ەستەرىڭىزدە بولسا, بۇل جونىندە 2012 جىلى ەلباسىنىڭ حالىققا جولداۋىندا دا قوزعالعان بولاتىن. ەندىگى كەزەكتە پرەزيدەنتىمىز لاتىن الىپبيىنە كوشۋدىڭ ناقتى جولدارىن ايتىپ, وسى ماسەلە زيالى قاۋىم اراسىندا كەڭىنەن تالقىلانۋى قاجەت ەكەنىن العا تارتتى. سوندىقتان, كۇن تاقىرىبىندا وتكىر تۇرعان, بۇگىندە قوعامدا قىزۋ تالقىلانىپ جاتقان لاتىن الىپبيىنە كوشۋ ماسەلەسىنە بايلانىستى وي قوزعاۋدى ءجون كوردىم.
تاريحتان بەلگىلى, وتكەن عاسىردىڭ 30-40 جىلدارى لاتىن ءالىپبيى ەلىمىزدە قارىپ رەتىندە قولدانىستا بولدى. سول جىلدارى عىلىم-ءبىلىم تۋىندىلارى, جالپى ءىس-قاعازدار لاتىن ءالىپبيى نەگىزىندە جۇرگىزىلدى. مەنىڭ اكەم – ۇلى وتان سوعىسىنىڭ ارداگەرى. اكەمنىڭ مايدان دالاسىنان تۋعان-تۋىس, باۋىرلارىنا لاتىن قارپىمەن جازعان حاتتارى ءالى كۇنگە دەيىن ساقتاۋلى. مىنە, وسىنىڭ ءوزى سول ءبىر جىلدارى لاتىن قارپىنىڭ كەڭىنەن قولدانعانىن اڭعارتسا كەرەك.
جۋىردا اۋىلدىق وكرۋگ اكىمى اپپاراتىندا اعا بۋىن جانە جاستاردىڭ قاتىسۋىمەن وتكەن جيىندا وسى ماسەلە قىزۋ تالقىلانىپ, وي-پىكىرلەرىمىزدى ورتاعا سالدىق. باسقوسۋدا ويى ءبىر جەردەن شىققان جاستاردىڭ «جاڭارۋ جازۋدان باستالادى» دەگەن سوزىنە رازى بولدىم. ءيا, لاتىن الىپبيىنە كوشۋ – ءبىر كۇندە شەشىلەتىن ماسەلە ەمەس. ۋاقىت وتە كەلە ءبارى رەت-رەتىمەن ءوز جۇيەسىن تاۋىپ, قولدانىسقا ەنەتىنىنە سەنىمدىمىن. سەبەبى, لاتىن قارپى تاۋەلسىز مەملەكەتىمىزدىڭ ءوسىپ-وركەندەۋىنە, وتاندىق عىلىم-ءبىلىم سالاسىنىڭ دامۋىنا وراسان ىقپال ەتەتىنى انىق.
قورىتا ايتقاندا, ەلدىگىمىز بەن ەگەمەندىگىمىزدى ايقىندايتىن يگى باستامانى قازاق ەلى ءبىراۋىزدان قولدايتىنىنا كامىل سەنەمىن.
الپىسباي جۇماحانوۆ,
جامبىل اۋداندىق قوعامدىق كەڭەس توراعاسى, «پيونەر» وندىرىستىك
كووپەراتيۆىنىڭ باسشىسى
جامبىل وبلىسى
