرى ساندىك-قولدانبالى ونەرىنە ءتيىستى كوڭىل بولىنبەي كەلەدى, ءاردايىم بەينەلەۋ ونەرىنىڭ جاس سالاسى رەتىندە عانا قاراستىرىلادى. مەنىڭ ءبىرىنشى ماماندىعىم – قولدانبالى ونەر سۋرەتشىسى. سوندىقتان دا, داركەمباي ۇستانىڭ جۇمىستارى ماعان جاقىن, – دەيدى رەجيسسەر مىرعالىم ەسىركەپوۆ.
«ۇستا» دەرەكتى ءفيلمى وتكەن جىلدىڭ سوڭىنا قاراي وندىرىسكە جىبەرىلگەن. ءفيلمنىڭ تۇسىرىلىمدەرى الماتى وبلىسىنىڭ اقشي اۋىلىندا وتكەن. داركەمباي شوقپار ۇلى ءومىرىنىڭ سوڭىنا دەيىن وسى اۋىلدا تۇرعان جانە ءوز شەبەرحاناسىن اشقان. اقشي اۋىلىندا داركەمباي شوقپار ۇلى اتىنداعى قولونەر مۋزەيى ورنالاسقان. مۋزەيدى 2010 جىلى شەبەردىڭ ۇلى اشقان. سونداي-اق, تۇسىرىلىمدەر داركەمباي شوقپار ۇلى تۋىپ-وسكەن ەڭبەكشىقازاق اۋدانىنداعى كازاتكوم اۋىلىندا دا ءوتتى.
مادەني ءىس-شاراعا داركەمباي شوقپار ۇلىنىڭ تۋىستارى مەن جاقىندارى, كوزكورگەن زامانداستارى مەن شاكىرتتەرى, ءفيلمنىڭ ءتۇسىرۋ توبى مەن «قازاقفيلم» كينوستۋدياسىنىڭ وكىلدەرى قاتىستى.
ايگۇل احانبايقىزى,
«ەگەمەن قازاقستان»
الماتى
