ۆەلوكوپكۇندىكتىڭ ەكىنشى كۇنى سپورتشىلار كۋملۋدجا-فەتحيە ارالىعىنداعى 206 شاقىرىم تاسجولمەن ءجۇرىپ ءوتتى. كۋملۋدجا قالاسىنان شىققان سپورتشىلار توبى مارەگە تاياعانعا دەيىن توپ بولىپ كەلدى. ال سوڭعى 20 شاقىرىمدا ۆەلوسپورتشىلار جەكە-دارا كوش باستاۋعا تىرىسىپ, ءالسىن-ءالسىن شابۋىلعا شىققان بولاتىن. بىراق ۇمتىلىستارى ءساتتى بولا قويمادى. 206 شاقىرىمدى ەكى ساعات, ەكى مينۋت, بەس سەكۋندتا ءجۇرىپ وتكەن «بورا حەنگسگروح» كومانداسىنىڭ وكىلى سەم بەننەت ەكىنشى كەزەڭدە دە توپ جاردى. مارە سىزىعىن ەكىنشى بولىپ «ترەك-سەگفرەدو» ۆەلوشاباندوزى ەدۆارد تەنس كەستى. ال «استانا» ۆەلوكلۋبىنىڭ وكىلى ريككاردو مينالي ۇزدىك ۇشتىكتى قورىتىندىلادى. ءبىر ايتا كەتەرلىگى, ءۇش ۆەلوشاباندوزدىڭ دا ەكىنشى كەزەڭدە مارەگە كەلگەن ۋاقىت كورسەتكىشى بىردەي بولدى.
«تۇركيا تۋرىنا» قاتىسىپ جاتقان «استانا» كومانداسى ەكىنشى كەزەڭنەن كەيىن جەتى ۆەلوشاباندوزبەن قالدى. كەشەگى جارىس كۇنىندە سەرگەي چەرنەتسكي اۋىر جاراقات الىپ, كەزەڭ سوڭىنا دەيىن جەتە المادى. ال بۇعان دەيىن ۇلكەن قاقتىعىس ورتاسىندا قالىپ قويعان يەسپەر حانسەن جاراقاتتان امان شىعىپ, ساتتىلىك جولداس بولعانىن ايتادى. «كەشە اۋىر جاراقات الىپ قالاتىنداي جاعداي بولدى. بىرنەشە شاباندوز ۇلكەن جىلدامدىقتا كەلە جاتىپ, ءبىر-بىرىمىزگە سوقتىعىستىق. مۇنداي وقيعادان جاراقاتسىز شىعۋ مۇمكىن ەمەس ەدى. الايدا مەنىڭ جولىم بولدى. ەندى بار كۇشىمدى كوماندانىڭ جەڭىسى ءۇشىن سالاتىن بولامىن», دەيدى حانسەن.
ەرمۇحامەد ماۋلەن,
«ەگەمەن قازاقستان»
